Zôo 38 - Yálá laawoo hɛɓɛ (dc)Yai-laa hvaa wooɠaa Yai-Laa woo dɔlɔɔ 1 Yai-Laa ə lɛɛ hvaŋą hu, ə Ɉobə woo ɲąą pənə, yɛ mą: 2 Gbɛɛ ɓaa yɛ́, yɛ́ pɛli nwɔ́ mɛ̨nįɠaa hu pui, a ɓowo wooɠaa ɓoɔ? 3 Ə́ hąą yili kɛa yɛ huwalawala mun, gáá pai ə́ mąąnin gɛ, ə́ nwóó ŋąą pənə. 4 Ə́ kɛ mįnɛ̨, ɓɛlɔwai ŋį́ kɛi lɔi kɔ́wɔ hvilɛn na? Ɉukulɔ mą́ą́, mąąhɔlɔɓo, yáá ə́ kpɔwɔ kɛ a mɛ̨nį kɔ́lɔnmun. 5 Gbɛɛ ɓə lɔi kɔ́ɔn, ə́ gbaɠala kɔ́lɔn? A wala kɛ ti, gbɛɛ ɓə lɔi kɔ́ɔn ɲɛliɠaa laa mą? 6 Nɔ̨nwɔ̨ɠaa hvilɛn ŋąąi lə mɛ̨i? Gbɛɛ ɓə gɔwɔ hvilɛn gwɛni dɔlɔɔ laa? 7 Ɓɛlɔwai yələ ɓɔi bɛmɛ̨lɛ̨n-gɔwɠaa di kɛi wələ too la, ɛlɛɛ, Yálá nwɔ malakaɠaa diɛ tomą a wələ. 8 Gbɛɛ ɓə gboloyá laa kpulu a kpon veelɛ, ɓɛlɔwai ə kɛi kulɔ laa nee kwəi? 9 Ɓɛlɔwai ŋį́ tulɔ kpinįn bɛlɛ la mɛ̨i a mąą həɠə, ɛlɛɛ gɛ́ nąnąąn gɛ a nwɔ doo gwąną həɠə. 10 Nwɔ kpɔwɔ ŋąą kɛnɛ̨i gaa ɲəi yɛ gɛ la takpa-takpa, ŋį́ ɉukala. Ŋą́ gbon naa kpulu kwɛli too na. 11 Gɛ́ mą: «Yá pa, ə́ kpɛlai ka, 'hvo nąą mąą tɛɛ, ə́ wɔ kpɔwɔ ŋąą kɛnɛ̨ laa kpɛlai ka.» 12 Ə́ wɔ yɛnɛ̨ɛ̨ hu, yáá ta yələ wala pɔ tɔ̨nɔ̨ kpɛli ɲąąwooɓo? Yɛ́ kɛ yələ ɓɔɔ ɓa: Ə́ tɔɔi ka? 13 Ə gɛ, yələ wala yɛ pɛli lɔi hon ɉii a nwəli tɔ̨nɔ̨, yɛ nwean mɛ̨nį ɲɔ̨n gɛ nuą mu? 14 Nąąlɔwai, lɔi a kɛ yɛ ləɠi pɔlɔi da di kɔ́lɔn ɉii kɛ mą, bɛ̨ɛ̨ yɛ həɠə. 15 Kɛlaa, mɛ̨nį ɲɔ̨n gɛ nuą di wɔ kɛɛ pɔ̨nɔ̨ a pili di yəi, di yeei di kɛi dɛ yələi, ɉu a yali. 16 Yá ta həli gboloyá nwun gulɔi, yá ta yɛɛ gboloyá balə kpon ɉu? 17 Daa ta haa yəi bɛlɛ́ laaləi lɛ yɛ́? Yáá ta haa nwɔ kpinįi yəi bɛlɛ́ laaləi kaa? 18 Bələi lɔi ŋąą kɛnɛ̨ la, ə́ bələ kɔ́lɔn? Bələ lɛ kan mą́ą́, yɛ́i mɛ̨nįɠaai ti kɔ́lɔn. 19 Ɓɛ pələi kɛɛ pɔ̨nɔ̨ kaa la, ə́ nąą pələ kɔ́lɔn? Kpini yəi bɛlɛ́n gaa mį? 20 Yá pɛli di laa kwiɛn ɉii, da lɛɛ lɔ kulɔi. Bələi a li di pɔɔli, ə́ bələ kɔ́lɔn. 21 Ə́ gbaɠala kɔ́lɔn a nɛlɛɛ, mąąhɔlɔɓo, nąąlɔwai daa kɛ ə́ kaa, ɛlɛɛ ə́ kaa kwɛlan damąąi! 22 Yá ta həli ɓɛi kwɛlɛ kpuwulu puɔ laa gee mɛ̨i, da ɓɛi hanwon gbuwulu kaa la gee mɛ̨i, ya ta naa kaa? 23 Diɛi ŋį́ di pɛli nuą mɔ̨nɔ̨ ɓo yələ mąą mɛ̨nį ɓa, a lamun kɔ́ yələ da kɔ́ kɔ́ yələ mąą mɛ̨nį ɓa. 24 Kɛɛ pɔ̨nɔ̨ a hala pələ kɛ ləi? Ə́ hvaŋą həɠəi pələ kɔ́lɔn yɛ lɔi laahvɛɛ? 25 Gbɛɛ ɓə hąmąlan dulɔɠaa kpaalə kulɔ? Yɛ pələ tɛɛ tulɔ kpinįnŋąą pɔ yələi, diɛ tomą? 26 Əgɛ, lɔi nuą di hvo ɉu, tulɔ yɛ pu ɉu, a lɔi pun nu tɔ̨nɔ̨ kpɛli hvo ɉui. 27 Yɛ lɔi hu kpalaa laahvɛɛ a ya, yɛ́ gɛ kalaɠaa diɛ ɓɔn mɛ̨i? 28 Tulɔ nąn gaa mą? Gbɛɛ ɓə gaa a nɛnɲaɠaa di lee? 29 Kwɛlɛ kpuwulu ə kulɔ koolon nɛlɛ hu? Nąlaan gbuwuluɠaai yələi, di kaa mun mąą gbɛɛ? 30 Mįnɛ̨ lɔwai ɓə ya a walawala laa yɛ kwɛni? Palə mɛ̨i pələ yɛ gbuwulu kɛ! 31 Yá pɛli ə́ pɛmɛ̨lɛ̨n-gɔw kpulu yili gee ɓa? Ə́, bɛmɛ̨lɛ̨n-gɔwɠaai da kɛ diɛ: Oriɔn, di kpulɔn ɲɛli hvólóon? 32 Akɛ yá pɛli kɔ́lɔn ɉɛnŋąą kɛi yələ kwəi a di kɛi lɔwai, Yɛ́ tɔɔ ya kwɛli da nonnii di tɔwɔ diɛ di kɔ̨nɔ̨n gwɛli. 33 Ə́ yələi pələ tɔ́nŋąą kɔ́lɔn? Yiiɠaai bɛ̨ɛ̨i laa, yá kɛ di pɔ mɛ̨nį kɛi? 34 Ə́ tomą woo a həli tulɔ kpinįnŋąą diɛ, ə gɛ diɛ pɛli tulɔ tɛɛi ə́ pɔ? 35 A kɛ ti, yɛ́ ɓə ya kɛ ɓoi mąną-mąną ɓa yɛ li? Yɛ́ ɓə da pa diɛ kɛ yɛ́: «Kuɔ ka.» 36 Gbɛɛ ɓə a ya hvɛɛ mɛ̨nį lɛɛ kwɛa la, yɛ gbaɠala lɛ nwɛ̨nį ɓa? Gbɛɛ ɓə yələ ɓɔi gɔlɔn gili tɛɛ tɛ́ɛ́hilɛ pɔ? 37 Gbɛɛ ɓə a tulɔ kpinįn nono a kili kɛ ɲəi laa, yɛ gɛ, tulɔ yɛ pu pɔlɔ ɓa, 38 ɓɛlɔwai pɔlɔ kaa gbuwulu kɛi la, yɛ walawala yɛ kwɛni? Ə́ gbaɠala kɔ́lɔn? 39 A kɛ ti, yɛ́ ɓə ya kɛ́ yala haa kɔ̨nɔ̨n gwɛlii yɛ dɛɛ bɔ? Yɛ́ pulu kulɔ yala lonnii diɛ? 40 Ɓɛlɔwai da kɛ la pɛlɛ ni di wolo hu, a wala kɛ ti ɓɛlɔwai da kɛ huwɔɠaa mąą hɛn ɉii la. 41 Gbɛɛ ɓə a kɛ goą goąɠaa kɔ̨nɔ̨n dɛɛi di pɔ, ɓɛlɔwai nonnii wɔlɔ woo a tɛ la Yálá pɔ pələ, ɓɛlɔwai da kɛ di laa taɠaa laa a pulu? |