Zôo 7 - Yálá laawoo hɛɓɛ (dc)Mɔ̨nɔ̨ mįi hvólóɠaa 1 A kɛ ti, koló gbɛli lɔ hvəi nu kan a gɛ yɛnɛ̨ɛ̨ ɓɛ, kɛlɛi a nwɔ yɛnɛ̨ɛ̨ kɛ lɔ yɛ pɔlɔ tɛ? 2 Bələi kpɔlɔ luwɔ a vii too la nįnįn mu, bələi kpɔlɔ koló kɛ mun a vɛla mąąkpɔn na, 3 bələ kpɔlɔ ɓə ɲąnįnŋaa tɛɛ la mɛ̨́i, kɛlaa tɔlɔ hvo ɉu. Nwɔ́ kpinįɠaai diɛ tɛɛ lɔ ti mɔ̨nɔ̨ hu. 4 Ŋą́ lɛɛ lɔ laai, gɛ kɛ diɛ: «Minɛ̨ lɔwai ɓə gáá pai múhəɠəi la?» Ŋą́ múhəɠə gɛ́ yələ wulii mąą kpɔn. Kiliŋąhiɛ ɲɔ̨nwɔ̨ɔ̨ɠaa lɔ ɓə ŋį́ gɛ, ə lɛɛ ɉu yələiɓɔi ə həli. 5 Kolo pɛlɛɛɠaa daa pɛlɛ gɔ́lɔ mɛ̨i, gɔ́lɔ yɛ ɓɔ maŋa-maŋa a pɔlɔ. Gɔ́lɔ hu aa ɓɛla, ɲa yɛ pu. 6 Ɲíí hvóló aa tɛɛ a ɉu kpua, yɛ həɠə pala mįnɛ̨, yaai a tɔɔ lɔ ɓɛlɔwai ɲee a kpɛɛ la ma. 7 Gílí aa pu ɉu, gɛ́ nwɔ́ yɛnɛ̨ɛ̨ kaa lɔ a hvaŋą. Ə lɛɛ ɲɛ̨́i kɔ́w hvo kɛa pai mɛ̨nį ɲąąnɛ̨ɛ̨ kaai. 8 Nuąi kɛi di ɲɛ̨i tɔɔ mą́ą́, di hvo kɛa pai di kiliŋąąhiɛi mą́ą́. Ə́ ɲɛ̨i kaa pai kɛi mą́ą́, və́ kɛa pai kɛi yɛnɛ̨ɛ̨. 9 Tulɔ kpinįn a həɠeen, yɛ li, bələ kpɔlɔ ɓə nu a yɛɛ la lɔi mu, hva kɛa pənə hvo tɛ lɔi mɛ̨i. 10 Mąą nu hva kɛa pənə hvo li ɲəi bɛlɛ́n. Ɲəi bɛlɛ́n nuą di hva kɛa gɔlɔn. 11 Yili ɓa, və́ pai pɛlii náá pilɛi; nwɔ́ mɔ̨nɔ̨ mįi lɔwai, gáá pai kɛi lɔ nwóó hukulɔi. Gáá lɔ pai kɛi nwóó laai, nwɔ́ mɔ̨nɔ̨ mįi pələ ɓa. 12 Gboloyá ɓa mɔ̨ɔ̨ a ɲą́ą́, a wala kɛ ti mąąɲɔw hɛn, yaai ə́ kaa mą́ą́hɛn ŋii ti kɛnɛ̨? 13 Ŋą́ kɛi laa ɲə́i gbin ŋą, ŋą́ kɛ diɛ gáá pai liilaa hɔlɔɓoi. 14 Nąąlɔwai ɓə ya mą́ą́ ɲɔw la a hį́i ɲɔ̨nwɔ̨ɔ̨ɠaa, yɛ́ hį́i mąąɲɔwuɔɠaa lɛ mą́ą́. 15 Nííɓa ɓaa kɛ ə́ ɉɛ́lɛn, ɉáá hviɛlaɓoɔi, mɔ̨nɔ̨ mįɛ̨ ɓa. 16 Nwɛ́i aa pɛli, və́ pai lɛɛi yɛnɛ̨ɛ̨ a yələ kəlee. Nɛ́ɛ́ kɛa laa, mąąhɔlɔɓo, nwɔ́ yɛnɛ̨ɛ̨ kaa kpɛɛi. 17 Lə kpɔ ɓaa nu yaai, yá mąą liihɛlɛn ɉee? Ə lɛɛ yɛ́ ə́ kili kɛ ɉu? 18 Yɛ́ pa kpɔ yɛ mɛ̨i kaa yələ ɓɔ pələ tɛitɛi. Yɛ́ ɉu kɔ́ɔn a lɔwai kəlee. 19 Mįnɛ̨ lɔwai ɓə ə́ kaa pai ə́ kili kulɔi la ɉú? Yɛ́ nɛ́ɛ́ laa gɛ́ náeya mukpələ? 20 Akɛ ŋą́ą́ nɛ̨ŋɛ̨n ɉəɠə, lə kpɔ ɓə ŋį́ gɛ yɛ́, nuą mąąkpɛ mun? Ə́ mą́ą́ mɛ̨nį həɠə a ə́ yee hveelɛ lə mɛ̨nį ɓa? A kɛ ti ŋį́ mɔ̨ɔ̨ kɛ a ə́ nwuɔ̨ tiɛ̨? 21 Hvo pɛli li ə́ lii kpələi nwɔ́ kwɛli tee laa mu? Hvo pɛli li ə́ kili kulɔi ɉɔ́n ɉu? Ya ka gáá kɛa pənəi a pɔlɔ Ə́ kaa pai gwɛ́lii, vá kɛa kɛ ɓɛ. |