Zôo 41 - Yálá laawoo hɛɓɛ (dc)

¹ Nu a gaa, gwəi kili a tamą, A ɲɛ̨i hee lɔ nu ɓa, yaa ma too.

² Ɓowo hvo nu ta ɓa yɛ pɛli naaikwɛlii. Gbɛɛ ɓə a pɛli tɔɔi ná?

³ Gbɛɛ ɓə nwɔ kwələ kaa mą́ą́? Hɛn kpɔ yələ kɔ́lɔn mu, gəlee kaa a nwɔ́.

⁴ Vá pɛli náá pilɛi dɔɔ tɔɔiɠaa kiliin ŋąą ɓa, ɉuwalawala pələ, da gbinį lɛlɛ pələ.

⁵ Gbɛɛ ɓə a pɛli nwɔ həɠəi laaɓoi ɲɛ̨i tɔwɔ pələ? Gbɛɛ ɓə a pɛli tɛɛi ɲin ɲɛli hveelɛi lɔwai?

⁶ Gɛɛ ɓə a pɛli naa taɠai gee ɓa? Naa taɠaa gee ɓa a nu mąą ɲɔw.

⁷ Ɉąą mɛ̨i kpulɔɔ a kɔ́ kɔ́ gbala, ɉeɛ gee ɓa a nɛlɛɛ, naa kpulɔɔ.

⁸ Gala tɛitɛi heɛ gee ɓa, hvaŋą tɔ̨nɔ̨ kpɛli tɛɛi hvo nɔwai.

⁹ Gəlee diɛ kanąn di kee ɓa, hɛn da hva pɛli di taɠai di kee ɓa.

¹⁰ A tihoo ɓo, kɛɛ pɔ̨nɔ̨ a kulɔ di lɔwai, ɲɛ̨i lon ə ɓo yɛ yələ ɓɔi gɛɛ pɔ̨nɔ̨.

¹¹ Mąlą mąlą yɛ kulɔ na, nwɔ̨n gbalənŋąą diɛ kulɔ laa.

¹² Nwɔ̨n nulu a kɛ kulɔi ɉunwɛi, yɛ kwɛli ləɠi a kɛ nwɔ̨n ŋą, lulu yɛ kulɔ ɉu.

¹³ Ɉunwɛi nɔw yɛ nwɔ̨n dəŋą kulɔ, a naa taɠa, nwɔ̨n nən ɲɛ kulɔ na.

¹⁴ Gɔn mə nwɔ huwalawala laa kaa ɉu, nu ya gaa, yɛ kpɛlin a ɲɔw.

¹⁵ Gɔlɔ hu, wiɛ pələ kɛnɛ̨ɛ̨, nwalawala pələ, tumun və mą.

¹⁶ Nii wala walaa gwəi yɛ kwɛni, nwala walaa yɛ kwɛli kpuwulu.

¹⁷ A muhəɠə, tɔɔɓɛlaa kəlee da ɲɔw, di hu a pu diɛ.

¹⁸ Di mą ɓɔwa kwɛa pili mą, bɔɔ hva lɛɛ mą. Ə kɛ a kpala, ə kɛ a mɛ̨ɛ̨kɔw, ə mą kɛ həmə kaa mąą nu yəi.

¹⁹ Nwɛi, kwɛli kaa lɔ ɲɛ̨i ɓa yɛ mɔ̨nun gban, ɓala kwɛli ə ɓo ɲəi yɛ kwɛi luwun.

²⁰ Hva pu kilɛn dɔwɔ, Yələ vin ɉu kwɛniɠaa di ɓo a dɛ̨ɛ̨ kpalaan.

²¹ Gɛlɛɛ a pamanin, gaa gɔlɔ ɓa yɛ mɔ̨nun gbaɠa, ya kpala pili yɛ li bɔ, a kɛ lɔ yɛ́lɛ́i.

²² Goolon gɔlɔ mɛ̨i kpulɔɔi a kwɛli ɲąą kulaa ɲą́ą́liɛɠaa bɔɔ a lɛɛ ya kwɛlɛ yɛ kɛɛ kpɛŋɛn gwɛli.

²³ A too yái, ɲá a nɛ̨n, yɛ da ɉee nwɔ̨n ŋą, nwəleen da nulu diɛ tɛ.

²⁴ A li, kɛɛ pɔ̨nɔ̨ yɛ lɛɛ bulu, gbalə hu yɛ pɔ̨nɔ̨ yɛ hulɔ golo nwun nəɠa.

²⁵ Gɔɔmąą hvo lɔi mɛ̨i, ɲɔw hva too ɉu yɛnɛ̨ɛ̨ ɓɛ.

²⁶ Nii kpəlɛɛi huwalawala hɛn gəlee tɔwɔ, gaa a huwɔ nwɔ mɛ̨nį ɲɔ̨nwɔ̨ɔ̨ɠaa kəlee di wɔ tɔɔmun.