Zôo 33 - Yálá laawoo hɛɓɛ (dc)1 Ɉobə, ə́ wəli tɔɔ nwoo ɓa a nɛlɛɛ, Ə́ wəli tɔɔ kpɔ a nɛlɛɛ, váá woo kəlee ɓa. 2 Ya ka gáá hvaai, nɛ́n muhəɠə hiɛ li, nwóó tɔɔ hiɛ li. 3 Nu kaa pai mɛ̨nį kɔ́lɔn nwooɠaa ɓoi yɛ́, tɛ̨ą haŋąą ɓə náá wulunŋąą kaa pai moi. 4 Yálá nwɔ nɔ̨ɔ̨i ə doo ɉú, ya ɓə gɛ, gɛ́ kɛ yɛnɛ̨ɛ̨. 5 Akɛ yá pɛli ma, nwóó pulu pənə kani! Mɛ̨nįɠaa kwɛli, ə́ ɉee nwóó tɔwɔ, ə́ kpɔɔ pɛli. 6 Yálá ɲɛ̨i ɓa, gwa yɛ́ gu kaa tɔ̨nɔ̨, ɲą́ą́ gbɛli mąn, di bɛ́li lɔ a pɔlɔ. 7 Ɲɔw hvo too ə́ hu mą́ą́ mɛ̨nį ɓa, Və́ pai ə́ ɲɛ̨i kɔ́w kpɔlii. 8 Kɛlaa, ə́ woo ə too nwə́lii a nɛlɛɛ, ə lɛɛ, gáá lɔ ni ə́ wooi ti mɛ̨n ɉii gíli pɔ, yaai ə́ kɛ la ma: 9 «Hɔn və mą́ą́, nɛ̨ŋɛ̨n və mą́ą́, nwɔ́ mɛ̨nį haŋąąi, hɔn və mą́ą́. 10 Kɛlaa, Yálá aa mɛ̨nįɠaa ɓo a náá, yɛ gáá yɛ ɲowo. 11 Aa gɔ́ɔ́ lɔ kpɔnɔ hu, yɛ gɔ́ɔ́ hvilɛn ɉii tɛitɛi mąąkpɛɛ.» 12 Yili ɓa Ɉobə, ŋą́ kɛ yɛ́ tɛ̨ą hvo ə́ pɔ; mąąhɔlɔɓo, Yálá tɛɛi nu ɓa. 13 Lə mɛ̨nį ɓa ə́ kaa hvaa kwɛlii Yálá ɓa, Yaai hva mɛ̨nį ta pɔɔ kulɔi? 14 Ya pa, Yálá a hvaa a pələ ta, a wala kɛ ti a da kpɛli, kɛlaa, nu hva gbaɠala kaa. 15 Hįį pələ, da mɛ̨nįɠaa lɛ nu ɓa kpinii, ɓɛlɔwai yii kɛnɛ a nua hon na, di ɓo laa ni di wɔ gbinŋąąi ŋa diɛ yii. 16 Nąąlowai, a nu kanŋąą wəli laa ɓo, nąąlowai, yɛ pələ haŋa, yɛ mo diɛ, 17 ə gɛ, nu ə həɠə nwɔ túwɔ́ pələ ɲɔn bulu, ə lɛɛ, diɛ ɲɔw kpɔɔ ŋąą kɛnɛ ɓa. 18 Bələ ɓə a di mąą kpɛ la haa yəi, əlɛɛ yɛ di wɔ yɛnɛ̨ɛ̨ mąą kɔ́nwɔ la kpala tɔwɔ. 19 Kɛlaa lɔwai taɠaa hu, a ɉutɔɔ lɔ nwɔ̨nɔ̨ a mɔ̨nɔ̨ ɓo mɛ̨nįɠaai da həli mą ɲəi gbin ŋą. Ɛlɛɛ, gɔwɠaa diɛ kpəlaan ɉu, di hva kpəla mą. 20 Kɔ̨nɔ̨n ɲɛ ɓaɠi lii tɛ la, ə mą kɛ huwɔ nɛ̨ɛ̨ ɓə, mįi wɛli hva ɉon. 21 Yɛ kpala nuą ɲɛ̨i mu, Gɔwɠaai mąn nuą di hvo kɛi gaa, gəlee da lɛɛ ponoŋą. 22 A kɛ ti, nwɔ yɛnɛ̨ɛ̨ ə ɓo lɔ kɛa lɔwa wəli la, yɛ nwɔ yɛnɛ̨ɛ̨ kɛ, nu nwun na pili hɛnŋąą yee kɔ́n mą. 23 Kɛlaa, ya lɔ ɓaa malaka ta ə lɛɠɛ mą, yii a kɛ a Yálá, da nu kanŋąą di lɔwai pɔn naa kulɔmun, tanɔ̨n di ɉəɠə waa lɔwai, yili a pɛli ə nu hiɛ pələ lɛ mą. 24 Malakai ti a ɲɛ̨i mąąwɛli kaa, yɛ kɛ Yálá ɓa: «Nui ŋɛ̨i mąąhvaalɛɛ, ə ɉəɠə gámą laaləi, Ŋą́ą́ mąąkpɔn mąą ɓo pələ hɔlɔbo.» 25 Akɛ ti, gɔlɔ a pənə ə kɛ yɛ, nąŋą yələ, ə pənə ə kɛ yɛ bələi ə kɛ la a muhəɠə yələ. 26 A Yálá təli, yɛ nwəli tɔɔ nwoo ɓa, a kɛ tomąi a kwəinɛ̨ɛ̨, Yálái a nu kɛ a təlimomun, ɲɛ̨i ɓa. 27 Yɛ́ tomą nuą ɲɛ̨i ɓa, yɛ kɛ diɛ: «Ŋą́ kɛi nɛ̨ŋɛ̨n ɉəɠə, ŋą́ kɛi túwɔ́ pələ ɲɔ̨n gulɔ, Kɛlaa Yálá nwɛi, hvo ɉón ni yɛ pələi ŋą́ túwɔ́ la. 28 Aa nwún mąąɓo kámą yəi, nwɔ́ yɛnɛ̨ɛ̨ yɛ pɛli kɛɛ pono hɔlɔɓoi.» 29 Yáá gaa, Yálá ɓə a mɛ̨nįɠaai ti kəlee kɛ, a gɛ gee mɛi hveelɛ hveelɛ, da haaɓa haaɓa, nu kanŋąą diɛ. 30 Bələ ɓə a nu kulɔ la haa wolo la, Yɛ kɛɛ pono tɛɛ nu huluɠaa pɔ. 31 Ə́ wəli tɔɔ nwóó ɓa a nɛlɛɛ Ɉobə, ə́ nwóó mɛ̨n; Ə́ mɛi haa, ŋą́ pələ ɓo yɛ́. 32 Akɛ nwóó pulu pənə woo kaa ə́ la, mo, mąąhɔlɔɓo, gáá bɔ ŋą́ ə́ kɛ a nui hɔn və ma. 33 Akɛ yili hvəi, ə́ wəli tɔɔ nwóó ɓa, Ə́ mɛi haa, ŋą́ ə́ mąą kwɛli kili mɛ̨nį ɓa. |