Timote dɔlɔɔ 5 - Yálá laawoo hɛɓɛ

Laa na nuą heekpəlin na

¹ 'Hvó haŋąn nu pɔlɔ-pɔlɔ ɓa a nwumɛ̨ pələ, kɛlaa, pələ ɓo mą, yɛ ə́ nąn. Nu nwunuɠaa hon bələ kɛ yɛ ə́ nąn nonnii.

² Nɛ̨ɛ̨goloɠaa kaa yɛ, ə́ leeni, ə́ nɛ̨ɛ̨lɛa kaa yɛ ə́ mąąhalani, yiliɠaa kəlee kɛ mąąhəɠə laa hu.

Galaninŋaa

³ Galanin gaa kpɔ a galanin neelee, 'mąąwiɛ.

⁴ Akɛ lonŋaa da kɛ galanin da yəi, a wala kɛ ti mąnįnni, diɛi ti ɓə tɔlɔɔ mąąnɛ̨ɛ̨ di Yálá mɛ̨nį lɛ di yəi bɛlɛ́n nuą diɛ, gwələi di kaa-nuą di bili diɛ, di da kulɔ. Yili kpɔ ɓə nɛlɛɛ Yálá ɲɛ̨i ɓa.

⁵ Yii ɓaa nɛ̨ɛ̨nui gaa kpɔ a galanin a neelee, nu hvo ɲəi, aa gilitɔɔ Yálá ɓa, ɛlɛɛ, yɛ Yálá hvɛli, yɛ mąąnɛ̨ɛ̨ a kpinį da hvóló.

⁶ Kɛlaa galanin a gbɔwɔ lɔ yɛnɛ̨ɛ̨ liiɓa hu, ə mą kɛ, gaa yɛnɛ̨ɛ̨, ɉaai.

⁷ Yiliɠaa ɓə mąąnɛ̨ɛ̨ ə́ gili too di ŋą, ə gɛ, di kɛ a nuąi di mąąkulɔi hva kɛ diɛ.

⁸ Akɛ nu a wala ŋą nuą mąąkpɔnmąą ɓo, gəlee ə mą gɛ, ɲəi bɛlɛ́n nuą, a kɛ ti, aa lənə laa na laa ɓa, mąą nui nwɛi ɲɔ̨nwɔ̨ɔ̨i dɛɛ háli pulumun ma.

⁹ Nɛ̨ɛ̨nui mąąnɛ̨ɛ̨i di naa too galaninŋaa pɔ, ya ɓaa, yii gaa kwɛlan gaa pɔw mɛ̨ida, ɛlɛɛ, ɉilɛ ə ɓo lɔ kɛ tanɔ̨n,

¹⁰ hvo kɛli, nu kəlee di kɛ a gɔlɔnŋąą diɛ mąątɛ̨nɛ̨ dúwɔ́ pələ lɛlɛɛɠaa hu, a nɛ̨ɛ̨nui aa lon gulɔ ɉu, ɲɛ̨i ponoɔ, yɛ kpɔnmąą tɛɛ mąąhəɠə nuą pɔ, yɛ kpɔnmąą tɛɛ mąąwɛli nuą pɔ, yɛ mɛ̨nį lɛlɛɛ huwui lɔpee gəlee kɛ nuą diɛ.

¹¹ Yii ɓaa galaninŋaai a nu nwunuɠaa, hvó di laa too ɉu. Hvo gaa, hilɛwɛli a pɛli di nwun dínɛ̨n ɉii, ə di ɲɛ̨i həɠə Kristə ɓa, diɛ hilɛ həɠə,

¹² diɛ kiti hvilɛn di kpɔwɔ pulu, a di woo tɔlɔɔi di gwɛlɛ, diɛ ɉukala.

¹³ Yɛ bələi kóló hvo la diɛ, di nwun yɛ ɓo la tii pɛlɛ́-hvaŋąn gəlee mu, hvo lɔ lɛɛ la a tíi kpɛɛ mɛ̨nį diɛ, kɛlaa, di woo tamąą di la, di laa kpɔn və hee li, di laa hva kpɛ mɛ̨nįɠaa hu, mɛ̨nį hvo lɛɠɛ li diɛ ya ɓə da ɉukulɔ.

¹⁴ Gáá kani bɔ, galaninŋaai a nu nwunuɠaa di pənə, di hilɛ həɠə, di lon gaa, di di wɔ pɛlɛ́i laahɔnmo, di hvo pa nəi pələ tɛɛ gu yowoɠaa di wɔ laa pu ɉu pɔ.

¹⁵ Mąąhɔlɔɓo, daɠaa daa həɠə tɛ̨ą pələ mɛ̨i daa hvilɛn ɓilihi pulu.

¹⁶ Galanin a kɛ laa na nɛ̨ɛ̨nu ta ŋą nuą lɔwai, ə mąąkpɔnmąą ɓo, mąą hvo nɛ̨ɛ̨li, mąą mɛ̨nį hvo kɛ galan gbɔn nwuɔ̨; yili ɓə a gɛ, gbɔn ə pɛli kpɔnmąą tɛɛi galanin neeleeɠaa pɔ.

Nu pɔlɔɠaa

¹⁷ Nu pɔlɔɠaai da di wɔɔ mąą tíi kɛ a nɛlɛɛ, di mąąnɛ̨ɛ̨i, di di hvɛla kulɔ gee hu hveelɛ, gəlee ə mą kɛ, diɛi da tɔɔ a di nwąnąi Yálá laa woo laa həli mɛ̨nį ɓa, ɛlɛɛ, diɛ nuą mąąkwɛli mą.

¹⁸ Ɉɛɓɛ́ kaa moi yɛ: «Nįŋɛ̨ a kɛli ə́ wɔ mɔ̨nun dan, hvó kwɛli too na.» Yɛ nwɔ̨nɔ̨ mą: «Kóló kɛmun mąąnɛ̨ɛ̨ di vɛla kulɔ.»

¹⁹ Da nu pɔlɔ ta kalamąɓo yɛ́, hvó humo a ə́ haŋąą mą, akɛ kɛla hveelɛ ɉaaɓa woo hvəə.

²⁰ Nuąi da nɛ̨ŋɛ̨n ɉəɠə, 'háŋą diɛ nu kəlee ɲɛ̨i ɓa, ə gɛ, di ɓɛlaa di ɲɔw.

²¹ Mɛ̨nįi gáá ə́ tíi la a nwą́nąi Yálá ɲɛ̨i ɓa, Jesus Kristə ɲɛ̨i ɓa, da malakaɠaa, ya ɓaa: 'Ə́ kili lɛɛ niɛwooɠaa tii hu a nwalawala laa, 'hvó huyɛɠɛɓo kɛ, hvo da kulɔ ɉu, nu ta mąą mɛ̨nį ɓa.

²² 'Hvó humo a ə́ yee pɛlɛɛ nu mɛ̨i ɉa, 'hvó ə́ yee too nu ta ŋą nɛ̨ŋɛ̨n ɉu, 'ə́ kpɔwɔ laahɔnmo mąąhəɠə laa hu.

²³ 'Hvó kąnąn nɔ yákpɛli-kpɛli kpəlɛɛ ɓa, 'kɛ́ lɔɔ tawolo kpələi ə́ koloon ɉu ɲɔ̨n ti mąą mɛ̨nį ɓa, da hvįikpɛɛ laai a həli yɛ́ kɛlɛ-kɛlɛ.

²⁴ Nɛŋɛ̨n daɠaa kaa laa, nu a ɉəɠə, da gaa ɉa; kɛlaa, daɠaa diɛn, nu hva gaa ɉa, hvo kɛli ɉu a kwɛa.

²⁵ Mɛ̨nį lɛlɛɛɠaa di wɛi kaa lɔ tii, da gaa lɔ ɲąąɓa; ə mą kɛ, yii nu hva gaa ɲąąɓa, diɛ kpɛli, di hva lɛɛ di loo pələi.