Zôo 42 - Yálá laawoo hɛɓɛ (dc)1 Nąąlɔwai, Ɉobə ə Yai-Laa woo ɲąąpənə, yɛ mą: 2 Gílí kaa ɉu gɛ́ yá pɛli mɛ̨nį kəlee ɓa, ɛlɛɛ mɛ̨nį ta lɔpee hva kɛ ə́ tɛɠii. 3 Ə́ kɛ mą́ą́: «Gbɛɛ ɓaa yɛ́, yɛ́ pɛli gɛ́ mɛ̨nįɠaa hu pui a ɓowoɠaa ɓoɔ?.» Kɛlaa, ŋį́ kɛ dɛ́ɠii, və́ kɛ gbaɠala kɔ́lɔn. A tɛ̨ą, mɛ̨nįɠaai kɛi gwə́i pili mą́ą́, ŋį́ tunwɔ̨n diɛ dɛ́ɠii. 4 Ə́ kɛ mą́ą́: «Ə́ wəli tɔɔ, ɲą́ą́ ɓə bələ ɓo kaa ná, gáá ə́ mąąnin gɛ, ə́ bulu pənə mą́ą́.» 5 Ŋą́ kɛi lɔ ə́ laa mɛ̨n diɛ mo, yiihu nwɛi, ɲɛ̨́i aa tɔɔ yɛ́. 6 Yili ɓa, nwóó ka ti kpoloon ɉú, Ŋą́ą́ ɉɔ́n gɔlɔn bɛ́lɛɛ ka! Yai-Laa ə Ɉobə liilaa 7 Yii kɛa, Yai-Laa da Ɉobə di kpɛɛ a nonoi tii kɛɛ, yɛ Teman mun Elifazə ɓa: «Níí aa holi ə́ pɔ, ka ə́ ɓɛlaa hveelɛi, mąąhɔlɔɓo, ka hvo mą́ą́ mɛ̨nį ɓo li a tɛ̨ą, yɛ bələi nwɔ́ tímun Ɉobə ə mo la. 8 «Yiihu kɛa, ka nįŋɛ̨ hilɛ mɛ̨ihveelɛ həɠə, da ɓɛlaa hilɛ mɛ̨ihveelɛ, ka li a diɛ nwɔ́ tímun Ɉobə pɔ, ka di kulɔ a haláá yii da gəlee kələn, a kɛ ti nwɔ́ tímun Ɉobə ə pɛli ka mąą nɛ̨ɛ̨mąą hvəi, yaai ti mąą mɛ̨nį ɓə aa gɛ, gɛ pɛli li ka wɔ ɓowo túwɔ́i gwələ kulɔi kaa. Kaai ŋɛ̨i ka hvo mą́ą́ mɛ̨nį ɓo li a tɛ̨ą, yɛ bələi nwɔ́ tímun Ɉobə ə gɛ la.» 9 Teman mun Elifazə, Sua mun Bildadə, da Naama mun Sofarə de li, nwooi Yai-Laa ə mo, di bɔ mɛ̨nį kɛ. Yai-Laa yaan ə Ɉobə woo mu hon a gwəinɛ̨ɛ̨. 10 Gɛɛ ti, Yai-Laa ə Ɉobə yəi hɛnŋąą bɔɔ tɛɛ bɔ, mɛlaa mąą nɛ̨ɛ̨mąą hveɛ pulu. Ɛlɛɛ Yai-Laa ə Ɉobə nwɔ hɛnŋąąi kəlee tɛɛ bɔ a gee mɛ̨i hveelɛ hveelɛ. 11 Niɛni hinąą, da mąąhalani, da gɔlɔn nuą kpɔ tii kɛ tɔlɔɔ-tɔlɔɔ, di pa di woo pilii ma. Da diɛni di hɛli pu ɲəi bɛlɛ́n, diɛ di woolaa mɔ̨nɔ̨ kɛnɛ̨i tii Yai-Laa ə naa mą, mąą mɛ̨nį ɓa. Yili pulu nu tɛitɛi ə mɛ̨inɛ̨ɛ̨ kɛ mą a wali kpuwuluɠaa, da hɛni gbonoɠaa. 12 Yai-Laa ə pənə ə lúwɔ́ too Ɉobə nwɔ yɛnɛ̨ɛ̨ ɓa, ə tɛɛ dɔlɔɔ ɓa. Ə ɓɛlaa waa pow kɔ́w nąąn ɉɔlɔɓo, ɲɔɔmɛɛ waa mɛ̨ida, Nįŋɛ̨ hilɛ da Nįŋɛ̨ haa waa hveelɛ, hoohvaalən ɉaa nwaa tɔ̨nɔ̨. 13 Yili pulu, ə lon ɉinąą mɛ̨ihveelɛ hɔlɔɓo da lon nɛ̨ą haaɓa. 14 Yɛ non nɛ̨ɛ̨nu dɔlɔɔ laa ɓaa: Yemima yɛ veelɛnąą laa ɓa: Kesiya, yɛ ɉaaɓanaa laa ɓaa: Kɛrɛn-Hapukə. 15 Nɔi ti hu, di hvo nɛ̨ąą lɛlɛɛ takpɛliɠaa di hvo laa, hvo həli Ɉobə lon nɛ̨ąąi ti pɔ. Di nąn ə gwɛlin mɛlaɓo, da di mąąhinąą di lɔwai. 16 Yili pulu, Ɉobə ə kwɛlan nwun dɔ̨nɔ̨ yee nąąn gɛ yɛnɛ̨ɛ̨. Ə nonnii di wɔ lonnii hon, ə lɛɛ ɉu ə həli ə mąnįnni di wɔ mąnįn bulu mąnįnɠaa hon. 17 Ɉobə ə pɔlɔ kpɔ yɛɠɛ-yɛɠɛ, yɛ tɛɠa laa nąnni kwɛlɛ. |