Zôo 19 - Yálá laawoo hɛɓɛ (dc)

Ɉobə hvaa woo mɛ̨ida naa

¹ Ɉobə ə nwoo ŋapənə, yɛ mą:

² Ka káá pai kpɛlai vįikpɛɛ ɓa mįnɛ̨ lɔwai? Ka káá bɔ ka níí yali gwə́i a ka woo?

³ Kaa nálan kɛa tamąą, Ka hva kpɛli nwumɛ̨ mɔ̨nɔ̨ ɓoi?

⁴ Ə ma kpɛli kɛ ŋą́ą́ túwɔ́ pələ ɲɔ̨n gɛ, Ka wɔɔ ə li kɛ a lə nwɔ́ túwɔ́ pələ ɲɔ̨n ɉu?

⁵ Akɛ ka káá bɔ ka ka kpɔɔ lɛ a mɛ̨nį kɔ́lɔn nuą mą́ą́ mɛ̨nį hu, a mɛ̨nįɠaai ŋį́ nwumɛ̨ ɉu bɛlɛi ka mo nwúɔ,

⁶ Ka gɔlɔn kaa diɛ Yálá ɓə aa nwɔ́ tɛ̨ą mɛ̨nį kpəlaan, aa nwɔ tumɔ kpəlaan a ɲą́ą́.

⁷ Ŋą́ kɛi tomą a liikələn gwəi, hva kpɛli bulu pənə. Ŋą́ tələnmolaa təli, hva pa.

⁸ Aa nwɔ́ pələi too, ə gɛ və́ pa tɛɛ. Aa kpinį pɛlɛ dɛɛ pələ kəlee hu.

⁹ Aa nwɔ́ mąąwiɛ kulɔ mą́ą́. Naa kɛnɛ̨i kɛ mą́ą́, aa gulɔ mą́ą́.

¹⁰ Aa vána kɛɛnąą kəlee ɓa, ə gɛ ŋį́ haa, aa nwɔ kilitɔɔmaa kulɔ a nwun.

¹¹ Nwɔ líiholi aa muhəɠə bɔ́. Aa gáá a ɲowo.

¹² Nwɔ kɔlaɠai aa muhəɠə, diɛ pa bɔ́, diɛ mą́ą́ tinɛ̨n.

¹³ Daa gááyɔɠoa kəlee mąą kwɛa mą́ą́, gɔ́lɔn nuą kəlee diɛ di kpɔɔ kɛ mą́ą́ a nwɛ̨ą.

¹⁴ Nuąi kɛ di lɛɠɛɛ mą́ą́, daa taɠa, ɲə́i bɛlɛ́n nuą daa lɛ̨ą mą́ą́.

¹⁵ Mą́ą́ nwɛ̨ą da nwɔ́ koló kɛ nuą, di kəlee da gáá a nwɛ̨ą. Ŋą́ą́ kɛ kɛa di ɲɛ̨i ɓa a nui mɛlɛ hvo mą.

¹⁶ Ŋą́ nwɔ́ koló kɛ mun dəli kɛa, hva hvaa nwóó mu. Ŋą́ ma dəli woo hu wiɛ.

¹⁷ Nɛ̨́ą hva kpɛli pɛli kɛa niikpələi nɔ̨́ɔ̨ woo mu. Gún ɉeɛ kɛa lei lonnii hu.

¹⁸ Ə mą kɛ hilɛlɛa ɓə, mɛ́lɛ́ a kpɛɛ di kwəi. Ŋą́ múhəɠə lɔ, diɛ huluun mɛ̨́i.

¹⁹ Nwɛ́li aa kpɛɛ nwɛ́li kɛ mąą nuą kəlee diɛ, Yiiɠaai mąn ŋį́ di wɛli la kɛ, gəlee daa di ɲɛ̨i ɲɔ̨nwɔ̨ɔ̨ hee mą́ą́.

²⁰ Gɔ́wɠaa kaa kanąn ɉii ɉúwɔ da gɔ́lɔ́ ɓa, Ŋą́ kulɔ kpɔ ɲin nɔwai a Yálá mɛ̨nį.

²¹ Ka mą́ą́ wɛli kaa, kaai ɓaa mɛ́laa, mąąhɔlɔɓo, Yálá aa ɲee pɛlɛ mą́ą́.

²² Lə mɛ̨nį ɓa ka hvilɛn búlu yɛ Yálá? Ka hvo pilɛ li ɉúwɔ hu?

²³ Ee kə! A pɛli kɛ nwóóɠaai ŋɛ̨i pɛ̨ɛ̨, a kɛ da pɛli kɛ bɛ̨ɛ̨i hɛɓɛ́ hu.

²⁴ Diɛ ɉaɠa kwɛni mɛ̨i a tɔ̨nɔ̨, di howa ya pu ɉu. Diɛ pɛli gɛi yɛ lɛɛ mą a yələ kəlee.

²⁵ Nwɛ́i, gíli kaa ɉu gɛ́ nwún mąąɓomun gaa a vulú, ya ɓə pai kɛi a nu gbəli, ə həɠə lɔi mɛ̨i.

²⁶ Da pa kɛa gɔ́lɔ́i ŋɛ̨i mą́ą́ ɉukalai, gɔ́lɔ́ ɲąą pɛliɛ hu ɓə gáá pai ɲɛ̨́i tɔɔi la Yálá ɓa.

²⁷ Ɲą́ą́ gbinįi, gáá pai ɲɛ̨́i tɔɔi mą, ɲą́ą́ gbinįi kpɔ kpɔɔ, ɲɛ̨i kwəleen a tɔɔ gbinį ɓa, nu takpɛli hvəi, ɲą́ą́ gbinįi kpɔ ɓə pai gaai. Gaa wɛli a too mą́ą́, yɛ gə́lən yɛ nwɔ̨n.

²⁸ Ka káá kɛi mą: «Nui ŋɛ̨i, lə mɛ̨nį takpɛli ɓə kwa pɛli ku naa mą, kuɔ pɛli nwɔ mɔ̨nɔ̨i nwun gɔlɔn ɉii?»

²⁹ Kaa kpinįi ka ɲɔw ɓɔwa kwɛa ɓa, mąąhɔlɔɓo, mɛ̨nį ɲɔ̨n ɉutɔɔ hɛn ni, ə gɛ gɔlɔn kaa: kiti tee mun gaa laa.

« Roimhe

Air adhart »

Bible Society in Guinea-Conakry

Lean sinn:

Ceanglaichean taic

Sanasan