Samuɛlə dɔlɔɔ 1 - Yálá laawoo hɛɓɛSamuɛlə kaa mɛ̨nį da nokolo yələ 1 Hulɔnu ta ə kɛ Ramataimə-Sofimə daai Ɛfraimə yee ɓa, diɛ kɛ naa ɓaa Ɛlkana, nąn naa ɓaa kɛ a Yerohamə yili nwɔ nąn ɓaa kɛ Elihu, Tohu lon, Sufə lon, Ɛfrata mun da. 2 Ɛlkana nɛ̨ąni di kɛ hveelɛ, dɔ̨nɔ̨ laa ɓaa kɛ Anə, veelɛnąą laa ɓaa kɛ Penina. Penina lonnii di kɛ laa, kɛlaa Anə nwɛi, lon və kɛ mą. 3 Kwɛlan ɉəli pələ kəlee, Ɛlkana ə kɛi həɓə bɔ taai yɛ li Silo daai, əgɛ, ə kwɛli hvilɛn Mɛ̨nį Kəlee ŋą Hééɓomun Yai-Laa ɓa, ə haláá kulɔ mą. Nuąi kɛ laa a Yai-Laa nwɔ haláá laa həli nuą, diɛ ɓaa; Eli lon ɉinąą hveelɛi; Hɔfni da Pinasə. 4 Ɲeləi Ɛlkana ə kɛi nwɔ haláái kulɔ la, ɲələ ə ɉəli. Bɔlɔ pɔlɔ hu, ə kɛi nɛ̨ą Penina nwɛi tɛɛ bɔ da nonnii, ɉinąą mąn nɛ̨ą mąn. 5 Kɛlaa, ə kɛi Anə nwɛi kɛ a ɉeei tɔ̨nɔ̨, yɛ mɛlɛ lɔ ɉu, mąąhɔlɔɓo nwɛli ə kɛ mą. Bələi mąn, Yai-Laa aa kɛ Anə kɛ la a kpomąnɛ̨ą. 6 Kɛi ə mo tii dɔwɔi ə kɛi lɔ nwoo həɓə mą, a nwumɛ̨ tɛ pələ mą, mąąhɔlɔɓo, Yai-Laa aa kɛ gɛ a kpomąnɛ̨ą. 7 Bələ ɓə Ɛlkana ə kɛi gɛ la a kwɛlan gəlee di li pələ tɛitɛi Yai-Laa hvɛli pɛlɛ́ mu. Penina ə kɛi kpɔlɔ nwoo həɓə Anə ɓa. Anə ə tɔɔ kɛa yɛ wɔlɔ, ə lənə kɔ̨nɔ̨n ma. 8 Ɉilɛ Ɛlkana yɛ mą: «Anə, lə mɛ̨nį ɓa ə́ kaa wɔlɔi? Yɛ lənə la kɔ̨nɔ̨n ma? Lə mɛ̨nį ɓa ə́ lii ɲąąnwąnąąi? Ŋą́ kɛ ə́ yəi, viɛla hvo ɓo li lon ɉinąą pow ɓa?» 9 Kpɛɛi di mo a kɔ̨nɔ̨n mįi, di di kpələ Silo, Anə ə muhəɠə, ɉaláá laa həli mun Eli ə kɛ heeni Yai-Laa hee pɛlɛ́ laaləi ɲəi gbəlin ɉu, dunwɔ̨n ŋąą. 10 Anə ə Yai-Laa hvɛli a liikələn gwəi, yɛ wɔlɔ kpɔ a mąąwɛliɛ. 11 Ə nwoo kwɛlɛ yɛ diɛ: «Ee kə Yai-Laa Mɛ̨nį Kəlee ŋą Hééɓomun! Yɛ́i ə́ yee a pɛli mɛ̨nį kəlee ɓa, a laa a ə́ lii, ə́ ə́ ɲɛ̨i pili ə́ wɔ luwɔ nɛ̨ą nwɔ mɔ̨nɔ̨i mɛ̨i, ə́ ə́ kiliŋąhiɛ mą, yá lon ɉulɔnu tɛɛ bɔ́, ŋą́ tinɛ̨n ŋą́ dɛɛ Yai-Laa pɔ, nwɔ yɛnɛ̨ɛ̨ kəlee yee mu, nwun bu kwɛli hva tɛɛ nwuɔ̨.» 12 Vɛli ɓo hu kwɛai tii ə kɛi gɛ Yai-Laa ɲɛ̨i ɓa, Eli ɲɛ̨i heɛ kɛ naaləi, 13 Anə ə kɛi mɛ̨nį ɓo gwəi pələ, naawulun nɔ ɓə kɛi tumo, di hvo kɛi nwoo mɛ̨n. Ə kɛ Eli kwəi yɛ kɛ lɔɔ aa ɉon. 14 Eli yɛ mą: «Ə kaa pai lɛɛi lɔɔ hon naa hu a ɉu kwɛa? Li ə́ ə́ wɔ lɔɔ hon naai kɛ pələ takpɛli.» 15 Anə yɛ mą: «Nwɔ́ mɛ̨nį nąmu, və́ ɓaa wəlii kpɔlɔ mun, nɛ̨ɛ̨nu mąąwɛliɛ ɓaa a ɲą́ą́, və́ lɔɔ kpələ li, da hɛn a nu kɛlɛ. Gwə́i pili mąą mɛ̨nį ɓə gáá moi Yai-Laa ɓa. 16 Hvo ə́ wɔ luwɔ nɛ̨ą kaa yɛ túwɔ́ pələ ɲɔ̨n gulɔ nɛ̨ɛ̨nu, nwɔ́ mɔ̨nɔ̨ kɛnɛ̨ pələ da nwɔ́ lii kələn gwəi ka tii aa gɛ ŋą́ą́ lamun hvaai.» 17 Eli yɛ mą: «Lí a ə́ liilaa yɛ, yii ə́ vɛli Israɛlə nwɔ Yálá ɓa, ə dɛɛ ə́ pɔ.» 18 Anə yɛ mą: «Yálá ə hvaa mą, ə́ nwɔ luwɔ nɛ̨ą ə́ ə́ lii hon.» Anə ə li, ə kɔ̨nɔ̨n mįi, ɲɛ̨ilai kɛ pələ ə ɓo a dee. 19 Mąą yələ laaɓoɔ, di di muhəɠə yələwala pinɛ̨ɛ̨, di pɛlɛ Yai-Laa lííla, yili pulu, di pənə dəli di pɔɔli Rama. Ɛlkana da nɛ̨ą Anə di lɔ pɛlɛ́n, Yai-Laa ə gili lɛɛ ɉu. Di Samuɛlə kaa 20 Anə ə koo həɠə, naayɛɛ lɔwai həliɛ, ə naayɛɛ a lon ɉulɔnu ə naa hee a Samuɛlə, mąąhɔlɔɓo, ŋą́ vɛli Yai-Laa ɓa. 21 Ɉilɛ Ɛlkana da ɲəi bɛlɛ́n nuą də li, ə gɛ, di haláá kulɔ Yai-Laa ɓa, a haláá yii di kɛi gulɔ kwɛlan gəlee yee mu; nwooi ə mo ə bɔ mɛ̨nį kɛ. 22 Kɛlaa, Anə hvo li, mąąhɔlɔɓo, ə mo ɉilɛ ɓa, yɛ mą: «Gu nąą mąąkpɔn, di nokolo laa kulɔ ɲįnį ɓa, nąąlɔwai, kwa yaa kwali di naa həli Yai-Laa ɓa, ə lɛɛ kɛa laa a yələ kəlee.» 23 Ɉilɛ Ɛlkana yɛ mą: «Gɛ yɛ bələi tii ə́ mo la, lɛɛ ɓɛ, ə lɛɛ la ɉu é naa kulɔ ɲįnį ɓa.» 24 Yii kɛa ə naa kulɔ ɲįnį ɓa, ə ɉəɠə ə bɛlɛ kwɛlan ɉaaɓa nįŋɛ̨ hilɛ tɔ̨nɔ̨ ɓa, da lɛɠɛ hunwɔ̨ gəgən ɉu tɔ̨nɔ̨ ɓa, da lɔɔyá ləɠi tɔ̨nɔ̨, ə nokoloi lɔ Yai-Laa hee pɛlɛ́ mu ə kɛ laa a naa tíɓo kɛ mun da. 25 Di nįŋɛ̨ hilɛ kulɔ a haláá, di nokolo tɛɛ Eli pɔ. 26 Anə yɛ Eli ɓa: «Nwɔ́ mɛ̨nį nąmu, ə́ nwun di báá nɛ̨ɛ̨nui tii ta kɛ ɓɛ, a yələ ta yɛ Yai-Laa hvɛli, kpɔɔlɔɔ gɛɛnąą ŋɛ̨i ɓa, ə́ kili kaa ɉu? Nwɔ mɛ̨nį nąmu, ə hvulú mąą ə lɛɛ, ɲą́ą́ ka tii kɛ. 27 Nokoloi ŋɛ̨i ɓə ŋą́ kɛi vɛli Yai-Laa ɓa, yaan, yii ŋą́ vɛli mą. Ə dɛɛ bɔ́. 28 Ɲą́ą́n gáá pənəi ŋą́ dɛɛ Yai-Laa pɔ, ə lɛɛ Yai-Laa yəi a yələ kəlee mɛ̨nį.» Anə ə pɛlɛ niiɓa ə kwɛli hvilɛn Yai-Laa ɓa. |