Zôo 34 - Yálá laawoo hɛɓɛ (dc)Elihu hvaa woo veelɛnąą 1 Nąąlɔwai, Elihu, ə pənə yɛ diɛ: 2 Kilimąą nuą, ka ka wəli tɔɔ nwóó ɓa, mɛ̨nį kɔ́lɔn nuą, ka nwóó mɛ̨n. 3 Mąąhɔlɔɓo, wəli ɓə a mɛ̨nį mɛ̨n, yɛ bələi nu nɛn a hɛn nɛ̨ɛ̨i kaa la. 4 Guɔ ɓə mąąnɛ̨ɛ̨ gu tɛ̨ą mɛ̨nį hu kpɛ, mɛ̨nįɠaai nɛlɛɛ, gu gbaɠala kaa gu kee ni lɔwai. 5 Ɉobə ə mo, yɛ kɛ diɛ: «Ɉɔ́n və mą́ą́, kɛlaa, Yálá yɛ nwɔ́ tɛ̨ą mɛ̨nį kpəlaan. 6 Ŋą́ kɛ gáá tɛ̨ą mɛ̨nį kwɛlii, Ŋą́ kɛ yɛ lɛɛmun, mɛ̨ɛ̨kɔw aa ɉón a báá pələ, ya pa və́ nɛ̨ŋɛ̨n ɉəɠə li.» 7 Nu ta kaa laa nii kpəlɛɛ yɛ Ɉobə? Yai, yɛlɛ kulɔ ɉu woo ɲɔ̨n a kulɔ na, yɛ a kɛi ya kpələ. 8 Yai da mɛ̨nį ɲɔ̨n gɛ nuą da pələ kpɔn, da túwɔ́ pələ ɲɔ̨n gulɔ nuą diɛ hiɛ kulɔ, 9 Ə mo yɛ diɛ: «Nu hva pɛli hɛn da hɔlɔɓoi, yii a pɛli gɛi, yɛ Yálá kwəinɛ̨ɛ̨.» 10 Mɛ̨nį kɔ́lɔn nuą, ka ka wəli tɔɔ kɛa nwóó ɓa, mɛ̨nį ɲɔ̨n mąą kwɛai Yálá ɓa, hulu mɛ̨nį hva lɛɠɛ Huwalawala Kəlee Nąmu kwɛlɛ. 11 Mąąhɔlɔɓo, nu túwɔ́ pələ ɓə a bɔɔ kulɔ mą, yɛ nu tɛitɛi hon, yɛ bɛli ɉiɛ pələ ɓa. 12 Kɛlaa a tɛ̨ą, Yálá hva túwɔ́ pələ ɲɔ̨n gulɔ, Huwalawala Kəlee Nąmu hva tɛ̨ą mɛ̨nį kpəlaan. 13 Akɛti, nu takpɛli ɓə mɔ̨ɔ̨ lɔi tɛɛ bɔ? Akɛti, nu takpɛli ɓə mɔ̨ɔ̨ yɛnɛ̨ɛ̨ kəlee tɛɛ bɔ? 14 A kɛ kɛ a giliŋąhiɛ lɔ gbɔwɔ ɓa, yɛ pɛli nɔ̨ɔ̨ da nwɔ yɛnɛ̨ɛ̨ lɛɛi lɔ ɲəi, 15 Yɛnɛ̨ɛ̨ hɛnŋąą kəlee di nɔ̨ɔ̨ a kpɛɛ kɛ di hu a gee, ɛlɛɛ nu kan ə li pənə ə kɛ a pɔlɔ. 16 Kɛlaa, yii ə́ wala mɛ̨nį kpaɠala kaa, ə́ wəli tɔɔ Ɉobə, Ə́ wəli tɔɔ mɛ̨nįi gáá moi mą: 17 tələnmolaa ɲowo a mɔ̨ɔ̨ pɛli kɛ yɛnɛ̨ɛ̨ ɲąąwooɓoi? Tələnmomun ŋɛ̨i a Huwalawala Kəlee Nąmu, yɛ́ ɓə yá pɛli nɛi a hɔn mąą mun? 18 Da mɔ̨ɔ̨ kɛ tɔɔmun ma ɓowo mun? Da pɛli nu kpɛa kpɛa kɛi a nu paa nuą? 19 Yaai hva tɔɔmun non viɛlaɓo nu takpɛliɠaa diɛ, ə lɛɛ, hva hɛn gɔw nąmu hviɛlaɓo yeehvowolomun ma, mąąhɔlɔɓo, nwɔ pɛli hɛnŋąą ɓaa gəlee. 20 Di haa pələ kaa lɔ tanɔ̨n kpinį tɔ̨nɔ̨ yeemu, nuą da di ɲąąkpɔn, di naa kɛ ɉuwu ɉuwu, di taɠa laa, a tɔɔmun kulɔ tɔɔ kpəlin ɉu ə doo, yii nu ta yee hvo ɉu. 21 Mąąhɔlɔɓo, Yálá ɲɛ̨i kaa nu tɛitɛi kəlee mąąkpɛɛi, yɛ gɔwɔ hvilɛn ɉii tɛitɛi kəlee kaa, 22 Ə mą kɛ kpinį ɓə, ə mą kɛ haa ɓə, di hva pɛli mɛ̨nį ɲɔ̨n gɛ mun bulu kpinįi. 23 Hva kuu tɔɔ nu ɓa, ə gɛ yili yɛ pɛli pai, yɛ tɔɔ nií la giti tee mɛ̨nį ɓa. 24 A nu kɛnɛ̨ too, hva mąąnin gɛ kɛ gwɛlɛ, Yili pulu, ə nu takpɛli hee ɉeei. 25 Mąąhɔlɔɓo, ə di túwɔ́ pələ kɔ́lɔn, a di too kpinįi, di hu ə wolo wolo. 26 A di hu lɔwa nu kpulu hu, yɛ da kɛi nu paa mun gɛlɛ. 27 Mąąhɔlɔɓo, di hvo kɛi gɛ di hvo lɛɛ bulu, di hvo gɛ di hvo nwɔ pələɠaai kɔ́lɔn. 28 Ə lɛɛ kpɔ ɉu, mąąwɛli mun nwɔlɔ woo ə həli mą, ɛlɛɛ, təli lon domɔ̨ woo ə həli mą. 29 Kɛlaa, Yálá a wala muhəɠə, gbɛɛ ɓə a pɛli hvaai bɔ? A ɲɛ̨ilai now, gbɛɛ ɓə a pɛli mɛ̨i həɠəi? Ya pa, a ɲɛ̨i pili lɔiɠaa mɛ̨i, da nu kanŋaa. 30 Hvo bɔ nɛ̨ŋɛ̨n ɉəɠə mun və tɔɔlaa kɛ. Hvo bɔ di hvo hɛlɛn dɛ nwɔ nuąi tɔwɔ. 31 Gbəli hu, nu ta a kɛ Yálá ɓa: «Ŋą́ą́ nwɔ́ gahoi kpɛɛ, vá kɛa nɛ̨ŋɛ̨n ɉəɠə, 32 mɛ̨nį ɲɔ̨nŋąąi və́ gaa li, di lɛ mą́ą́ yɛ́ kpinįi, akɛ ŋą́ą́ mɛ̨nį ɲɔ̨n gɛ, və́ kɛa pai da kɛi.» 33 Ə́ wɔ kili ɓa da pɛli mɔ̨nɔ̨ laai mɛ̨i? Gílí kaa ɉu, yili a kɛ ə́ ɲɛ̨i ɓa a yɛlɛ mɛ̨nį, bələ ɓə ə́ gili tee la ə́ kwəi, kɛlaa ɲą́ą́ hvəi. Yii gaa ə́ kwəi, nɛ mą́ą́. 34 Mɛ̨nį kɔ́lɔn nuą kaa pai hvaai nwóó ɓa, kilimąą nuą diɛ kɛ mą́ą́: 35 «Vaa mun gɛnɛ̨i ŋɛ̨i a Ɉobə, hvo mɛ̨nį kɔ́lɔn, a hvaa lɔ, tɛ̨ą hvo ɉu.» 36 Gáá kɛ bɔ di Ɉobə mąąnin gɛ, ə lɛɛ la ɉu, ə tɛ̨ą kaa, yɛ kɛ nwoo kaa yɛ mɛ̨nį ɲɔ̨n gɛ nuą woo. 37 Mąąhɔlɔɓo, gaa nɛ̨ŋɛ̨n bɛlɛi nwɔ túwɔ́ pələ ɲɔ̨n ɓa, gaa gɛi ɲinɛn ɲinɛn yɛ too ku hu, yɛ woo ɲɔ̨n damaa ɓo a Yálá laa. |