Zooɛ 4 - Yálá laawoo hɛɓɛ (dc)

Yai-Laa kaa pai yɛnɛ̨ɛ̨ kiti teei

¹ Ɲələi tii! Nąąlɔwai tii! Ŋą́ pai pənəi ŋį́ Ɉuda lɔi da Ɉerusalɛmə taa hee gban ŋą.

² Ŋą́ lɔi kəlee ɲąąkpɔn, ŋį́ di yɛɛ Yai-Laa nwɔ kiti tee ɓoloon ɉu. Naa ɓə ŋį́ di kiti tee laa. Nwɔ́ nu huwui a Israɛlə, yaai a gwɛ́lin mąą, mɛ̨nį ɓa. Mąąhɔlɔɓo, di di hu taɠa-taɠa lɔiɠaa lɔwai; di nwɔ́ɔ́ nuąi ɲąąkwɛlɛ.

³ Di nwɔ́ɔ́ nuąi ɲąą kwɛlɛ di kee lɔwai, a kpɛ̨ɛ̨n. Diɛ ɉilɛlɛaa mąąhvalin a wɛli kɛ nɛ̨ą. Diɛ nɛ̨ɛ̨lɛa ya a lɔɔ diɛ gbələ.

⁴ Ɛlɛɛ, kaa ɓaa Tirə da Sidɔn, lə ɓə ka káá gwɛ́lii la? Ɛlɛɛ kaai ɓaa Filisti taaɠaa, kaa ka nwąną kulɔ mą́ą́? Kɛlaa, akɛ ka tunwɔ̨n mą́ą́ nwąną kulɔ mɛ̨nį hu, ŋą́ą́ mąn nwąną kulɔ mɛ̨nį yɛɛ a ka nwun.

⁵ Kaa yiiɠaai nwɔ́ waliɠaa da nwɔ hɛniɠaa həɠə, kaa li la a nwɔ́ hɛn gɔwi mąąwia ka wɔ hali pɛlɛ́ɠaa mu,

⁶ Kaai Ɉuda nɔi nuą da Ɉerusalɛmə nuą lɔwɔ́tɔɔ Yavaan nuą diɛ, Kaa di mąą kwɛa di wɔ lɔi ɓa.

⁷ Kɛlaa, gáá pai di təlii, diɛ həɠə ɓɛɠaa kpɔ ka di lɔwɔ́tɔɔ laa, gɛ́ ka kɛ mɛ̨nį ɲɔ̨nŋąa tii yɛɛ a ka nwun.

⁸ Gáá pai ka lonnii hinąą da ka lonnii nɛ̨ąą lɔwɔ́tɔɔi Ɉuda nɔi nuą diɛ, Diɛ kpɛli diɛ di lɔwɔ́tɔɔ Saba nuą diɛ, diɛi di wɔ lɔi kaa kwɛaa la. Ɲą́ą́ Yai-Laa nwóó li.

Kɔ da kili mɛ̨nį

⁹ Ka noloɓo lɔi nąą kəlee kaa diɛ: «Ka ka kpɔɔ mąąhəɠə gɔ́ kɔ́ mɛ̨nį ɓa, ka gulaaɠaa ɲąąkpɔn, di lɛɠɛ kaa, gulaa kəlee di pa.

¹⁰ Nįŋɛ̨ kaliɠaa yɔwu a kɔ́ kɔ́ ɓɔwaɠaa, ka gala kpɛŋɛn gwɛliɠaa pɛli a kpála. Nui kpɛɠii kaa mą, ə kɛ diɛ: kúlaa ɓaa ɲą́ą́!

¹¹ Ka ka mąą hulɔ ka pa; lɔiɠaa, kaa kpɔ ka tinɛ̨nŋąą kuɔ, ka ka ɲąąkpɔn ɓɛ.» Yai-Laa, ə́ wɔ kulaaɠaa ɲąątɔɔ diɛ.

¹² Lɔi kəlee ə ɲąąkpɔn, di hvilɛn bələ ɓa, diɛ li Yai-Laa nwɔ kiti tee ɓoloon ɉu. Mąąhɔlɔɓo, naa ɓə, ɲą́ą́ Yai-Laa, gáá heei laa gɛ́ lɔi kəlee kiti tee.

¹³ Ka mowa lon ɉəɠə! Mɔ̨nun aa mɔ̨n. Ka pa, ka dan yɛ bələi da viɲə ɓá tan na kɔ́wɔ hu, gbalai tɔɔ di wɔ nwąnąlɔ laa hu kɛnɛ̨i.

¹⁴ Nu kpulu kɛnɛ̨i lono hvo mą Yai-Laa nwɔ kiti tee ɓoloon ɉu. Mąąhɔlɔɓo, Yai-Laa nwɔ hvóló aa həli, giti tee ɓoloon ɉu.

¹⁵ Hvóló da ɲąnin daa haa. Pɛmɛ̨lɛ̨n-gɔwɠaa hvə lə aa kpɛɛ di hu.

¹⁶ Yai-Laa huluun nwoo yɛ tɔɔ Siɔn daai, Nwoo yɛ tɔɔ Ɉerusalɛmə daai, Yələkɔlɔn da lɔi diɛ kpɛlin. Kɛlaa, Yai-Laa kaa a nwɔ nu huwui mąą kilɛi; yɛ ɓo a Israɛlə lonnii mąąkpɛ hįį.

¹⁷ Nąąlɔwai ka gɔlɔn kaa Ɲą́ą́ ɓə a Yai-Laa ka wɔ Yálá; Gáá heeni Siɔn yee mɛ̨i, nwɔ́ yee mąąhəɠɛɛ, Ɉerusalɛmə taa kaa pai kɛi a kɛɛnąą mąąhəɠɛɛ. Nweaa di hva kpɔ kɛa mąąliɓi.

Yálá nwɔ nuą pənə mɛ̨nį di kɛ di nɛɛ hu

¹⁸ Nąąlɔwai, viɲəɠaa da lɛlɛ ɲeeɠaa ɓa kɛnɛ̨, daatɛlɛɛɠaa ŋąą ə nɛ̨ɛ̨ ɲee kɔ́wɔ laɠaa ɓa, di ɲįnįya yɛ pu. Ɛlɛɛ, ya kaa pai laai Ɉuda ɓoloonŋąą kəlee hu, tɛɛya a kulɔ Yai-Laa hee pɛlɛ́ mu, yɛ laa Akasiasə ɓoloon ɉu.

¹⁹ Eziptə lɔi nąą tamąą kaa pai lɛɛi a lɔi kpoloon. Edɔmə lɔi ə lɛɛ a lɔi pun; túwɔ́ pələ ɲɔ̨n di gulɔ a Ɉuda lɔi mąą mɛ̨nį ɓa, yaai di kwəi kwələ nuą tamąą ɲąmą pu la nɔi.

²⁰ Yii ɓaa Ɉuda lɔi nwɛi, naa kaa pai hvɛɛi a nu kan, Ɉerusalɛmə taa laa ə hvɛɛ a yələ kəlee mɛ̨nį.

²¹ Gáá pai di ɲąmą nwąną kulɔi, a tɛ̨ą, Nwóó li. Siɔn yee nwuɔ̨ ɓə Yai-Laa kaa pai heei laa.