Piɛrə dɔlɔɔ 2 - Yálá laawoo hɛɓɛ

¹ 'Ká ká yee kulɔ kani nwąnąlɔɔ mɛ̨nį kəlee hu, gbąną mɛ̨nį kəlee, lɛɛ mɛ̨nį kəlee, hɛn nwɛli laa da laa pələ ɓo.

² 'Ká ɲįnįyá mąąhəɠɛɛ mąą wɔlɔ ɓo, yɛ lon gaa nįnɛ̨ɠaa, yai a Yálá laa woo, əgɛ, yaa ɉáálai, káá kɛnɛ̨ la ɓalo mɛ̨nį hu,

³ yii kani, káá gu Nąmu mąą mɛ̨nį kɔɔn, káá nɛlɛi kaa.

Gbɔn gɔwɔ hvilɛn ɉii, da nwɔ mąątíi

⁴ 'Ká ká mąąlɛɠɛ mą, yai a gwɛnį hvulúmąą, ya ɓə nu kanŋaa di bili, kɛlaa, ya ɓə Yálá ə ɉəɠə ɉu, ɛlɛɛ, mąą mɛ̨nį nwąnąą ɲɛ̨i ɓa.

⁵ Káá kpɛlimąn, yɛ kwɛnį hvulúmąąɠaa, 'ká lɔ kani bɛlɛ́ tɔɔ mɛ̨nį hu, yai a Nįį hee pɛlɛ́, əgɛ, ká kɛ a haláá laa həli kpɔn mąąhəɠɛɛ, káá Yálá mąąwiɛ haláá laa həli, a háálai Yálá a ɲee hee mu, Jesus Kristə háálai.

⁶ Mąąhɔlɔɓo, bɛ̨ɛ̨i ɉɛɓɛ́ hu, diɛ kɛ: «Gáá pai pɛlɛ́ kɔ́wɔ hvilɛn gwɛni laai Siɔn, a kwɛnii daa ɉəɠə ɉu, mąą mɛ̨nį nwąnąą, ɛlɛɛ, nui a gilitɔɔmą, gwəi hva pili mą.»

⁷ Káái ɓaa laa na nuą, ɓɛlɛlaa li káá, kɛlaa, kili walawala nuą di wɛi, gwɛnii bɛlɛ́ tɔɔ nuą di lənə ma, aa kɛ a bɛlɛ́ kɔ́wɔ hvilɛn gwɛni leelee,

⁸ gaa nwɔ̨nɔ̨ a nu kɔwɔ tuwɔ kwɛnį, a kwɛni kpuwui a nu too. Da di kɔ́wɔ tuwɔi mą, mąąhɔlɔɓo, di hvo gɛ li di hvo laa Yálá laa woo la, ɛlɛɛ, yili ɓə kɛ naa di tɔwɔ.

⁹ Kɛlaa, ká wɛi, ká káá a nu huwui ɉəɠɛɛ ɉu, a dɔɔ kwəlii haláá laa həli nuą, a nu huwu mąąhəɠɛɛ, a nuąi a Yálá kwɛlin, əgɛ, nui ŋɛ̨i ká təli, ə ká kulɔ kpinį hu, yɛ pa a káá, ŋą kɛɛ pono lɛlɛɛi ɓa, káá pɛli gɛ-mɛ̨nį kpɛa-kpɛaa nolo ɓoi,

¹⁰ a káái tɔlɔɔ ká hvo kɛ kɛli kɛ a nwɔ nu huwu, kɛlaa yiihu kɛa, káá kɛ a Yálá nwɔ nu huwu; káái ká wɔɔ nąą hvo tɔlɔɔ kɛ ɲɛ̨imąąwɛli kaa hu, kɛlaa yiihu kɛa, aa ká ɲɛ̨imąąwɛli kaa.

Kristalon gɛ pələ hali pulu nuą lɔwai

¹¹ Nwɛ́likɛmąą nuą, gáá ká hvaŋąlɔ, káái yɛ tɛɛ nuą da nwɛ̨ąą, 'ka hvo ká ɲɛ̨i kulɔ yɛnɛ̨ɛ̨ hɛn da pɔ, yai a kɔ́ pɛlɛ nu nįį ɓa.

¹² Ká túwɔ́ pələ ə kɛ a nɛlɛɛ, hali pulu nuą lɔwai, ə mą kpɛli kɛ di kaa ká laamąą hiɛi yɛ tuwɔ pələ ɲɔ̨n gulɔ nuą, ká wɔ tuwɔ pələ lɛlɛɠaa ə di kilaa pono, ɛlɛɛ, diɛ Yálá mąąwiɛ a yələi gaa pai di nąą kaai la.

Kristalɛa di wɔɔ mąątíi

¹³ 'Ká lɛɛ nwun nąmįną kəlee woo mu, gu Nąmu mąą mɛ̨nį ɓa, yɛ ə kɛ a tɔɔmun yai heeɓo laa kaa ɲəi,

¹⁴ yɛ ə kɛ a gbahalanąmą, yai ə ɉee ká nwun na, mɛ̨nį ɲɔ̨n ɉutɔɔ mɛ̨nį ɓa, yɛ mɛ̨nį lɛlɛɛ kɛ nuą mąątɛ̨nɛ̨.

¹⁵ Mąąhɔlɔɓo, Yálá liiɓa ɓaa, ká kɛli mɛ̨nį lɛlɛɛ kɛ, ɓowo nuąi di tɛɠii, káá di kilaa pono.

¹⁶ 'Ká tuwɔ́ yɛ nuąi di kaa di gbɔwɔ ɓa, 'ká hvo nɛɛ gbɔwɔ ɓa laai tii kaa a mɛ̨nįi ká laa ɉu, káá nwąnąlɔɔ túwɔ́ ɓo la, kɛlaa, 'ká túwɔ́ yɛ Yálá ŋą tínuą.

¹⁷ 'Ká nu kəlee ɓɛlɛ kɛ mą, 'ká ká nąn nonnii wɛlilakɛ. 'Ká ɲɔw Yálá ɓa, 'ká tɔɔmun mɛlɛ kɛ mą.

Luwɔɠaa di wɔɔ mąątíi da di nąmįną di lɔwai

¹⁸ Luwɔɠaa, 'ká lɛɛ ká luwɔ nąmįną woo mu, 'ká ɲɔw diɛ, di mą kɛ, yiiɠaa di wɔɔ mɛ̨nį lɛlɛɛ, yiiɠaai di yíila nɛ̨ɛ̨, ə mą nwɔ̨nɔ̨ kɛ, yiiɠaai di yíila walaa.

¹⁹ Mąąhɔlɔɓo, mɛ̨nį lɛlɛɛ ɓaa, nu ə niikpələ hvulu mɔ̨nɔ̨ mu Yálá mąą mɛ̨nį ɓa.

²⁰ Mąąwiɛ laa ləi kpɔ ɓə nu ya ɉɔlɔɓo, akɛ daa kɛli gɛlɛ ɉɔn ɉu? Kɛlaa nu a mɛ̨nį lɛlɛɛ kɛ, diɛ mɔ̨nɔ̨ɓo yɛ niikpələ yili mąą mɛ̨nį ɓa, mɛ̨nį lɛlɛɛ li Yálá ɲɛ̨i ɓa.

²¹ Yaan, yili ɓə di ká təli mą, mąąhɔlɔɓo, Kristə yaa kpɛlimąn, ə mɔ̨nɔ̨ mįi ká mąą mɛ̨nį ɓa, ə kɛ, a ká wɔ yɛnɛ̨ɛ̨ kɛ pələ gɔɔnmąą, káá hvilɛn na bɔɔ ɲą:

²² Yaa tii hvo nɛ̨ŋɛ̨n ɉəɠə li, nu ɓowo woo hvo kulɔ li na,

²³ yai di nalan, hvo gwələ kulɔ li a lalan, mɔ̨nɔ̨i di naa mą, hvo woo ɲɔ̨n mo, kɛlaa, ə gbɔwɔ lɛɛ giti haŋąą tee mun ɲəi;

²⁴ yaa tii ɓə gu wɔɔ nɛ̨ŋɛ̨nŋaa həɠə gbɔwɔ kɔlɔ hu, ə haa la wulu ɓa, əgɛ, gu haai gu mo wɔɔ nɛ̨ŋɛ̨nŋaa diɛ, gu yɛnɛ̨ɛ̨ kɛ tələnmolaa yee kɔnma; yaa tii, mąą nwąnąi di mo, yili ɓə a gu ɓalo.

²⁵ Mąąhɔlɔɓo, ká kəlee ká lanŋąąi kɛ yɛ ɓɛlaaɠaa, kɛlaa yiihu kɛa, káá ká ɲɛ̨i tínɛ̨n ká mɛ̨ikaamun bɔ pələ, yai a ɲɛ̨i kɛ ká nįiɠaa diɛ.