Zôo 29 - Yálá laawoo hɛɓɛ (dc)

Ɉobə hvaa woo bow gɔw tanɔ̨n nąą

¹ Nąąlɔwai, Ɉobə ə mo nwɔ̨nɔ̨, yɛ diɛ:

² Gbɛɛ ɓə a pɛli pənəi ə gɛ́ yɛ bələi ŋį́ kɛ la tɔlɔɔ? A ɲələɠaa tii Yálá ə kɛi mɛ̨́i kaa la.

³ Ɓɛlɔwai Yálá nwɔ labon ə kɛi lən na nwún mɛ̨i, ɓɛlɔwai ŋį́ kɛi hiɛ la a kpinį, Yálá nwɔ kɛɛ pɔ̨nɔ̨i yɛ dénən dɔɔ.

⁴ Ɓɛlɔwai, ŋį́ mą́ą́ nulaa kpɛɛ la, ɓɛlɔwai Yálá nwɔ nɛ̨ɛ̨laa ə kɛ la ɲə́i bɛlɛ́n.

⁵ Ɓɛlɔwai Huwalawala Kəlee Nąmu ə kɛ la bɔ́, ɛlɛɛ, nón ɉinąą di ɓo gwɛ́lɛ.

⁶ Ɓɛlɔwai ŋį́ kɛi gɔ́wɔ́ ɓa waa la a wulɔ, ɛlɛɛ, wulɔ kpoloon yɛ laa ɲə́i gɔwɔla.

⁷ Nąąlɔwai, ŋą́ kɛi kɛ kulɔ bələ nwun na, gɛ́ nwɔ́ kpəlin vilɛn gwəli hąąi,

⁸ muhəɠə nįnɛ̨ɠaa da gáá kɛ, di kɛi həɠə dɔ́wɔ, ɉulɔgoloɠaa diɛ haŋą, diɛ tɔɔ, diɛ lɛɛ tɔɔni.

⁹ Galanɉonŋaa diɛ di yee kɛ di woo ɓa, diɛ di yee pɛlɛ di la.

¹⁰ Nɔi nąmįną woo ə kɛi pu di la, di nɛ̨n yɛ kanąn di nɛ̨ŋɛ̨nɛ̨ŋɛ̨n mu.

¹¹ Wəlii lɔpee nwóó ə kɛi too ɉu, ə kɛi mą́ą́tɛnɛ̨, ɲɛ̨i kɔ́wi lɔpee tɔɔ mą́ą́, nwɛ́li ə kɛi too mą.

¹² Mąąhɔlɔɓo, mąąwɛlimun lɔpee kɛi kpɔnmąą kwɛli, ŋį́ kɛi gulɔ ɉu. Gɛ́ kpɔmąą tɛɛ təlilɛa pɔ.

¹³ Nuąi kɛ di haa kɔ́wɔ ŋą, di kɛi lúwɔ́ too mą́ą́. Ɛlɛɛ, ŋį́ ɓo a kalaninŋaa di wɔ kwəinɛ̨ɛ̨.

¹⁴ Tələnmolaa ɓə kɛ a mą́ą́yili həɠə, tɛ̨ą ə ɓo a nwúɔ ɓɔlɔ.

¹⁵ Ŋą́ kɛ a ɲɛ̨ipu nuą ɲɛ̨ikɔw, ŋį́ ɓo a nuąi di kɔ́wɔ tɔ̨nɔ̨ hvo diɛ, di kɔ́wɔ

¹⁶ Ŋį́ kɛ a mąąwɛli nuą di nąn, nui kɔ́lɔn və kɛ mą, gɛ́ mąą mɛ̨nį kɛ.

¹⁷ Ŋį́ kɛi mɛ̨nį ɲɔ̨n gɛ nuą kəlee ɲin ɲali di la, nuąi kɛ mɛ̨nį ɲɔ̨n gɛ ɲin aa di hon, gɛ́ di kulɔ ɲəi kɛ.

¹⁸ Ŋą́ kɛ diɛ: «Ɉáái lɔwai a pa həlii, ŋį́ haa liilaa hu; ɲíí hvóló ə tamą yɛ ɲɛa kɔ́w.

¹⁹ Ɉámu ə hvilɛn yai, nɛn ɲa yɛ nááɠaa yɔwɔ kpinįi.

²⁰ Nwɔ́ mąąwiɛ kaa pai tinɛ̨n ɉii ə pu nįnɛ̨ kɔ́lɔi, nwɔ́ huwalawalai ŋį́ kɛi mɛ̨nį kɛ la, ə lɔ ɲéé ŋą a nįnɛ̨ yɛ kilɛn gbolaan.»

²¹ Da nwóó mɛ̨n gɛ, tin ə kɛi di hon, yii kɛ ŋą́ mo, nu kəlee di kɛi hvaa mą.

²² Ŋą́ kpɛɛ kɛ a mɛ̨nį ta ɓoɔ, nu ta hva bulu həɠə, nwóó ə kɛi too di wəlii tɛitɛi a gɔw.

²³ Di kɛi mą́ą́kpɔn, yɛ bələi da tulɔ mą́ą́kpɔn na, da di laa ɓo kɛ diɛ nwoo mu kpələ, yɛ bələi da tulɔ ya dɔlɔɔ mą́ą́kpɔn na.

²⁴ Ŋą́ yɛlɛ kɛ di ɲɛ̨i, di hvo kɛi laa yili la, di kɛi mą́ą́ kpɛɛ ə gɛ, ŋį́ ɲɛ̨́i lɛlɛɛ hee diɛ.

²⁵ Ŋį́ kɛ heeni di nwun na, gɛ́ di hiɛ kpaalə lɛ diɛ, ŋį́ kɛ di lɔwai yɛ tɔɔmun a kɛ nwɔ nuą lɔwai, gɛ́ ɓo yɛ nui a liikələn gwəi nuą liilaa.

Lean sinn:

Ceanglaichean taic

Sanasan