Zôo 3 - Yálá laawoo hɛɓɛ (dc)Ɉobə da mɛlaa haaɓai di lono woo Ɉobə nwɔ woo laa woo 1 Nɔwɔ tɔ̨nɔ̨i tii tɛɛ pulu ɓə Ɉobə, ə hvaa la, ə gaa hvóló nɛ̨ŋɛ̨n naa. 2 Yii Ɉobə ə mo ya ka; yɛ diɛ: 3 Volói ŋɛ̨i di gáá la, naa ə waa mɛlaa hvólóɠaa lɔwai. Gbinįi ŋɛ̨i kɛ diɛ: «Daa lon ɉulɔnu mąą koo həɠə naa ə waa mɛlaa lɔwai.» 4 Volói ti mąą ə pənə a kpinį. Yálái yələi, hvo kɛa giliŋąhiɛ volói ti ɓa. Hvələ-hvələ hɛn da lɔpee hvo hvələ a nwɔ yələi. 5 Tɛɛhilɛ kpinį ə volói ti mɛ̨i kpulu, Tulɔ kpiliɠilin ə volói ti ɲɛ̨i paa. Volói ti hu ə tɛɠi yɛ ɲąąlee a ɲąnin ɉon. 6 Volói ti nwɔ kpinį hu ə pu. Naa hvo lɛɛ kwɛlan nwɔ hvólóɠaa lɔwai. Gbinii ti hvo kwɛdɛn ɲąnin nwɔ hvólóɠaa lɔwai. 7 A tɛ̨ą, gbinįi ti hu ə lɛɛ a gbalaa, lon və hɔlɔɓo la. Kwəinɛ̨ɛ̨ woo hvo tɔɔ gbinįi ti hu. 8 Nɛ̨ŋɛ̨n naa kɛ nuą di vólói tii nɛ̨ŋɛ̨n naa, ə kɛ Nąnį hiɛ hvóló. 9 Gbinii ti hvo yələ ɓɔi pɛmɛ̨lɛ̨n gɔw kaa. Ə kɛɛ pɔ̨nɔ̨ mąą pulu həɠə, hvo ɉɔlɔɓo. Hvo yələɓɔi lɔwai kaa. 10 Mąąhɔlɔɓo, hvo kɛ kpəɲąn ni ɉɔ́lɔɓo mɛ̨nį tɔwɔ, yaai aa gɛ, ɲɛ̨́i yɛ tɔɔ háákələi mɛ̨nį kpɔlui ŋɛ̨i hu. 11 Lə mɛ̨nį ɓa, néé yəi hvo kala li kɛ a ɲą́ą́-oo! Lə mɛ̨nį ɓa və́ kɛ haa li lɔ kɛ gáái lɔwai-yoo! 12 Lə mɛ̨nį ɓa, di náá di kɔ́wɔ mɛ̨i, gɛ́ néé ɲįnį kpələ? 13 Kɛlɛɛi, yɛ mą gáá kɛa laani, nwə́li pulu laɠiɛ gáma hu. Ŋą́ kɛ kɛ yii, gɛ́ ɲą́ą́nɛ̨ɛ̨n gulɔ nwɔ́ hvįįtɔɔ hu. 14 Kwa yɛnɛ̨ɛ̨ tɔɔɓɛlaa da ɉu nu kpɛa kpɛaai daa haa, yiiɠaai daa di kpɔɔ kpinįi kámą pɛli, nu takpɛli nwɛi gboloon mɛ̨i; 15 a wala kɛ ti, kwa tɔɔɓɛlaa lonnii hɛni ə kɛ di yəi, kwəli kɛ ku kee ɓa, diɛi daa di heeiɠaa laahvɛɛ a wali. 16 Awala kɛ ti, yɛ yəi kala lon, náá hvo li kɛ yɛnɛ̨ɛ̨. Yɛ pələi lon yiiɠaai di hvo yɛnɛ̨ɛ̨ kɛɛ pɔ̨nɔ̨ kaa li, di kaa la. 17 Nu a kɛ kámą hu nwɛi, nwąnąlɔ nuą di hva kɛa mɛ̨nį ta laa ma. Naa nwɛi, nuąi di hviikpɛɛ di kaa laa hvįįtɔɔ hu. 18 Ə mą kɛ gaho nąmįną ɓə, da kɛ laa, di lii a kɛ a naa. Di hva kɛa gaho pɛlɛ mɛ̨i kaa mun nwoo mɛ̨n. 19 Naa nwɛi, nu kɛnɛ̨ da lokolo di kɛ pələ pɛliɛi a gee. Luwɔ a kɛ laa, nwun mąą aa ɓo. 20 Lə mɛ̨nį ɓa, Yálá ə hvaa mą, diɛ mąąwɛli nuą hɔlɔɓo a lon? A nuąi pai kɛi lɔ mɔ̨nɔ̨ mįi, mąą nuąi ti diɛ yələ kwələ kaa? 21 Mɔ̨nɔ̨ mįi nuąi ti, di kaa heeni diɛ haa mąą kpɔn, haa hva gɛ hvo pa; Da kɛ haa kwɛlii kpɔ kɛnɛ̨ ə tɛɛ, hɛn gɔw kwɛliɛ ɓa. 22 Akɛ da di laa kámą hu, di kwəi a nɛɛ, diɛ ɓə́lə́n gulɔ. 23 Lə mɛ̨nį ɓa Yálá ə hvaa mą, nui hvo dɔwɔ pələ kaai, yɛ nɔw too ɉu? Mąą nui ti ɓə Yálá a gala tɔɔ mą naa kəlee. 24 Gɔ́nɔn mąą mɔ̨nɔ̨, nwɔ́ woo laa wooɠaa diɛ tɛɛ yɛ ya lee. 25 Mɛ̨nįi ŋį́ kɛi ɲɔw ma, ya ɓə aa həli mą́ą́, mɛ̨nį nwąnąąi ŋį́ kɛi niihɛlɛn ɉee, ya ɓə aa laa mą́ą́. 26 Ɲą́ą́ ka kɛa, və́ gbɔ́ɔ́ ɓa, níí hvo laa li, hvįįtɔɔ hvo ɲə́i, nwɔ́ holi ta lɔ ɓə a laa mɛ̨i. |