Samuɛlə dɔlɔɔ 3 - Yálá laawoo hɛɓɛYálá ə Samuɛlə təli 1 Nokolo Samuɛlə yee ə kɛ Yai-Laa nwɔ kólói ɓa, Eli yee mu. Yai-Laa hvo kɛi hvaa kɛlɛ-kɛlɛ nuą pɔ, ə lɛɛ hvo kɛi gbɔwɔ lɛ nuą diɛ nąąlɔwai. 2 Yələ ta, Eli ə kɛ laani ɓɛi ə kɛi laa a bɔlɔ; ɲɛ̨i hvo kɛi kɛa kɛɛ mąąkpɛɛ dədən, hvo kɛi pɛli hɛn ta mąąkpɛɛi. 3 Yálá nwɔ nwɔ̨n hvo ni kɛ luwun ni, ə lɛɛ, Samuɛlə ə kɛ laani Yai-Laa hee pɛlɛ́ mu ɓɛi mįnɛ̨ kəhi ə kɛ laa. 4 Nąąlɔwai, Yai-Laa ə Samuɛlə təli, Samuɛlə yɛ mą: «Ɲą́ą́ ka!» 5 Ə muhəɠə, ə li Eli pɔ, yɛ mą: «Də́lii ə́ mo, ŋą́ą́ pa!» Yili yɛ mą: «Və́ ə́ təli li, pənə ə́ li ə́ laa.» 6 Yai-Laa ə pənə nwɔ̨nɔ̨ ə Samuɛlə təli, Samuɛlə ə muhəɠə ə li Eli pɔ, yɛ mą: «Də́lii ə mo, ŋą́ą́ pa.» Yili ə nwoo pulu pənə yɛ mą: «Və́ ə́ tə li li nón, pənə ə́ li ə́ laa.» 7 Samuɛlə hvo nii kɛ Yai-Laa kɔ́lɔn, ə lɛɛ Yai-Lawoo hvo nii kɛ həli li mą. 8 Yai-Laa ə Samuɛlə təli a ɉaaɓa naa, ə muhəɠə ə li Eli pɔ yɛ mą: «Ɲą́ą́ ka, hvo gaai yaa nwɔ̨nɔ̨ də́li!» Eli ə gbaɠala kaa kɛa nąąlɔwai, yɛ Yai-Laa ka tii nokoloi təli. 9 Eli yɛ Samuɛlə ɓa: A pənə a ə́ təli, yá kɛ mą: «Yai-Laa, yii yɛ́ ə́ mo mą́ą́, mo ə́ wɔɔ luwɔ hilɛ wəli tɔɔi.» Samuɛlə ə pənə ə li ə laa. 10 Yai-Laa ə pa, ə tɔɔ Samuɛlə lííla, ə dəli yɛ bələi ə kɛi yiiɠaa tii kɛ la, yɛ mą: «Samuɛlə! Samuɛlə!» Samuɛlə yɛ mą: «Ną́mu, yii yɛ́ mo mą́ą́, mo; yɛ́ luwɔ hilɛ wəli tɔɔi.» 11 Yai-Laa yɛ Samuɛlə ɓa: «Gáá pai mɛ̨nį ta laai Israɛlə lɔi ɓa, nui lɔpee pai bələ mɛ̨n ɉii, hvo kɛ li nii a ɓɛla ma. 12 Mąą yələ, mɛ̨nįɠaai kpɔ ŋą́ mo yɛ hvilɛn Eli nwɔ pɛlɛ́i ɓa, ŋą́ gəlee pɔ mɛ̨nį kɛ, da hva lɛɛ pulu. 13 Ŋą́ mo mą, gɛ́ mą: Nwɔ pɛlɛ́i kiti tee hiɛ li, nwun na ə pili a yələ kəlee; dúwɔ́ hɔn mąą mɛ̨nį ɓa. Mąąhɔlɔɓo, gili ə kɛ ɉu yɛ kɛ non ɉinąą kaa Yálá ɓɛlɛ too mɛ̨nį kɛi, yaan hvo di hutɔɔ. 14 Yili mąą mɛ̨nį ɓə ŋą́ gwɛla la Eli nwɔ pɛlɛ́i ɓa, hɛn lɔpee ta hvo pai pɛlii Eli nwɔ nuą di wɔ nɛ̨ŋɛ̨n hu pui; ə kɛ a haláá, ə kɛ a mɛ̨inɛ̨ɛ̨ kpɛli-kpɛli.» 15 Samuɛlə ə lɛɛ laani, ə lɛɛ ɉu yələ ə ɓɔ. Yili pulu ə li ə Yai-Laa nwɔ pɛlɛ́i laa ɓo. Ə kɛi ɲɔw mɛ̨nįi ə gaa ɉukulɔi Eli ɓa. 16 Eli ə Samuɛlə təli, yɛ mą: «Nón Samuɛlə!» Samuɛlə yɛ mą: «Nán, ŋą́ą́ ka!» 17 Eli yɛ mą: «Lə mɛ̨nį ɓə ə mo yɛ́, hvo ɲɔw mą́ą́, nɛ̨ɛ̨ yɛ́ mɛ̨nįɠaai Yálá ə mo yɛ, Yá wala gəlee hukulɔ mą́ą́, yá dɔ̨nɔ̨ kpɛli lɛɛ pulu, Yálá ə mɛ̨nį huwu lɔpee gəlee laa yɛ́.» 18 Samuɛlə ə mɛ̨nįɠaai tii kəlee hukulɔ mą, hvə da loo ma. Eli yɛ mą: «Ya ɓə a Yai-Laa, yii a nɛ̨ɛ̨ mą, ə gɛ.» 19 Samuɛlə ə kɛi kɛnɛ̨, Yai-Laa ə kɛ bɔ, wooi kpɔ ə kɛi ɉəɠə Yálá la yɛ mo, gəlee laa ə kɛi hon. 20 Israɛlə nuą kəlee di gili kɔ́lɔn diɛ Samuɛlə kaa a Yai-Laa kwəi mɛ̨nį hukulɔ mun neelee, ə həɠə nɔi wəlin na Dan, ə həli nɔi wəlin na ɓɛ li pələ Beɛrə-Seva ɓa. 21 Yai-Laa ə kɛi lɔ nii gbɔwɔ lɛ Silo daai, mąąhɔlɔɓo, Silo ɓə ə kɛi gbɔwɔ lɛ laa Samuɛlə ɓa. |