Zôo 24 - Yálá laawoo hɛɓɛ (dc)

¹ Lə mɛ̨nį ɓa, Huwalawala Kəlee Nąmu hvo kɛ hvóló taɠaa lɛɛ li ɲee pulu, yɛ nwɔ mɛ̨nįɠaa kiti tee la; ɛlɛɛ, nwɛlikɛmąą nuą di kɛ a volóɠaa ti kɔ́lɔn ŋąą?

² Nwąnąlɔ nuą da kɛ lɔi ɲɛ̨n ɉəɠəi naai, daatɛlɛɛɠaai di nwuɔ̨, di hvilɛn ŋąą bulu, diɛ mɛ̨i kaa.

³ Təliɠaa di wɔ hoohvaalənŋąą ɓə daa ɉəɠə diɛ li la, kalanin ɲəi nįŋɛ̨ ɓə da ɉəɠə a tolaa.

⁴ Da mąąwɛli nuą həɠə di kpaalə mɛ̨i, mąąwɛli nuąi di kaa nɔi, di wɛi lɔ ɓaa di di loo.

⁵ Yɛ bələi kɔ̨nɔ̨n mɛ̨nį a gɛ la dɔlɔɔɠaa diɛ húmo koló ɓa, kala tiliinŋąą ɓə a kɛ a di lonnii kɔ̨nɔ̨n.

⁶ Da kɛ kalaɠaa yɛɠɛi yɛaɠaa ɓa, diɛ nwanąlɔ nuą di wɔ viɲə koló kɛ.

⁷ Diɛ kwɛlɛ həɠə kpinįi, həɠə pulu kolo ɓa, kwɛlɛ pai lɔwai, yiihəɠə hva kɛ di yəi.

⁸ Di kaa a tulɔ ya kɔ̨nɔ̨n, da lɔ kwɛni woloi, mąąhɔlɔɓo, di mąąkilɛi hvo di yəi.

⁹ Da ɲįnį kulɔ təliɠaa la, diɛ tolaa həɠə yeehvowolo nuą yəi,

¹⁰ diɛ di lɛɛ a di kpuwulu, həɠə hva kɛ di yəi nui pulu kaa mą, diɛ gɛ a mɔ̨nun diɲɛ̨ mun.

¹¹ Diɛ nuą di wɔ wulɔ kulɔ di yəi gwəliiɠaa diɛ di wɔ lɔɔ ya kulɔ, di hva gɔwɔn, pulu ə ɓo diɛ.

¹² Daai nuą da kɛ di woo laai, nuąi pala aa tee diɛ, diɛ tomą, Kɛlaa, Yálá hva nwəli tɔɔ di woo ɓa.

¹³ Nu ɲɔ̨nwɔ̨ɔ̨ɠaa da ɲɔw kɛɛ pɔ̨nɔ̨ ɓa, di hvo pələ haŋąą kɔ́lɔn, di hva hiɛ pələ haŋąą mɛ̨i.

¹⁴ Nu paa mun a muhəɠə yələwala pɔ, yɛ yeehvowolomun baa, da mąąwɛli mun, kpinį a pɛlɛ, ə gbɔwɔ kɛ a nwuɔ̨ mun.

¹⁵ Wɛli hon mun a kulɔ a hvitili pui lɔwai, yɛ kɛ diɛ: «Nu ta hvo gáái», yɛ həɠə pɛlɛ ɲɛ̨i

¹⁶ Kpini ɓə nwuɔ̨ nuą da wolo ɓɔ la pɛlɛ ɓa, yələ a ɓɔ, diɛ di loo, ə lɛɛ, di hvo kɛɛ pɔ̨nɔ̨ pɔ.

¹⁷ Di wɛi, yələ a kɛi ɓɔ, gaa yɛ haa a kɛi too, too mɛ̨i kɛ mun niiɓa ɓaa kpinį pɛlɛɛ.

¹⁸ Ka wɛi, ka kɛ kɛi diɛ: «Mɛ̨ni ɲɔ̨n gɛ nuą da kɛ tɛɛi yɛ ya, nɔi nuą diɛ nwɔ pɛ́lɛ́i nɛ̨ŋɛ̨n naa, di wɛi, di hva kɛa viɲə yɛa pələ həɠə.

¹⁹ Lɔi da wəleen, da hanwon gbuwulu həɠeen bələ lɔ ɓə ɲąmuątaa a mɛ̨nį ɲɔ̨n gɛ mun gɛ la.

²⁰ Goolon ə kulɔ ɉu, a lɛ̨ą ma, koloɠaa diɛ di liiɓa kɛ ɉu, gili hva kɛa lɛɛ nu ta ŋą, bələ ɓə mɛ̨nį ɲɔ̨n gɛ mun ɉu a yali la, yɛ wulu kpiɛ.

²¹ «Nuąi ti da kpoma nɛ̨ą həɠə, diɛ naanɔ̨nwɔ̨ ɓo. Di hva mɛ̨inɛ̨ɛ̨ kɛ kalanin ma.

²² Yálá ɓə a huwalawala hukala a nwɔ hvaŋą. A muhəɠə, ə lɛɛ nuąi di wɔ yɛnɛ̨ɛ̨ hva kɛa lɛɛ a hɛn da.

²³ Ya pa Yálá a hvaa mą, yɛ nwɔ yɛnɛ̨ɛ̨ kɛ liilaa hu, Kɛlaa, ɲɛ̨i heɛ di hiɛ pələɠaa hu.

²⁴ Di wɛi, da di muhəɠə a lɔwai ta, yili pulu di lɔ lɔ ti. Yili pulu, naa ə tɔɔ tin yɛ da mɔ̨nun dee.»

²⁵ Bələ lɔ ɓə yɛnɛ̨ɛ̨ mɛ̨nį a kɛ la, gbɛɛ ɓə a pɛli da kpɛli ɓoi, gbɛɛ ɓə a pɛli nwóó lɛɛ a kpɛli?