Zôo 37 - Yálá laawoo hɛɓɛ (dc)

¹ Ŋą́ yili kaa, níí a kɛ kpɛlin ɉii gwə́i, yɛ pili yələi, yɛ həɠə naai.

² 'Ka ka wəli tɔɔ! 'Ka ka wəli tɔɔ Yálá hvaa woo ɓa, a domą wooi kulɔi na.

³ Nwoo a tɔɔ yələkɔlɔn mu nąą kəlee, domą woo yɛ həli kpɔ lɔi kpɛlai.

⁴ Yálá kaa tomąi, Yálá kaa tomąi nwɔ mąąwiɛ hu, ɛlɛɛ, hvo ɲee kɛi mąną-mąną ɓa.

⁵ Yálá kaa tomąi, naa woo yɛ kpalo kulɔ, yɛ mɛ̨nį kpɛ-kpɛa kɛ a kwəi pili mąą.

⁶ A kɛ la hanwon dulɔ ɓa: «Pu lɔi mɛ̨i», yɛ tulɔ pu, gboloon yɛ laa.

⁷ A nu yee kəlee kpəla ə dɔɔ tin, ə gɛ nu kəlee di nwɔ huwalawalalaa kɔ́lɔn.

⁸ Huwɔ kəlee a li noo pələi, di pɛlɛ di pɛlɛiɠaa.

⁹ Hvaŋą a kulɔ daa hu, kwɛlɛ yɛ həɠə ɲələi pələ.

¹⁰ Yálá a naa wəleen bu mą, ə gbuwulu kɛ, ɛlɛɛ yaɠaa diɛ di kpuwulu kɛ.

¹¹ Yələɓoɔ lɛlɛɛ a pa a tulɔ kpinįn, yɛ tulɔ kpinįn daɠa taɠa gee ɓa, da mąną-mąną.

¹² Ya ɓə a gəlee kalan na tee, ə gɛ yii gaa bɔ, diɛ gɛ. A yii kpɔ gaa bɔ di gɛ yɛnɛ̨ɛ̨ nąą kəlee.

¹³ Akɛ bɔ ə lɔi laahvɛɛ, a wala kɛ ti ə ɲɔwɔ lɔ, ə lúwɔ́ too mą, diɛ ɓə a di tɔɔ.

¹⁴ Ə́ wəli tɔɔ nwooi ti ɓa Ɉobə! Tɔɔ tai, ə́ Yálá nwɔ kpalo mɛ̨nįɠaa kaa,

¹⁵ Ɓɛlɔwai Yálá ə kɛi mɛ̨nįɠaa ti kɛ la, yɛ́ ə ɉukɔlɔn? Bələi a mąlą-mąlą lən na tulɔ kpinįn ɉu, ə́ bələ kɔ́lɔn?

¹⁶ Ə́ tulɔ kpinįn ɉee pələ kɔ́lɔn? Ə́ mɛ̨nį kɔ́lɔn gili kpɔɔ kpɔɔ kɔ́lɔn?

¹⁷ Ɓɛlɔwai hvóló haŋąą hvaŋą a muhəɠə la, ə́ mąąhəɠə yɛ kələn a wəleen, yili kpaɠala kaa yɛ́?

¹⁸ Yá pɛli ə́ yee haŋąi yɛ́ tulɔ kpinįn ɉiɛ voló ɲɛ̨i nąąlɔwai, yɛ da kɛi kwɛli ɓɛla hiɛ ɲɛ̨i?

¹⁹ Yii mąąnɛ̨ɛ̨ gu mo Yálá ɓa, nɛ mą́ą́, gu kɛ mɛ̨nį kpinį hu, mąą hvo nɛ̨ɛ̨li, gu hvo kiti too na.

²⁰ Ŋą́ kɛi hvaa, ŋį́ mɔ̨ɔ̨ ɉukulɔ mą? Ə gɛ ə pɛli ɉu kɔ́lɔn ɉii?

²¹ Gwa lɛɛ lɔ heeni, kɛɛ pɔ̨nɔ̨ ə lɔ gbai, mąąhɔlɔɓo, tulɔ kpinįn aa hiɛ ɲɛ̨i. Yili pulu, hvaŋą ə pa, ə nwaa laa.

²² Kɛɛ pɔ̨nɔ̨ a həɠə ɲələi pələ, yɛ hɛni, yɛ gɛɛ pɔ̨nɔ̨i Yálá kwɛlɛ, yɛ nu mąą ɲɔwi.

²³ Gaa a Huwalawala Kəlee Nąmu, gu hva pɛli həlii ma, gɛnɛ̨ɛi yeetɛɛmąą laa hu, gɛnɛ̨ɛ tələnmolaa hu. Gaa a tələnmolaa Nąmu, hva nu ta nwɔ tɛ̨ą mɛ̨nį kpəlaan.

²⁴ Yili mąą mɛ̨nį ɓə nu kanŋaa da ɲɔw la ma, Kɛlaa nwɛi, nuąi da di kpɔɔ kɛ a mɛ̨nį kɔ́lɔn nuą hva yili ta ɓo.