Zôo 31 - Yálá laawoo hɛɓɛ (dc)Ɲɔw hvo ɉu tɔɔi Yálá lííla 1 Kwa ɲɛ̨́i kɔ́w ku mįnɛ̨ həɠə, hvo halakpɛla kaa hįį. 2 A wala kɛ ti, lə ɓə kpɔ ŋą́ pɛli mąąkpɔn ɉii Yálá yəi, kwɛlin nəi ɓə Huwalawala Kəlee Nąmu yɛ ə dɛɛ bɔ́ yələi? 3 Kɛlɛi kilikpɛɛgwəi nuą hvɛla lɔ ɓaa nwun na pili-ee? Ɛlɛɛ, mɛ̨nį ɲɔ̨n gɛ nuą di wɛi ə ɓo a ɓɛlɛkpɛɛ mąą? 4 Yálá hvo mɔ̨ɔ̨ dúwɔ́ pələ kaai? Hva mɔ̨ɔ̨ kɛ gɔ́wɔ́ hvilɛn ɉii tɛitɛi lonoi? 5 Akɛ, kwa lɛ́ɛ́ kwaa ta pələ kpɔn, Gɔ́wɔ́ aa ta li mɛ̨nį ɲɔ̨n bɔ pələ, 6 Yálá ə dúwɔ́ pələ kɔ́ɔn tələnmo kilə ŋą, gaa pai nwɔ́ tɛ̨ą kaai. 7 Akɛ, gɔ́wɔ́ aa ta həɠə bələ mɛ̨i, akɛ gíli a hiɛ a ɲɛ̨́i kɔ́w kpaalə. Akɛ ɲéé aa ta too mɛ̨nį ɲɔ̨n ɉu; 8 Akɛti, yii ŋį́ ɉin, ə lɛɛ a nu takpɛli kɔ̨nɔ̨n, di mą́ą́pooɠaa kulɔ a ɉamu. 9 Akɛ nɛ̨ɛ̨nu takpɛli mąą mɛ̨nį aa ta níí kulɔ mą́ą́! Akɛ ŋą́ą́ ta mɛ́lan nwɔ pɛlɛ́ laaləi mąą hɛn! 10 Akɛ ŋą́ą́ gɛ ti, nɛ̨́ą nwɔ kwɛnąi ə lɛɛ a nu takpɛli nwɔɔ, nu takpɛliɠaa di laa la. 11 Mąąhɔlɔɓo, a kɛ ti ɓɛlɛkpɛɛmąą túwɔ́ li, a mɛ̨nį yii a yəli kala nu ɓa. 12 Yili a kɛ kɛ a nwɔ̨n, yii a lɛɛ níi kələn ɉii ə nwún na pili, Ə li nwɔ́ wuluɠaai kəlee paa kpɔ, ə həli la ɉamu ɓa. 13 Akɛ, ŋą́ą́ ta nwɔ́ luwɔ hilɛ ta, a wala kɛ ti, nwɔ́ luwɔ nɛ̨ɛ̨nu ta nwɔ tɛ̨ą mɛ̨nį kpəlaan mɛ̨nį ɓo ta hui, 14 Yálá a muhəɠə, lə ɓə ŋą́ gɛ́? A mą́ą́ləngɛ, ŋą́ kɛ mą lə? 15 Nui lɔ bɛ́li néé kwəi, kɛlɛi yaa lɔ ɓə di pɛli, kɛlɛi Ɲálá tɔ̨nɔ̨i ti lɔ ɓə ku pɛli? 16 A kɛ ŋą́ą́ ta lənə mąąwɛli nuą di wɔ hvɛli ɓo woo ɓa, Ŋą́ą́ ta kalanənŋaa lɛɛ laa di ɲɛ̨i mąą yɛ wɛli, 17 Ɲą́ą́ dɔ̨nɔ̨ ɓə kɛi hee gɔ́nɔ̨n ma, yii təli lon və nwɔɔ hɔlɔɓo li ɉu. 18 Ya pa, múhəɠə yələ, ə kɛ gwɛ́lɛ, yɛ a kɛ a nón Ɛlɛɛ, ŋį́ gbɔwɔ laa kɔ́lɔn nɔ, gɛ́ ɓo a kalanənŋąą tənən dɔɔ mun. 19 Ŋą́ nu kaa kɛ həɠə hvo mą, ŋą́ yeehowolo mun gaa kɛ ɲiihəɠə hvo ɲəi, 20 da hvo kɛi tɛɛ mą́ą́, akɛ hvo mą́mą ɓo li, mąąhɔlɔɓo, ŋą́ą́ kwɛlɛ kpɛ mą. 21 Akɛ ŋą́ą́ ta ɲéé kpuwulu kɛ təli lon ma, gɛ́ li la kiti haɠa ɓa, 22 Mónwón ə kulɔ gbinį ɓa. Ə lɛɛ ɲéé ə tee gbulɔn na. 23 A tɛ̨ą, Yálá nwɔ mɔ̨nɔ̨i aa mą́ą́ ɲɔw, Vá pɛli kɛ mɛ̨nį ta kɛi nwɔ kɛnɛ̨ laa lííla. 24 Akɛ ŋą́ą́ gílitɔɔ hɛni ɓa, akɛ ŋą́ą́ ta kɛ Kúwɔ́-kwɛni ɓa: «Mą́ą́ kpɛ́ hɛn.» 25 Akɛ nwɔ́ kwəinɛ̨ɛ̨ lɔ ɓaa kɛ a ɲə́i hɛn gɔw, a ɉɛnŋąąi ɲéé ə gwɛli, 26 ɓɛlɔwai ŋą́ hvóló nwɔ kɛɛ pɔ̨nɔ̨ kaa la, gɛ́ ɲąnin voló lɛlɛɛ kaa yɛ pa, 27 akɛ yili ta ə́ níí hon, gɛ́ di kaa a nwɔ́ yálá, gɛ́ kwɛli hvilɛn diɛ, 28 Yili ə li kɛ a kiti kala mɛ̨nį mą́ą́ nwun, mąąhɔlɔɓo, ŋį́ li lənə la Yálái yələi mą. 29 Ŋą́ą́ ta ɲówo nwɔ mɔ̨nɔ̨ mįi mɛ̨nį gwəinɛ̨ɛ̨ kulɔ? Ɓɛlɔwai mɛ̨nį ɲąąnwąnąą a laa laa mą, ŋą́ kɛ pilii yələi a kwəinɛ̨ɛ̨? 30 Və́ kpɛli kɛi hvaa mą, naaləi hvo nɛ̨ŋɛ̨n ɉəɠə, nɛ̨ŋɛ̨n naa woo hvo kulɔ ná, ɲówo mąą mɛ̨nį ɓa. 31 Mą́ą́ nwɛ̨ąą di hvo kɛi kɛ diɛ, Gbɛɛ nuą ɓə di hvo pilɛ li huwɔ hu? 32 Nwɛą hvo kɛi yii yɛnɛ̨ɛ̨ bɔ́ɔ́li, Ŋą́ kɛi nwɔ́ pɛlɛ laa ɓo hiɛ kulɔ mun dɔwɔ. 33 Ŋą́ą́ ta ɉɔ́n now yɛ bələi yɛnɛ̨ɛ̨ nuą da gɛ la? Gɛ́ nwɔ́ túwɔ́ pələ ɲɔ̨n now gwə́i? 34 Gɛ́ yili kɛ mąąhɔlɔɓo, və́ laa li nuą woo la, gɛ ɲɔw pɛlɛ takpɛli mu nuą di wɔ ɓɛlɛkpɛɛ mąą ɓa, gɛ́ pɛli náá pilɛi, yii vá kulɔ ɲə́i bɛlɛ́n. 35 Gbɛɛ ɓə pai gɛi, yɛ nwəli tɔɔ nwóó ɓa? Nwóó ɲąą kpɛɛ woo ka ŋɛ̨i gáá moi, Huwalawala Kəlee Nąmu ə bulu pənə. Yii ɓaa ɲaba lɔ wooɠaai ti, 36 Ŋą́ yili kəlee laa nwúɔ̨, gɛ́ ɉee nwún ma yɛ tɔɔ ɓɔlɔ. 37 Gáá pai ɉiɛ pələ tɛitɛi hukulɔi Yálá ɓa, gáá pai naakwiɛn ɉii yɛ tɔɔmun non. 38 Akɛ nwɔ́ lɔi ŋɛ̨i ŋą́ tíi kɛ mą a náá hɛa too, akɛ ŋį́ woolaa too nwɔ́ lɔi la, yɛ wɔlɔ ɲə́i, 39 akɛ ŋą́ kɛ dɔlɔ kulɔi, yii və́ goló kɛ nuą hala li, ə lɛɛ, və́ nɔi naməną mąąwiɛ li, 40 akɛ və́ yili kɛ li tii, mɔ̨nun ŋį́ ɉin, hvo ɓɔn; hihɛn ŋį́ ɉin, hvo ɓɔn, kala tiliin ɲɔ̨nwɔ̨ɔ̨ ə ɓɔn naa. Mɔ̨nun ŋį́ ɉin, hvo ɓɔn kala tiliin ɲɔ̨nwɔ̨ɔ̨ ə ɓɔn naa. Ɉobə hvaa woo kpɛlai ka ti. |