Zôo 30 - Yálá laawoo hɛɓɛ (dc)

¹ Yiihu kɛa, ŋą́ą́ kɛ a yɛlɛ kulɔ ɉu hɛn, muhəɠə nįnɛ̨ɠaa yəi, di hvo kpɛli nwɔ́ nu pɔlɔ laa mąąwiɛi. Ya pa, di nąnni di mąą hvo kpɛli kɛ nɛ̨ɛ̨li nwɔ́ taatɛlɛɛɠaa pulu yilɛɠaa lɔwai.

² Mun hɔlɔɔ, mą́ą́kpaan və kɛ di wɔ hɛn da ɓa. Di wɔ huwalawalalaa hu aa kala.

³ Yeehowololaa da pulu, daa di kpala, diɛ di kɔ̨nɔ̨n gwɛli kpomóɠaa hu, ɓɛi kɔ̨nɔ̨n va hɔlɔɓo laa.

⁴ Kala nwąnąąɠaa ɓə di kɛi gulɔ, kpomói kulaa lɔ ɓə di kɔ̨nɔ̨n ə kɛ ɉu.

⁵ Daa di laa kulɔ yɛnɛ̨ɛ̨ nu kanŋaa lɔwai, diɛ huluun di mɛ̨i yɛ nwuɔ̨ nuą,

⁶ di kɛi di mąąkilɛ kwɛni woloɠaa hu ɓoloonŋaa hu, yee woloɠaa hu.

⁷ Di kɛi di tomą woo mɛ̨n lɔwɔiɠaa, diɛ kpɔn di kee ɓa ɲąąlənŋaa hu,

⁸ Nu kpɛli-kpɛliɠaa, da nuąi laa hvo diɛ di lonnii da di kpɛ nɔi a gbɔnŋaa.

⁹ Ɲą́ą́ ka kɛa ŋą́ą́ kɛ a di lonnii di wɔ wələwoo, ŋą́ą́ kɛ a di wɔ hanwon ɉɔɔ hɛn.

¹⁰ Da gáá, diɛ di laakpan ɲali a ɲą́ą́, diɛ di mąą kwɛa mą́ą́, di mą kɛ di laayá pilii mą́ą́, di mąą hva kpɛlin.

¹¹ Mąąhɔlɔɓo, Yálá aa nwɔ́ kilɛn ɉu haa, aa dóó. Gɛ́ mɛ̨nį pɔlɔɠaa kili hva lɛɛ di ŋą.

¹² Nuą da hɔlɔɓo gwɛ́lɛ nąą kəlee, diɛ dóó pələ kwɛli, da pələ kwɛli, di mɛ̨nį ɲɔ̨n gɛ a ɲą́ą́.

¹³ Daa bú pələ kəlee kulɔ ɲə́i, Kɛlaa, di kaa nwún na pili mɛ̨nį pɔ, nu ta hvo bɔ hvo kpɔnmą́ą́.

¹⁴ Daa wolo tee mą́ą́kpɛ hįį ɓa, diɛ kpuluun diɛ lɔ ɉįi wolo ɓa, diɛ pa bɔ́.

¹⁵ Ɲɔw kɛnɛ̨ aa too ɉú, aa nwɔ́ kilitɔɔmąą həɠə yɛ li la, yɛ hvaŋą a kɛi li a hɛn. Nwɔ́ kilitɔɔmąą aa lɔ sɔɛɛ, yɛ tulɔ kpinįn.

¹⁶ Nwɔ́ yɛnɛ̨ɛ̨ kaa kulɔi ɲə́i yiihu kɛa, mɔ̨nɔ̨ hvóloɠaa daa yili mą́ą́.

¹⁷ Kpinii, mɔ̨nɔ̨ a ɓɔ ɉú, yɛ həli gɔ́w ɓa. Mɔ̨nɔ̨i tii kaa gɔ́w mįi, vii hva kpɛɛ.

¹⁸ Yálá aa ɉón nɔ tɔ̨nɔ̨ kpulu, a gwáną həɠə, ɉəɠə aa gɔ́n ɉon.

¹⁹ Aa dóó pɔlɔ hu, ŋą́ą́ kɛ a palaya da luwu.

²⁰ Gáá tomąi ə́ pɔ pələ, kɛlaa, hvó nwóó pulu pənəi; ŋą́ą́ too ə́ lííla, kɛlaa, ə́ ɲɛ̨i ɓɔɔ ɉú.

²¹ Ə́ kaa ɲɛ̨́i ɓa a báá mun, Yáá ə́ hvaŋą kəlee həɠə, yɛ́ pa woloi la mą́ą́, yɛ́ ɉón a ə́ wɔ yee walawala laa kəlee.

²² Yɛ́ li a ɲą́ą́ hvaŋą hoo mɛ̨i, gɛ́ həɠeen tulɔ ya kɛnɛ̨ hu.

²³ Gílí kaa ɉu, gɛ́, ə́ kaa lii a ɲą́ą́ haa pɔ pələ, yii nu huwu kəlee kaa mąąkpɔn ɉii.

²⁴ Ɓɛlɔwai a ɲee haŋą la nu mɛ̨i, ə mą wala ə́ mąą kɔ́nwɔ̨ mun dəli, ə mą kɛ nwɔ mɛ̨nį nwąnąą kaa ə́ woo kulɔi.

²⁵ Ya pa, nuąi yɛnɛ̨ɛ̨ ə walawala di mɛ̨i, ŋį́ di wɔ wɔlɔ ɓo, mɛ̨nį a laa mąąwɛli nuą diɛ, ɲą́ą́ mun níí yɛ kpəlaan gwə́i.

²⁶ Ɓɛlɔwai, ŋį́ kɛi nwun na nɛ̨ɛ̨ mąą kpɔn na, mɛ̨nį nwąnąą ɓə ŋį́ ɉɔlɔɓo, ŋį́ kɛi kɛɛ pɔ̨nɔ̨ mąą kpɔn, kɛlaa kpinį ɓə pa.

²⁷ Gwə́i kaa lɔ kɛa wulu-wulu, mɔ̨nɔ̨ mįi hvólóɠaa daa həli mą́ą́.

²⁸ Gáá hiɛi bún ɉu, hvóló hvo hɔɔi ŋį́ muhəɠə ŋį́ tɔɔ kpɔn ɉu, gɛ́ wɔlɔ, nu hvo mą́ą́.

²⁹ Ŋą́ą́ kɛ yɛ goɓə, ɛlɛɛ, kwa hɔ̨nwɔ̨nɔ̨gɔɔ ni, ku ɓo ku kee pɔ.

³⁰ Gɔ́lɔ kaa tɛɠii mą́ą́, yɛ tee mą́ą́ yɛ too, gɔ́wɠaa diɛ kpala ɉú, diɛ kələn.

³¹ Haa wələ lɔ ɓə nwɔ́ gwɛnįn a doo, nwɔ́ túlúi yɛ haa wɔlɔ ɓo.