Zôo 36 - Yálá laawoo hɛɓɛ (dc)Elihu hvaa woo nąąn naa 1 Yili pulu, Elihu yɛ nwɔ̨nɔ̨ diɛ: 2 Ɉobə, ə́ lii kpələ nwóó mu, ŋį́ ə́ kilaa pɔ̨nɔ̨, mɛ̨nį takpɛliɠaa kaa nwɔ̨nɔ̨ laa yɛ hvilɛn Yálá ɓa. 3 Gáá kpɔ nwɔ́ kili mɛ̨nį həɠəi kwɛa la, gɛ́ bɛ́li mun nwɔ tɛ̨ą lɛ. 4 Mąąhɔlɔɓo, nwooi gáá moi, lɛɛ hvo ɉu, ə́ lɛɛ, mɛ̨nį kɔ́lɔn mun gɛnɛ̨ ka ɲɛ̨i ə kwɛlɛ. 5 Ə́ kiliŋąhiɛ Yálá nwɔ kɛnɛ̨ laa ɓa, nwɛi hva kɛ diɛ, gáá yɛlɛ kulɔi ɉu, a gɛnɛ̨ pələ lɛ gɛ mɛ̨nįɠaa kəlee hu. 6 Hva mɛ̨nį ɲɔ̨n gɛ mun nɛɛ yɛnɛ̨ɛ̨, Kɛlaa, nui daa hee mɛ̨i, a malo. 7 Hva ɲɛ̨i həɠə tələnmo nuą mɛ̨i. A di hee tɔɔ kpəlin ɉu, a di hee laa, ə gɛ, di wɔ tɔɔlaai ə lamun ɉu, Kɛlaa, da di kpɔɔ ɲąą kɛnɛ̨. 8 Yii hu, daa di kpɔɔ kaa kɛa yɔwɔn ŋą, a yɔwɔn di wɔ túwɔ́ pələ ɲɔ̨n ə di too ɲa. 9 Mąąhɔlɔɓo, ə kɛ bɔ ə di wɔ túwɔ́ pələ ɲɔ̨n gulɔ pɔ̨nɔ̨ŋa, a di kpɔɔ kaa di kɛi mo a kulaaɠaa. 10 A di wəli laa ɓo kili pu ɉu mɛ̨nį tɔwɔ, yɛ diɛ di lənə túwɔ́ pələ ɲɔ̨n gulaa ɓa. 11 Da hvaa mą da lɛɛ nwoo mu, da di yii hvóló kəlee kɛ nwun na nɛ̨ɛ̨ hu diɛ di wɔ kwɛlan gəlee kɛ a ɲąą nɛɛ. 12 Kɛlaa, da wala di wəli tɔɔ nwoo ɓa, di kaa pai mɔ̨nɔ̨ mįi kpala yəi, diɛ haa mɛ̨nį kɔ́lɔn gili tɛɠii. 13 Nɛ̨ŋɛ̨n ɉəɠə nuąi da kanąn líiholi ɓa, di hva di woo laa, ɓɛlɔwai da kɛ la yɔwɔn ŋą. 14 Di wɔ yɛnɛ̨ɛ̨ a kpɛɛ di hilɛlɛa kɔ́lɔi da di wɔ yɛnɛ̨ɛ̨ ɲąą kpɛɛ wɛli kɛ ɲɔ̨n ɉu. 15 Nui daa hee mɛ̨i, Yálá a gulɔ mɔ̨nɔ̨ hu, a gilaa pɔ̨nɔ̨ nwɔ mɔ̨nɔ̨i hu. 16 Yɛ́ kpɛli, aa ə́ tɛɛ a bələi ti, yaai nu hva mɔ̨nɔ̨ mįi ɉu, ə gɛ, ə́ wɔ taɓalii mɛ̨i yɛ hvɛɛ, a kɔ̨nɔ̨n nɛɛɠaa. 17 Kɛlaa, ə́ kaa túwɔ́i a túwɔ́ pələ ɲɔ̨n gulɔ mun dúwɔ́ pələ, yii pai kiti kalai yɛ́. 18 Ə́ kpɔɔ hon, ə́ gɛ liiholi hvo ə́ lɔ mɔ̨nɔ̨ hu, ə gɛ mɔ̨nɔ̨ kɛnɛ̨ pələ hvo ə́ həɠə bələ mɛ̨i. 19 Ə́ yəi hɛn gɔwɠaa da pɛli mɔ̨ɔ̨ mɛ̨nį ta kɛi, ə ma kə ə́ wɔ hɛniɠaai ɓə, ə mą kɛ hɛnŋąąi kpɔ ya di hɔlɔɓo a ə́ hvaŋą. 20 Haa yii a nu həɠə ɉeei, hvó mąą wɛli-wɛli kulɔ. 21 Ə́ kpɔɔ mɛ̨i kaa mɛ̨nį ɲɔ̨n mąą mɛ̨nį ɓa, hvó mɛ̨nį ɲɔ̨n viɛlaɓo mɔ̨nɔ̨ ɓa. 22 'Ə́ ɲɛ̨i hee tai, Yálá yəi kɛnɛ̨i, gbɛɛ ɓə a pɛli nu mąą kwɛlii ə tɛɛ mą? 23 Nu ta a pɛli mɔ̨ɔ̨ dúwɔ́ pələ hu kpɛi? Nu ta a pɛli kɛi mą: «Yáá túwɔ́ pələ ɲɔ̨n gulɔ?» 24 'Hvó lɛ̨ą gɛ mɛ̨nį kpɛa kpɛaɠaa hukulɔi, yai nuą da doo a wələ. 25 Yɛnɛ̨ɛ̨ nuą kəlee da gaa a di ɲɛ̨ikɔw, nu kanŋaa diɛ nɛɛ kwɛa la, diɛ mąąkpɛɛ. 26 Yálá kɛnɛ̨ pələ mąąkpɛɛ, gu hva pɛli gbaɠala kaa, nu hva pɛli nwɔ kwɛlan nonon ɉii. 27 Ya ɓə a yá yala bɔ pələ, yɛ ɉu kpɛ, yɛ gɛ a tulɔ, 28 yii tulɔ kpinįnŋąą da kɛ bui, yɛnɛ̨ɛ̨ nuą kəlee mɛ̨i kɛnɛ̨. 29 Gbɛɛ ɓə a pɛli tulɔ kpinį mąą mɛ̨nį kpaɠala kaai, yɛ yələgbąnąą yɛlɛ pələ kpaɠala kaa? 30 Ya ɓə a nwɔ yələgbɛnąąi ɓɛla nuą mɛ̨i, ɛlɛɛ, ya ɓə gboloyá kpon ɉee. 31 Di hu ɓə a yɛnɛ̨ɛ̨ nuą kiti tee laa, yɛ kɔ̨nɔ̨n dɛɛ nuą pɔ kɛnɛ̨ɛ̨. 32 A ɲee hveelɛi laa kpulu yələgbɛnąą ɓa, yɛ níi lɛ mą. 33 Nwɔ yələgbɛnąą ɓə a gɛ mɛ̨nį mąą loloɓo, ə mą kɛ taatɛlɛɛɠaa, da nɛɠɛ mɛ̨nį guɔ kili kɔ́lɔn. |