Zôo 21 - Yálá laawoo hɛɓɛ (dc)Ɉobə hvaa woo mɛ̨ihveelɛnąą 1 Ɉobə ə nwoo ɲąąpənə, yɛ diɛ: 2 Ka ka wəli tɔɔ nwóó ɓa, bələ ɓə ka níí laa la mą́ą́. 3 Ka hvalinɲá, ŋį́ hvaa, ka ma yɛlɛ mą́ą́. 4 Nwɛ́i, nu kan mə mɔ̨ɔ̨ gáá nwóó laai ma? Ŋą́ pɛli kɛa nąą mąąkpɔn ɉii a ɉu kwɛa lə mɛ̨nį ɓa? 5 Ka ka ɲɛ̨i hee lɔ mą́ą́, ka kwəi kaa pai pilii kaa, ka káá pai ka yee pɛlɛi ka la. 6 Ɲą́ą́ gbinįi, ɲá giliŋąhiɛ, ɉú a pu mą́ą́, ə lɛɛ ɉúwɔ hu yɛ kpɛlin. 7 Nu ɲɔ̨nwɔ̨ɔ̨ɠaa da lɛɛ yɛnɛ̨ɛ̨ lə mɛ̨nį ɓa, di pɔlɔ mɛ̨nį yɛ kɛ a di wɔ yee wala wala laa hu kɛnɛ̨ mɛ̨nį? 8 Di huwuhu yɛ kɛnɛ̨, da diɛni diɛ lamun yɛnɛ̨ɛ̨. Di mąnįnni kəlee diɛ kɛnɛ̨ di ɲɛ̨i mu. 9 Di wɔ pɛlɛ́ɠaai di ɓo lii laa hu, di hva ɲɔw mɛ̨nį ta ɓa, ɛlɛɛ, Yálá nwɔ liiholi yɛ di mąą hvaalɛɛ. 10 Di wɔ nįŋɛ̨ hilɛɠaai kwəi nwunŋąą, ɲɔ̨n va di hon; di wɔ nįŋɛ̨ haaɠaai diɛ di kaa da koo hva kulɔ mą. 11 Di lonnii diɛ pələ kɛ yɛ ɓolu lonnii, diɛ pili yələi yɛ lomą lonnii. 12 Diɛ wələ too di mɛ̨i, diɛ damąn da gwɛnįn ɲɔw; diɛ kwəinɛ̨ɛ̨ kulɔ túlu woo ɓa. 13 Di yii hvóló kəlee a kɛ kwəinɛ̨ɛ̨ hu, ɉu hva kwɛa, diɛ yɛɛ ɲąmuątaa. 14 Ya pa di kɛi kɛ Yálá ɓa: «Ə́ mąą kwɛa kuɔ, ə́ wɔ pələi kɔ́lɔn mɛ̨nį mąą kpaan və kuɔ, 15 kɛi da mo yɛ́ Huwalawala Kəlee Nąmu, ə́ kaa bɔ ku kɛ a ə́ wɔ luwɔɠaa? Ə́ hvɛli mɛ̨nį ku yəi nwun maa lə?» 16 Hɛn gəlee hvo mɔ̨ɔ̨ nuąi ti yəi? Túwɔ́ pələ ɲɔ̨n gulɔ nuą di hva mɔ̨ɔ̨ Yálá kulɔ di wɔ kiliŋąhiɛ hu? 17 A kɛ ti, yələ kəlee ɓə mɛ̨nį ɲɔ̨n gɛ nuą di wɔ kpalan a luwun na? Di wɔ mɛ̨nį ɲɔ̨n gɛɛ a too di mɛ̨i? Yálá nwɔ liiholii a di yəi hɛn gəlee hukala? 18 Ya pa, da kɛ kɛi diɛ: «Di kaa yɛ kala kpala yii hvaŋą a ɉəɠə, yɛ mɔ̨nun galai hvaŋą a ɉu taɠa.» 19 Kaa kɛ diɛ: «Yálá a lon gaa nuą di wɔ mɛ̨nį gwələ kulɔ, di lonnii diɛ.» Mąąnɛ̨ɛ̨ Yálá ə diɛ kpinįi di hu tɔɔ, ə lɛɛ di gbaɠala kaa. 20 Diɛ kpinįi di ɲɛ̨i ə tɔɔ di hu kala mɛ̨nį hu, di Huwalawala Kəlee Nąmu nwɔ líiholii kɔ́ɔn di gaa. 21 Ɓɛlɔwai di wɔ lɔwai a kpɛɛ la, nonnii mąą mɛ̨nį niihɛlɛn va kɛa kɛ mą. 22 Yálá ɓə mɔ̨ɔ̨ di kaa pai mąą kwɛlii yɛnɛ̨ɛ̨ kili ɓa? Yaai a malakaɠaa ɲąąwooɓo? 23 Nu taɠaa da haa di hvaŋą kɛnɛ̨ɛ ni, di lii laa diɛ a kwəinɛ̨ɛ̨, 24 di kpulɔn naɠaa kəlee laahvɛɛ a di wulɔ, di kɔ́w kpɔlɔɠaa di ɓo ni a nįnɛ̨. 25 Nu taɠaa diɛ haa, di laahvɛɛ a liikələn gwəi. Di hva yɛnɛ̨ɛ̨ kwəinɛ̨ɛ̨ tɔ̨nɔ̨ kpɛli hɔlɔɓo. 26 Di kəlee da lɔ pɔlɔ mu, kolo ə pu di kəlee di hu. 27 Ŋą́ą́ ka kəlee ka kiliŋąhiɛ pələ kɔ́lɔn, giliŋąhiɛi ka gɛ yɛ hvilɛn mą́ą́, ŋį́ gɔlɔn. 28 Ka káá kɛi diɛ: «Túwɔ́ pələ ɲɔ̨n gulɔ mun nwɔ pɛ́lɛ́i wɔɔ? Bɛlɛi gɛɛ kalamun ti ə kɛ mu, gaa mi?» 29 Ka hvo kpɛli hiɛ kulɔ nuą mąąnin gɛ, mɛ̨nįɠaai di kɛi mo kaa, ka hvo pɛli li laai na? 30 Mɛ̨nį ɲąąnwąnąą yələ, mɛ̨nį ɲɔ̨n gɛ mun maahvaa a lɛɛ, Yálá nwɔ líiɲąnwąną yələ, di ɓo di kwəinɛ̨ɛ̨ hu. 31 Gbɛɛ ɓə a pɛli dúwɔ́ pələ ɲɔ̨n gɛ mun ti túwɔ́ pɛlɛ mąąnin gɛ ma? Yii aa gɛ, gbɛɛ ɓə a pɛli gwələ kulɔi ma? 32 Haa mu a haa, da gbəŋə diɛ li la kámą la, diɛ gámą mąą kpɛ, 33 Nu kəlee di hvilɛn bowa pulu, nu kpulu kɛnɛ̨ ə ɓo bowa ɲɛ̨itɔwɔ, diɛ mɛ̨i kpulu hɛn gɛ a pɔlɔ hunwɔ. 34 Ka wɔ nu liilaa wooi kpɔ ɓaa lə? Ka wɔ woo ɲąąpənə ə ɓo lɔ a lɛɛ woo. |