Zôo 18 - Yálá laawoo hɛɓɛ (dc)

Bildadə woo veelɛ naa

¹ Nąąlɔwai, Sua mun Bildadə yɛ diɛ:

² Ə́ kaa pai lɛɛi hvaai ə lɛɛ ɉu mįnɛ̨ lɔwai ə həli? Ə́ kiliŋąhiɛ, ə́ nɛɛ laa kuɔ kpɛli ku pələ ɓo.

³ Lə mɛ̨nį ɓa ə́ kaa ku kaai yɛ ɓowo nuą? Lə mɛ̨nį ɓa kwaa kɛ ə́ ɲɛ̨i ɓa yɛ nuąi di hvo mɛ̨nį kɔ́lɔn?

⁴ Ə́ kaa ə́ kpɔɔ hukalai liiholi hu. Ə́ kaa bɔ lɔi ə lɛɛ a gboloon a ə́ laa pɔɔ? Kwɛniɠaa diɛ həɠə di laai?

⁵ Nu ɲɔ̨nwɔ̨ɔ̨ nwɔ kɛɛ pɔ̨nɔ̨i hu a kpinį, ɲəi bɛlɛ́n nwɔ̨n nən yɛ luwun.

⁶ Nwɔ həɠə pɛ́lɛ́i mu kɛɛ pɔ̨nɔ̨ yɛ pənə a kpinį nabon a ɉee nwun na, yɛ luwun.

⁷ Gɔwɔɠaai kɛ ɉuwalawalaa tɔlɔɔ, gəlee da pu mu, Gaa pai kalin ɉii a gbɔwɔ kiliŋąhiɛ ɲɔ̨nwɔ̨ɔ̨i ti.

⁸ Mąąhɔlɔɓo, ɉiɛ pələ kaa pai dooi kili hɛlɛn ŋą, yɛ bili tumɔ̨ hu.

⁹ Hɛlɛn a ɉon gbulɔn ma, ɲɛliɠaa diɛ ɉon gɔwɔ ɓa.

¹⁰ Di kaa pai hɛlɛn ɉeei lɔi mu dɔwɔ, diɛ kwɛli ɓaalə hee gbaalə hu.

¹¹ Mąąɲɔw mɛ̨nįɠaa kaa pai həlii mą pələ kəlee, diɛ hvilɛn bulu gɔwɔ hvilɛn ɉii tɛi tɛi kəlee.

¹² Yaai kɛ a hvaŋą nąmu, ya ka pulu aa mɛlɛkpɛɛ mą, laanɔ̨nwɔ̨ aa lɛɛ bɔ.

¹³ Gaa pai ɲee ŋą kɔ́lɔ mįi, haa mun dɔlɔɔ yɛ dɔɔtɔɔiɠaa mįi.

¹⁴ Di kaa pai ɉon ɉii ɲəi bɛlɛ́n a wea laa, diɛ li la haaɓɛlaa taa tɔɔmun bɔ.

¹⁵ Ya pɛli kɛa ə́ yii ɲəi bɛlɛ́n, nwɔɔ naa hvəli kɛa, di kaa pai ɲinɛnŋąą kpɛi ɲəi bɛlɛ́n,

¹⁶ ɉamuɠaa diɛ kpala lɔi mu, diɛ nwonwoɠaa kəlee tee mą ɲələi pələi.

¹⁷ Gili a kpɛɛ nɔi hu nuą ŋą, Naa hva kɛa ɓo ɓɛi lɔpee.

¹⁸ Da gulɔ kɛɛ pɔ̨nɔ̨ hu, diɛ bili kpinį hu, naa ə kpɛɛ yɛnɛ̨ɛ̨.

¹⁹ Ɉuwu ta hva kpɛli lɛɛ nwɔ nuą lɔwai. Nu ta hva lɛɛ ɲəi bɛlɛ́n a vulu.

²⁰ Di kaa pai mąą mɛ̨nį mɛ̨n ɉii kɛɛnąą kəlee, yili yɛ nu kəlee mąą ɲɔw, diɛ kɛ diɛ:

²¹ «Yii lɔ a həli toomɛ̨i kɛ mun ma, ya ka ti, ɓɛi di hvo kɛ Yálá kɔ́lɔn nąą, nąą kɛ pələ ka ti.»