Zôo 20 - Yálá laawoo hɛɓɛ (dc)

Sofarə hvaa woo veelɛnąą

¹ Nąąlɔwai, Naama mun Sofarə ə mo, yɛ diɛ:

² Liihɛlɛn aa too mą́ą́, mɛ̨nįi gɛi, gɛ́ woo ŋąąpənə kɛ la, yaa li.

³ Yili aa vílɛn pələ mɛ̨i, kɛlaa, nwɔ́ kiliŋąhiɛ kaa bulu pənəi.

⁴ Yii hvo gɔlɔn ya ɓaa: Ɲələi kpɔ nu kan ə lɔ la yɛnɛ̨ɛ̨,

⁵ nu ɲɔ̨nwɔ̨ɔ̨ɠaa di wɔ yeetɛɛmąą laa kaa lɔ a hvóló tɔ́nɔ̨ mɛ̨nį, mɛ̨nį ɲɔ̨n gɛ nuą di wɔ kwəinɛ̨ɛ̨ kaa lɔ a gbuɔ.

⁶ Ə mą kɛ nwun gaa heei yələkɔlɔn ma, ə mą kɛ nwun a həli tulɔ kpinįn ma,

⁷ Gaa pai kpɛɛi lɔ yɛ nwɔ hįį pulu, ɲali bulu hva kɛ mą. Nuąi kɛi gaa, diɛ kɛ diɛ: «A kɛ ti gaa kɛa mi?»

⁸ Gaa pai kpɛɛi lɔ nuą ɲɛ̨i yɛ hį́i mɛ̨nį, Gbɛɛ ɓə kɛa pai ɲɛ̨i tɔɔi mą, gaa pai kɛi lii yɛ nu a kɛi hį́i kaa a kpinįi.

⁹ Ɲɛi kɔ́w kɛi gaa, da hva kɛa gaa, ə mą kɛ bɛlɛi ə kɛ mu, yili hva kɛa ɲɛ̨i tɔɔ mą.

¹⁰ Nonnii kaa pai yeehvowolo nuą yee kulɔ hvɛla tɛɛi di pɔ. Gbɔwɔ yee yɛ kwələ kulɔ hɛnŋąą həɠə, ɲəi hɛn gɔw hu.

¹¹ Ə kɛi gbɔwɔ kaa a nu nwųnų, hvaŋą ə ɓo gɔwɠaa hu, Kɛlaa, da diɛni di kaa pai laai pɔlɔ hu a gee.

¹² Mąąhɔlɔɓo, mɛ̨nį ɲɔ̨n nɛɛi kɛ na, ə mɛ̨nį ɲɔ̨n mąą kilɛ nɛn mu.

¹³ A ɲee kanąn ma, hva ɓo mą, yɛ ganąn nɛ̨ŋɛ̨n-nɛ̨ŋɛ̨n mu.

¹⁴ Mɛ̨nį ɲɔ̨n gɛ kilii ti hva kɔ̨nɔ̨n naa ma, a kɛ gwəi yɛ kaalə nwąną.

¹⁵ Ɉɛn gɔwi tii ə gbələ a wea, ya ka ti a maɠi, Yálá kaa pai gulɔi gwəi.

¹⁶ Kaalə nwąną ka ti ə kɛi gbələ, túmu ɲin mə pai baai.

¹⁷ Hvo kɛa pai ɲɛ̨i tɔɔi tɛɛ ya lon ma, da ya kpɛa kpɛaɠaa, da kwɛin nwulɔ, da Nįŋɛ̨ ɲįnį ya mɛ̨i wulɔ.

¹⁸ Ɉɛn ə ɉɔlɔɓo, a pənə ə dɛɛ, hva pɛli mu kpələi, yiiɠaai mąn ə kɛi ɲee pənə di hu, di hvo kɛi kwəinɛ̨ɛ̨ tɛɛ bɔ.

¹⁹ Mąąhɔlɔɓo, ə kɛi mąąwɛli mun giin, yɛ nɛɛ a ɲee howolo, yɛ pɛlɛ nwuɔ̨ yɛ lɔ mu, hva pɛli pɛlɛ tɔɔi.

²⁰ Yii kpɔ gwəi hvo kɛ nɛɛ li mɛ̨nį ta hu, Ɲəi hɛn gɔw tɔ̨nɔ̨ kpɛli hvo pai kulɔi ɉu.

²¹ Nu ta hvo kɛi pu nwɔ mɛ̨nį ɲɔ̨n dɔwɔ, yili ɓa, nwɔ nwun na nɛ̨ɛ̨ hvo pai lamui ɉu.

²² Ɓɛlɔwai kpɔlɔ gaa pai kɛi la nɛɛ hu, nąąlɔwai ɓə mąąwɛli mɛ̨nį a həli la ma, mąąwɛli nuąi kpɔ ə di mɔ̨nɔ̨ ɓo, gəlee da wiɛ ma nąąlɔwai.

²³ Yálá a nwɔ liiholi muhəɠə mɛ̨i nąąlɔwai, níiholi ti ɓə pai kɛi a gɔ̨nɔ̨n, gaa pai pui mɛ̨i, yɛ kɛ a gɔ̨nɔ̨n.

²⁴ Ə mą kɛ nwɔ yee walawala laa a kɛ yɛ kwɛli, ɓala kwɛli a ɓɔ ɉu.

²⁵ Mɛɛkɔw a ɓɔ ɉu, yələ gbaląą ə nii ɓɛla, mąą ɲɔw mɛ̨nį kaa bulu.

²⁶ Mɛ̨nį ɲąąnwąnąą a gulɔ now pələi, nwɔ̨n nu ta hvo doo li, yɛ gələn. Nuąi da lɛɛ ɲəi bɛlɛ́n, mɛ̨nį ɲɔ̨n yɛ di kɛlɛ.

²⁷ Yələkɔlɔn a kala həɠə gɛ mɛ̨nį ɲɔ̨n mɛ̨i, lɔi yɛ pɛlɛ ma a kɔ́.

²⁸ Ɲəi bɛlɛ́n ɉɛn gɔw kəlee a li, yɛ ya, a liiholi yələɠaa.

²⁹ Mɛ̨nįi Yálá a ɉee mɛ̨nį ɲɔ̨n gɛ mun dɔwɔ, yaa li, gwɛlin Yálá a dɛɛ ɓɔ, yaa li.