Zôo 35 - Yálá laawoo hɛɓɛ (dc)Elihu hvaa woo ɉaaɓa nąą 1 Elihu ə pənə nwɔ̨nɔ̨, yɛ diɛ: 2 Ɉobə, gaa ə́ kwəi tɛ̨ą kaa ə́ pɔ, kɛi ə́ kaa moi diɛ: «Nwɔ́ mɛ̨nį haŋąą Yálá nwɛi ɓa, 3 Mąąhɔlɔɓo, ə́ kwəi kaa kɛi diɛ ə́ mą́ą́kpaan və ɉu. Ŋą́ nɛ̨ŋɛ̨n ɉəɠə kpɔ, yili kaa a lə?» 4 Gáá yɛ ka ə́ ɓɛlaa ka woo pulu pənəi tanɔ̨n. 5 Ə́ ɲɛ̨i hee yələkɔlɔn ma, ə́ gaa, bələi tulɔ kpinįnŋąą da tɛɛ la ə́ nwun mɛ̨i, bələ kaa. 6 Yá nɛ̨ŋɛ̨n ɉəɠə, yá mɔ̨ɔ̨ pɛli Yálá líi kulɔi mą, yá ə́ wɔ túwɔ́ pələ ɲɔ̨n ɉu kɛnɛ̨, lə ɓə a gɛ mą? 7 Yá kɛ a tələnmomun, tɔ̨nɔ̨ lə kɛɛ ɓə yaa ti a ɉɔlɔɓo ɉu? A kɛ hɛn da hɔlɔɓoi ə́ yəi? 8 Ə́ ɓɛlaa lɔ ɓə, ə́ wɔ tuwɔ́ pələ ɲɔ̨n a həli diɛ, yá tələnmolaa kulɔ nwɔ̨nɔ̨, nuą lɔ ɓə a həli diɛ. 9 Nuą da ɲiŋɛ hee mɛ̨i laa mu diɛ tomą, di mɔ̨nɔ̨ ɓo nuą yəi 10 Kɛlaa, nu ta hva kɛ diɛ: «Bɛ́li Yálá kaa mį? Yaai a kɛ wələ lɛi kuɔ kpinį, 11 Yaai a gu kili tɛɛ huwɔɠaa di wɛi ɓa, yɛ nu kili tɛɛ yələi nwɛ̨nįɠaa diɛ?» 12 Kɛlaa, ya ka gwa tomą, hvaa gu woo pulu pənə, mɛ̨nį ɲɔ̨n gɛ nuą di wɔ kpɔɔ ŋąą kɛnɛ̨ mɛ̨nį ɓa. 13 Woo ɲɔ̨n lɔ hva too Yálá wəlii, ya ɓə da mo, Huwalawala Kəlee Nąmu yaan, hva nwəli tɔɔ yili ɓa. 14 Kɛlaa, yá ə́ liikpələ, yɛ́ kɛ diɛ hva gaa, yɛ́ diɛ; yáá ə́ mąą mɛ̨nį kəlee hukulɔ mą, ə́ kaa kɛa nąą mąąkpɔn ɉii. 15 Kɛlaa, yiihu kɛa, akɛ nwɔ líiɲąnwąną hvo pai muhəɠəi, akɛ ə́ wɔ ɓowo wooɠaai kili hvo pai lɛɛi ɲa. 16 Mąąhɔlɔɓo, hvaa kpɛli kpɛli lɔ ɓə Ɉobə ə kɛi mo, yɛ ɓowo wooɠaa tiɛ̨ lɔ gee mɛ̨i. |