Samuɛlə dɔlɔɔ 4 - Yálá laawoo hɛɓɛ

¹ Samuɛlə yaan, nwoo ə kɛi həli Israɛlə nuą kəlee diɛ. Israɛlə nuą di kulɔ diɛ li kɔ́ pɛlɛi Filisti nuą diɛ. Di di wɔ kɔlaɠai pɛlɛ Ɛvɛn-Ezɛrə kwɛlɛ; Filisti nuą di tɔɔ Afɛkə.

Kɔ́ ə kala Israɛlə nuą diɛ

² Filisti nuą di tɔɔ Israɛlə nuą tɔwɔ, gɔ́ ə kpɔlu, Filisti nuą yee ə tɛɛ Israɛlə nuą diɛ, di nu waa nąąn ɲɔ̨nwɔ̨mąn baa ɲɛɛ kɔwɔ hu.

³ Nuą di pənə də li di pulu, Israɛlə kalanɉonŋaa diɛ kɛ diɛ: «Lə ɓə kɛ yaai, Yai-Laa ə ku lɛɛ laa, Filisti nuą yee yɛ tɛɛ kuɔ? Ka gwə li gu Yai-Laa nwɔ mįnɛ̨ kəhii həɠə Silo, ə kɛ gu lɔwai, a kɛ tii, a gu kulɔ gu yowowɠaa yəi.»

⁴ Nɔi lonnii di nuą tɔɔ Silo də li di pa a Yai-Laa Mɛ̨nį Kəlee ŋą Hééɓomun nwɔ mįnɛ̨ kəhi, ə ɓo heeni, mąąkpɛ malakaɠaa nwun mɛ̨i, nwɔ mįnɛ̨ kəhii kwɛlɛ, Eli lonnii hveelɛi: Hɔfni da Pinasə di kɛ Yálá nwɔ mįnɛ̨ kəhii kwɛlɛ.

⁵ Pai tii di mo a Yai-Laa nwɔ mįnɛ̨ kəhii ɓɛi gɔ́ ə kɛ laa, Israɛlə nuą di tomą a kwəinɛ̨ɛ̨ a di woo kɛnɛ̨, lɔi yɛ kpɛlin.

⁶ Filisti nuą di di domą woo tii mɛ̨n, diɛ mą: «Lə tomą ɓə Hebreuɠaa kaa moi?» Di kili ə pu ɉu diɛ kɛ, Yai-Laa nwɔ mįnɛ̨ kəhii ka tii a pa di lɔwai,

⁷ Filisti nuą di ɲɔw diɛ kɛ: «Yálá ta aa pa di lɔwai!» Di woo laa diɛ: «Kwaa lɛɛ ɉu! Mąąhɔlɔɓo, di kɛ pələ hvo kɛli ŋɛ̨i hiɛ!

⁸ Ku lɛɛ li ɉu, gbɛɛ ɓə pai ku kulɔi Ɲálá hvaŋą kɛnɛ̨i tii yəi? Ɲálái tii ɓə mɛ̨nį ɲąąnwąnąą huwui gəle laa Eziptə nuą diɛ nɔi pun ɉu.»

⁹ Kɛlaa, di ɓɛlaa taɠaa di kɛi kɛ diɛ: «Ka gu gu liikpələ, gu gɛ a hulɔnulaa, gu kɔ́ pɛlɛ diɛ, a wala kɛ tii, gu kaa pai kɛi a Hebreuɠaa di wɔ luwɔɠaa yɛ bələi diɛi tii di kɛ la a guɔ luwɔɠaa. Ka tɔɔ a hinąą tɔɔ pələ, ka gu gɔ́ yili ɲą.»

¹⁰ Filisti nuą di gɔ́ yili ŋą, gɔ́ ə kpɔli kpɔ, gɔ́ ə kala Israɛlə nuą diɛ kpɔ kɛnɛ̨, di pu, nu kəlee ə li bɔɔli, volói tii kɔ́kuláá nu waa pow haaɓa, di haa Israɛlə nuą lɔwai.

¹¹ Di Yálá nwɔ mįnɛ̨ kəhii həɠə, ə pɛlɛ la, Eli lon ɉinąą hveelɛi: Hɔfni da Pinasə diɛ, di lɛɛ gɔ́ hu.

Eli haa bələ ka

¹² Bɛnɉamɛn mun da ə həɠə gɔ́ mɛ̨i, ə pa a gilɛ Silo a mąą yələi tii lɔ, mąą həɠəɠaa huɓɛla-ɓɛlaa, pɔlɔ kɔɔ nwuɔ̨.

¹³ Pai ə mo, Eli ə kɛ heeni ɲəi kpəlin ɉu, ɲɛ̨i heɛ bələ pɔ pələ, mąąhɔlɔɓo, Yálá nwɔ mįnɛ̨ kəhii tii mąą liihɛlɛn ə kɛ mą. Ɉulɔnui tii ə pa ə nwɛlɛɛ ɓo taai, daa nąą kəlee ə bu mą a wɔlɔ.

¹⁴ Eli ə nuą tomą woo mɛ̨n, yɛ diɛ: «Lə ɓə kɛ yaai nuą kaa tomąi a wɔlɔ?» Ɉulɔnui tii ə pa ə nwɛlɛɛ ɓo Eli ɓa.

¹⁵ Eli kaa kwɛlan ə kɛ a kwɛlan bow mɛ̨inąąn kɔ́w mɛ̨ihaaɓa, ɲɛ̨i kwəleen ɉeɛ lɔ kɛ, hvo kɛi kɛɛ mąąkpɛɛ.

¹⁶ Ɉulɔnui tii yɛ Eli ɓa: «Gɛ́ɛ́ kpɔlɔɔ həɠəi gɔ́ mɛ̨i ka, háákələi lɔ ɓə ŋą́ pu la gɛ́ pa.» Eli yɛ mą: «Gɛ pələ kaa ləi nón?»

¹⁷ Nwɛlɛɛ ɓomun yɛ mą: «Israɛlə nuą daa pu Filisti nuą tɔwɔ, nɔi nuą tamąą daa lɛɛ gɔ́ hu, ə́ lon ɉinąą hveelɛi: Hɔfni da Pinasə di lɛɛ gɔ́ hu, ɛlɛɛ, di Yálá nwɔ mįnɛ̨ kəhii hon.»

¹⁸ Ɉulɔnui tii ə Yálá nwɔ kəhii mąą mɛ̨nį ɓo lɔ-o, Eli ə kulɔ gbəlin ɉu ə too gbowo ɓa pələ, ə gbowo wolo, ə haa. Mąąhɔlɔɓo, bɔlɔɔi kɛ, ɛlɛɛ, nwiaa. Eli ə Israɛlə lɔi ɲąąwooɓo kwɛlan bow nąąn ɲee mu.

¹⁹ Eli lon Pinasə nɛ̨ą ə kɛ a koo nɛ̨ą, goo pɔlɔɔ kɛa kɛ. Yálá nwɔ kəhii hon mɛ̨nį, ɉilɛ nąn ɉaa mɛ̨nį da ɉilɛ haa mɛ̨nį mɛ̨n ə mo, ə mąą pɛlɛ, kwəi nwąną ə ɉon kpɔlɔɔ tii ɲąąɓa, ə naayɛɛ.

²⁰ Gɛɛ ɉaa lii tɛi, nɛ̨ɛ̨goloɠaa ŋɛ̨i kɛ gwɛlɛ, di mo mą, diɛ mą: «Ə́ liilaa, yáá lon ɉulɔnu kaa!» Hvo kpɛli di woo pulu pənə, gili kpɛli hvo kɛ laa pələ.

²¹ Ə nokolo laa hee a: Ikavɔdə, mukulaa ɓaa: «Mąąwiɛ aa kulɔ Israɛlə lɔi hu», mąąhɔlɔɓo, ə kɛi yili ɓo, yɛ hvilɛn na Yálá nwɔ kəhii hon mɛ̨nį ɓa, da ɉilɛ ɛlɛɛ ɉilɛ nąn di haa mɛ̨nį ɓa.

²² Ə kɛ diɛ: «Mąąwiɛ aa kulɔ Israɛlə lɔi hu», mąąhɔlɔɓo, daa kɛ Yálá nwɔ kəhii hon.