Tɛsalonikə dɔlɔɔ 3 - Yálá laawoo hɛɓɛ

¹ Yii kɛa, hvo kɛ a ku yee bɛli mąą mɛ̨nį, ku ku kiliŋąhiɛ kuɔ, nɛlɛɛ ɓaa, ku lɛɛ Atɛnə kuɔ tɔ̨nɔ̨,

² ɛlɛɛ, ku gu nąn non Timote tɔɔ ká pɔɔli, yai a Yálá ŋą tímun Kristə nwɔ wɛlɛɛ lɛlɛɛ laa həliɛ hu, ə pa, ə ká hvaŋąlɔ, ɛlɛɛ, ə ká liikpələ ká wɔɔ laa na laa hu,

³ əgɛ, nu ta hu hvo pa pu mą, háákələi mɔ̨nɔ̨ɠaa ŋɛ̨i hu, gbala ə tɔɔ, ká kili kaa ɉu káá, yili ɓə naa gu tɔwɔ.

⁴ Ɓɛlɔwai ku kɛ la ka pɔɔli, ku gbɛa mo káá kuɔ káá, hvo kɛli gu mɔ̨nɔ̨ mįi, ɛlɛɛ yaan, ɲələ ka aa həli, ká kili kaa tii yili hu.

⁵ Yɛ bələi vá pɛli kɛ níikpələ la, və́ nąą mąąkpɔn, ŋą́ nu tɔɔ ə pa ə ká wɔ laa na laa mąą wɛlɛɛ həɠə, ə paa la, ŋį́ kɛli ɲɔw, gɛ́ kɛ, ɲąąhɛn kɛmun hvo pa ká ɲąąhɛn, mɔ̨nɔ̨i ku mįi, hvo pa lɛɛ a kpɛli.

⁶ Yiihu kɛa, Timote aa həɠə ká pɔɔli aa pa, ɛlɛɛ, aa ká wɔ laa na laa da ká wɔɔ wɛlikɛmąą laa mąą mɛ̨nį hukulɔ kuɔ, yɛ kuɔ, ku nąą kili lɛlɛɛ kaa ká ɲą, ɛlɛɛ, ku kaa wɛli kaa ká hon ɉii, yɛ bələi lɔ kuɔ kpɛli ká kaa wɛli kaa ku ho ɉii la.

⁷ Yili ɓa tii, ną́n nonnii, kwaa liilaa hɔlɔɓo ká mąą mɛ̨nį hu, ku wɔɔ liihɛlɛnŋaa da ku wɔɔ mɔ̨nɔ̨ɠaa hu, ká wɔ laa na laa háálai.

⁸ Ɛlɛɛ, yiihu kɛa, ku kaa yɛnɛ̨ɛ̨ kɛi, mąąhɔlɔɓo, káá tɔɔ kpąą ku Nąmu hu.

⁹ Bələi kpɔ kwa pɛli ku Yálá mąmąɓo la ká mąą mɛ̨nį hu, ku hvo kpɔ bələ kɔ́lɔn; mąąhɔlɔɓo, káá ku kwəinɛ̨ɛ̨ kɛnɛ̨ ku wɔɔ Yálái ɲɛ̨i ɓa.

¹⁰ Kpini pɛlɛɛ hvóló ɓa, kwa Yálá hvɛli a hɔlɔmąą laa, kuɔ ku pɛli ku ɲɛ̨i tɔɔi káá, ɛlɛɛ, ku ká wɔ laa na laa laa kulɔ.

¹¹ Yálá kpinįi, gu Ną́n, ɛlɛɛ, gu Ną́mu Jesus di pələ kulɔ a kuɔ, ku pa ká pɔ.

¹² Nwɛlikɛmąąlai gaa ká yəi ká keeni mąą mɛ̨nį ɓa, gu Nąmu ə gɛ, ɉu ə kɛnɛ̨, ɉu ə ɓɔlɔ, nu takpɛliɠaa mąą mɛ̨nį ɓa, kpɔlɔɔ yɛ bələi kwaa ká wɛlila kɛ la.

¹³ Ə ká nii huwalawala lɔ tii mąąhəɠəlaa hu, mąąkulɔi hvo kɛ mą Yálá gu Nąn ɲɛ̨i ɓa, a gu Ną́mu Jesus pa yələ, da nu mąąhəɠɛɛɠaa kəlee.