Zôo 22 - Yálá laawoo hɛɓɛ (dc)Elifazə hvaa woo ɉaaɓa naa 1 Nąąlɔwai, Teman mun Elifazə yɛ diɛ: 2 Yálá a mɔ̨ɔ̨ nu huwalawalaa kwɛli, yɛ mąą kanąn dee la? Akɛ a mɛ̨nį kɔ́lɔn mun, gbɔwɔ mąą liihɛlɛn nɔ ɓə a ɉee. 3 Ə́ wɔ tələnmolaa mąą kpaan gaa Huwalawala Kəlee Nąmu ɓa? Yá ə́ hɔn mąą pənə kpɔ, lə ɓə a ɉɔlɔɓo ɉu? 4 A kɛi ə́ mąąkɔ̨nwɔ̨, ɲɔw ɓə mɔ̨ɔ̨ a kɛ moi yɛ? Ka yaa ka káá mɔ̨ɔ̨ pai lii kiti ɓa? 5 A tɛ̨ą, ə́ wɔ mɛ̨nį ɲɔ̨n hu kɛnɛ̨ɛ ɓə. Ə́ wɔ túwɔ́ pələ ɲɔ̨n gbəlai hvo mą. 6 Ə́ kɛi tolaa hɛn ɉəɠə ə́ kaayɔwɔɠaa yəi nwun və kɛ mą, yɛ́ di mąą hɛnŋąą kulɔ diɛ, ə́ di lɛɛ a di kpuwulu. 7 Hvo kpɛli kɛi kpələ wɛli kulɔ nu ɓa, yɛ́ lənə kɔ̨nɔ̨n dɛɛi pulumun bɔ. 8 Lɔi a kɛ yee wala wala mun ɲəi, kpɔɔ ɲąą kɛnɛ̨ nuą diɛ hee ɉu. 9 Yɛ́ kalanənŋąą kpɛ, hɛn da hva kɛ di yəi, yɛ́ təli lonnii yee wolo. 10 Yili mąą mɛ̨nį ɓə ə́ mąą tinɛ̨n ŋąą la, Mąą ɲɔw mɛ̨nį yɛ wolo yɛ́ ə́ tɛɠii. 11 Kpini a pɛlɛ yɛ́, hva kɛɛ kaa, Ya yɛ ə́ mɛ̨i pu. 12 Yálá hvo mɔ̨ɔ̨ yələi pələ, Pɛmɛ̨lɛ̨n gɔwɠaa kaa, pələi di kaa la yələi. 13 Yá kɛ diɛ: «Lə ɓə Yálá ə gɔlɔn? A pɛli mɔ̨ɔ̨ ə kiti tee tulɔ kpinįn bulu? 14 Tulɔ kpinįn gaa mɔ̨ɔ̨ a həɠə ɓɛla, yii Yálá hva pɛli bulu pələ kaai a kɛi hiɛ yələ kwəi?» 15 Ə́ kaa mɔ̨ɔ̨ bɔ ə́ hvilɛn pələ pɔlɔ mɛ̨i, Yaai nwąnąlɔ nuą di kɛi hvilɛn mɛ̨i? 16 Di gbɛa li a diɛ yələ yɛ tɛɠa ɓo, di wɔ pɛlɛ́ kɔ́wɔ hvilɛn ɉiiɠaa kəlee di lɛɛ yai. 17 Diɛi kɛi kɛ Yálá ɓa: «Ə həɠə ku pulu, Lə kpɔ ɓə Huwalawala Kəlee Nąmu a gɛ a kuɔ?» 18 Ya pa, yili ɓə kɛi di wɔ pɛlɛ́ɠaai laahvɛɛ a mɛ̨nį lɛlɛɛ, kɛlaa, daa Yálá laa kulɔ di mąą mɛ̨nįɠaa hu. 19 Tələnmo nuą kaa pai yili naa kaai, diɛ kwəinɛ̨ɛ̨ kulɔ, Nui nwɔ mɛ̨nį haaŋąą, gaa pai yɛ́lɛ́i diɛ, diɛ kɛ diɛ: 20 «Daa ku yowoɠaa hukala, nwɔ̨n aa di wɔ kiliŋąhiɛ ɲɔ̨nwɔ̨ɔ̨ɠaa kəlee kələn.» 21 Ka Yálá ka ka lɔwai pɔn naa pu, ə gɛ liilaa ə kɛ ka lɔwai, a kɛ ti, ə́ kaa pai nwun na nɛ̨ɛ̨ hɔlɔɓoi. 22 Ə́ wəli tɔɔ niɛwooi kulɔi na ma, ə́ nwɔ kili wooɠaai lɛɛ ə́ kili pɔ. 23 Yá pənə yá pa Huwalawala Kəlee Nąmu pɔ, Yɛ́ mɛ̨nį ɲɔ̨n gəlee kulɔ ə́ túwɔ́ pələ hu, yá ə́ kpɔ hɔlɔɓo. 24 Ə́ wɔ hɛni kpuwului too lɔi ɓa, Ə́ bili yai kwɛniɠaa lɔwai, 25 Huwalawala Kəlee Nąmu ɓə pai kɛi a ə́ wɔ hɛni da wali. 26 Nąąlɔwai, Huwalawala Kəlee Nąmu a kɛ a ə́ yəi hɛn gɔw, ə lɛɛ, yɛ́ ə́ ɲɛ̨i tinɛ̨n Yálá pɔ pələ. 27 Yá kɛi vɛli, a ə́ woo mu hon, yii lɔ mąąnɛ̨ɛ̨ ə́ gɛ, ya ɓaa ə́ ə́ woo pɔ mɛ̨nį kɛ. 28 Yá ə́ yee too mɛ̨nį ta hu, ɉu a nɛɛ yɛ́, ə́ tɛɛ pələ kəlee hu yɛ pɔ̨nɔ̨. 29 Ə mą kɛ nuą ɓə daa too, ya pɛli di muhəɠəi, mąąhɔlɔɓo, nui a nwun mąą yɛɛ, a muhəɠə. 30 Ə mą kɛ nui hvo tələnmo li, gaa pai nwun mąąɓoi, nwun mąą a ɓo ə́ wɔ tələnmolaa haalai. |