Timote dɔlɔɔ 3 - Yálá laawoo hɛɓɛ

Gbɔn ɲɛ̨itɔwɔ nuą

¹ Nwoo ŋɛ̨i kaa a tɛ̨ą, mąąnɛ̨ɛ̨i nuą di laa na, ya ɓaa: «Nui a kɛ bɔ ə kɛ a gbɔn ɲɛ̨itɔwɔmun, kólólɛlɛɛ ka tii mąą lii aa too gwəi.»

² Kɛlaa hvo kɛli, gbɔn ɲɛ̨itɔwɔ mun, ə kɛ a nui hɔn və mą, ə ɓo a nɛ̨ą tanɔ̨n nąmu, ɲąąlaa, ɲee pɛliɛ gbɔwɔ ɓa, yɛ gbɔwɔ hon a nɛlɛɛ, ɲɛ̨i ponoɔ, yɛ pɛli nuą mąąkwɛlii,

³ hvo kɛ a lɔɔ kpələmun, hvo kɛ a kpilɛn gɔmun, kɛlaa, nwɔ mɛ̨nį lɛlɛɛ, hvo kɛ a hvaa kɛmun, hvo kɛ a hɛn nwɛlimun.

⁴ Ə kɛ a pɛlɛ́ nąmu lɛlɛɛ, ɲee pɛliɛ nonnii diɛ, di ɓo nwoo mu, nwumɛ̨ mąą laa hu.

⁵ Nui hva pɛli gbɔwɔ pɛlɛ́ ɲąąwooɓoi, a pɛli kani Yálá ŋą kpɔn ɲąąkɔn ɉii ləi?

⁶ Hvo kɛ a nui aa lɔ kalan ɉu a nįnɛ̨, əgɛ, ɲɛ̨ihvalai di naa nąnį tɔwɔ, kpɔwɔ ɲąąkɛnɛ̨ laa hvo ɲɛ̨i wolo, hvo too ɉu.

⁷ Hvo kɛli nwɔ̨nɔ̨, yɛnɛ̨ɛ̨ nuą diɛ dɛnɛ̨ a nɛlɛɛ, əgɛ, hvo pa too nwumɛ̨ mɛ̨nį hu, nąnį nwɔ hɛlɛn ŋą.

Gbɔn ɉu mɛ̨nį ɲɛ̨i kulɔ nuą

⁸ Gbɔn ɉu mɛ̨nį ɲɛ̨i kulɔ nuą diɛ kpɛli, mąąnɛ̨ɛ̨ di kɛ a nu mąąwiaɠaa, diɛ kulɔ di woo ɓa, di hvo di kpɔwɔ tɛɛ lɔɔ pɔ, ə mą kɛ, nwumɛ̨ hɛn gwɛliɛ.

⁹ Mąąnɛ̨ɛ̨ di kanąn laa na laa ŋą tɛ̨ą ɓa a kili lɛlɛɛ.

¹⁰ Diɛ kpɛlimąn, mąąnɛ̨ɛ̨i di di mąąkpɛɛ, yili pulu, akɛ hɔn da hvo diɛ, da pɛli di kɛ a gbɔn ɉu mɛ̨nįɠaa ɲɛ̨i kulɔ nuą.

¹¹ Nɛ̨ąąi da kɛ a gbɔn ɉu mɛ̨nįɠaa ɲɛ̨i kulɔ nɛ̨ąą diɛ kpɛlimąn, mąąnɛ̨ɛ̨i di kɛ a nu mąąwiaɠaa, di hvo kɛ a laa pələɓo kɛ nuą, di ɲąąlaa, diɛ kulɔ di woo ɓa mɛ̨nį kəlee hu.

¹² Gbɔn ɉu mɛ̨nį ɲɛ̨i kulɔ nuą, di nɛ̨ąni di kɛ tɛitɛi, di pɛliɛ di lonnii ɲąąwooɓoi da di wɔɔ pɛlɛ́ɠaa.

¹³ Mąąhɔlɔɓo, nuąi gbɔn ɉu mɛ̨nį ɲɛ̨i kulɔ mɛ̨nį kaa di nwuɔ̨, daa kóló lɛlɛɛ həɠə ɉu, di kilitɔɔmąą laa kɔwɔ hvilɛnŋąą laa na laa mɛ̨i Jesus Kristə hu.

Mɛ̨nį loɔi Yálá mɛ̨nį hu

¹⁴ Gáá ɉɛɓɛ́i ŋɛ̨i tɛɛi yɛ́, náái na, gɛ́ gáá pai ə́ pɔɔli, ɉu hvo kwɛa li.

¹⁵ Kɛlaa, ə mą kɛ və́ pa li ɉa, bələi mąąnɛ̨ɛ̨ ə́ túwɔ́ la Yálá ŋą pɛlɛ́i mu, yáá bələ kɔlɔn, yai a Yálá hvúlúmąą ŋą kpɔn, a tɛ̨ą hąątíliin da tɔɔbulu.

¹⁶ A tɛ̨ą mɛ̨nį loɔi Yálá mɛ̨nį hu, gɛnɛ̨i. Mɛ̨nį loɔi tii ɓaa: Yálá ə gbɔwɔ lɛ nu kɔlɔ hu, Nįį-Mąąhəɠɛɛ ə mąą mɛ̨ni too pono ɲą, malakaɠaa di gaa, mąą mɛ̨nį laa ə həli huwu takpɛliɠaa diɛ, yɛnɛ̨ɛ̨ kəlee ə laa na, Ə tɛ yələkɔlɔn ɉu mąąwiɛlaa kɛnɛ̨ɛ̨ hu.