Zôo 16 - Yálá laawoo hɛɓɛ (dc)

Nwɔ kɛla kaa yələi

¹ Ɉobə ə nwoo ɲąąpənə kɛ, yɛ diɛ:

² Nwoo taaləi ŋɛ̨i, ŋą́ą́ mɛ̨n laaləi tamąą la. Ka káá yɛ, nu ɲɛ̨i kpala mun, yii a mɔ̨nɔ̨ mįi mun nwɔ mɔ̨nɔ̨ ta laa mɛ̨i, kaa kɛ mą́ą́:

³ «Nwooɠaai ŋɛ̨i ə́ kaa moi yɛ hvaŋą, mįnɛ̨ lɔwai ɓə gaa pai kpɛɛi la? Ɛlɛɛ, lə mɛ̨nį ɓə ə́ lii kpələi, yɛ́ woo ɲąąpənə kɛ nwɔ̨nɔ̨?»

⁴ Ee! Ɲą́ą́ gbɛli, gáá pai nwóó ɲąąlɛi, yɛ bələi lɔ ka káá gɛi la. Mɛ̨nįi ŋɛ̨i naa mą́ą́, akɛ kɛ kaa li, ɲą́ą́ gbɛli, ŋį́ pɛli kɛ ŋį́ woo hukulɔ mąąhəɠɛɛ kɛ kaa, gɛ́ nwún mu pili ka mɛ̨i.

⁵ Kɛlaa, ŋį́ kɛ ka liilaa a nwóó, ŋį́ kɛi náálə́i tumo, yili yɛ ka hvaŋąlɔ.

⁶ Kɛlaa, ŋį́ ma kɛ nwóó hukulɔi, yili hva nwɔ́ mɔ̨nɔ̨i kɔ́lɔ haa ma. Ŋą́ ma nwɔ̨nɔ̨ náá pilɛ, yili ɓə mɔ̨ɔ̨ a ɉəɠə mɛ̨i?

⁷ Kɛlaa a tɛ̨ą, yiihu Yálá aa hvaŋą kpɛɛ ɲə́i. Təɲą li, hɛnŋąąi kpɔ kɛ gwɛ́lɛ́, aa gəlee hukala.

⁸ Yaai ti aa kɛ a nwɔ́ kɛla, aa pɛlɛ mą́ą́, gɔ́lɔ́i ŋɛ̨i yohvai, aa gɛ́ a hɔn mąą mun.

⁹ Yálá nwɔ líiɲąnwąną aa ɉón, yɛ gɔ̨nɔ̨n, vilɛn ŋąą búlu, yɛ ɲin ŋą mįi. Ɲówo yɛ ɲɛ̨i gbɔ́lun gbɔlun gulɔ mą́ą́.

¹⁰ Nuą diɛ di laa taɠa mą́ą́, diɛ nwə́li lɔwa a lalan, daa kpɔn di kee ɓa, diɛ pa woloi mą́ą́.

¹¹ Yálá aa gwɛ́lɛ nu kpoloonŋąą diɛ, aa dɛ́ɛ́ nwąnąlɔ nuą pɔ.

¹² Ŋą́ kɛ kpɔ nɛ́ɛ́ hu, ə pa ə ɉu kala. Ə ɉón a gɔ́n bulu, ə nówa nɔi ɓa. Ɲą́ą́ ɓə ə dɔ́ɔ́ nwɔ mɛ̨ɛ̨kɔwɠaa tɔwɔ.

¹³ Nwɔ mɛ̨ɛ̨kɔwɠaai diɛ tɛɛ nwə́li la, diɛ ɓɔ ɉú, di hva mą́ą́ wɛli kaa, diɛ nwą́ną pu nɔi ɓa.

¹⁴ Diɛ wolo ɓɔ ɉú nąą kəlee, diɛ hvaną mą́ą́ yɛ kɔ́kuláá.

¹⁵ Ŋą́ą́ mąąwɛli həɠə too gwáną. Aa nwɔ́ huwalawala too pɔlɔ hu.

¹⁶ Ŋą́ą́ lɛɛ wɔlɔi ɲɛ̨ikɔw aa kpɔlu. Ɲɛ̨́i yɛ kpinį mą́ą́.

¹⁷ Ya pa yaan, və́ ta mɛ̨nį nwąnąą laa li nu ta ɓa, nwɔ́ Yálá hvɛli woo kəlee haŋąą.

¹⁸ Lɔi, hvo ɲą́mą mɛ̨i kpulu, Ə lɛɛ hɛn da hvo kpəɲąn nwɔ́lɔ woo tɔwɔ.

¹⁹ Yii hui ŋɛ̨i nwɔ̨nɔ̨, nwɔ́ kɛla kaa yələkɔlɔn ɉu, nui gáá a dɔ́ɔ́ búlu, gaa hɛn gəlee nwun mɛ̨i.

²⁰ Mə́laa kaa yɛlɛ kulɔi ɉu, Kɛlaa, Yálá ɓə gáá wɔlɔi mą.

²¹ Ee kə! Akɛ nu ta a pɛli kwa Yálá ku lɔwai mɛ̨nį hutɔɔi! Yɛ bələi da gɛ la nu kanŋaa lɔwai.

²² Mąąhɔlɔɓo, nwɔ́ kɛ yɛnɛ̨ɛ̨ gwɛlan və tamą li, bələi vílɛn ŋąą mɛ̨i, və́ pai búlu pənəi.