Zôo 15 - Yálá laawoo hɛɓɛ (dc)

Elifazə hvaa woo veelɛ naa

¹ Gɛɛ ti Teman mun Elifazə ə mo Ɉobə ɓa, yɛ mą:

² A kɛ ti kilimąą mɛ̨nį ɓaa nu yɛ pələ ɓo lɔ kpɛli kpɛli? Yɛ goo laahvɛɛ a hvaŋą?

³ Yɛ mɛ̨nį kpɛli kpɛli ɓo lɔ nwun və mą? Yɛ pələɠaa ɓo yii yan dɔlɔ hvo mą?

⁴ Yáá lɛɛ kpɔ ɉu, yɛ́ Yálá kɔ́lɔn mɛ̨nį ɓɛlɛkpɛɛ mą, Yɛ́ Yálá mɛ̨nį kɔ́lɔn ŋąą ɓɛlɛ too.

⁵ Ə́ wɔ túwɔ́ pələ ɲɔ̨n gaa kulɔi ə́ la, yɛ́ hvaa a gbąną nuą hvaa pələ.

⁶ Ə́ laaləi ɓə ə́ kiti teei, ɲą́ą́ hvəi. Ə́ kpɔwɔ nɛ̨n gaa ə́ mąą kɛla hvaa ɓoi.

⁷ Ə́ kaa mɔ̨ɔ̨ a Adamə, yaai di gulɔ nu kəlee tɔwɔ? Di ə́ kaa mɔ̨ɔ̨ yeeɠaa tɔwɔ?

⁸ Yaa ta Yálá nwɔ loo mɛ̨nį kɔ́lɔn? Yɛ́ pɛli pilɛi la kili kɛ ɲəi hu?

⁹ Lə mɛ̨nį kpɔ ɓə ə́ gɔlɔn, yaai ku hvo gɔlɔn? Lə mɛ̨nį kpɔ ɓə gbaɠala kaa yɛ́, yaai ku kili hvo ɉu?

¹⁰ Ɓɛ kaa, hulɔgolo mąą pɔlɔɔ kaa gu lɔwai, nu tɔ̨nɔ̨ kaa kwɛlan damą pələ, ə́ nąn nwɛi hvo kpɛli həli li bɔ.

¹¹ Ə́ tɛɠɛ ɓoɔ mɔ̨ɔ̨ Yálá nwɔ nu liilaa mɛ̨nį hu? A nwooɠaai kələi gaa moi yɛ́i?

¹² Lə mɛ̨nį ɓa mɔ̨nɔ̨i ŋɛ̨i kaa ə́ hu pui yɛ́? Lə mɛ̨nį ɓa, ə́ kaa ku kaai gɔwɔyɔɔ?

¹³ Yɛ́ ə́ liiholi Yálá pɔ, woo kpɛa kpɛa diɛ kulɔ ə́ la?

¹⁴ Lə kpɔ ɓaa nu kan, yaai a gbɔwɔ kɛ a nu haŋąą? Lə ɓaa nɛ̨ɛ̨nu kwəi lon, yaai a gbɔwɔ kɛ a tələnmomun?

¹⁵ Yálá hvo kpɛli laa li nwɔ malaka mąąhəɠɛɛɠaa la tɛ̨ɛ̨ tɛ̨ɛ̨, Ə mą kɛ yələkɔlɔn mə, hvo haŋą li ɲɛ̨i mu.

¹⁶ Gu hvo mu kɛ yɛ́i ŋɛ̨i a mąą liɓi mun, ə́ kwə́i kili ɲɔ̨nwɔ̨ɔ̨, yɛ́ mɛ̨nį ɲɔ̨n gbələ, yɛ nu a kɛi ya kpələ.

¹⁷ Ə́ wəli tɔɔ nwóó ɓa, ŋį́ mɛ̨nį ɓo yɛ́; Yii kpɔ ŋį́ gaa, gáá gəlee hukulɔi yɛ́.

¹⁸ Yii kpɔ mɛ̨nį kɔ́lɔn nuą di hvo now mą́ą́, yii di ɉɔlɔɓo di nąnni pɔlɔ-pɔlɔɠaa yəi,

¹⁹ diɛi di nɔi ŋɛ̨i tɛɛ di pɔ a di wɔɔ, diɛi nwɛ̨ą takpɛli hvo lɔ di lɔwai.

²⁰ «Mɛ̨ni ɲɔ̨n gɛ mun nwɔ yɛnɛ̨ɛ̨ kaa lɔ a mɔ̨nɔ̨ mįi, mɛ̨nį ɲɔ̨n gɛ mun nwɔ yɛnɛ̨ɛ̨ kpɛlai kaa mą.

²¹ Maa ɲɔw wooɠaa da too lɔ nwəlii a yələ kəlee, ɓɛlɔwai lɔ a liilaa yɛnɛ̨ɛ̨ hɔlɔɓo la, kɛlɛi nąąlɔwai, ɓə mɛ̨nį kalamun a wolo la ma.

²² Hva giliŋąhiɛ yɛ kɛ gaa pai kulɔi kpinį ɲɔ̨nwɔ̨ɔ̨ yəi. Yaai ɓɔwa kwɛa kaa lɔ gwɛlii.

²³ A kɛ gílɛ həɠəi yɛ gɔ̨nɔ̨n gwɛli, kɛlaa mįnɛ̨ ɓə a ɉɔlɔɓo laa? Gili kaa ɉu yɛ kɛɛnąą kpinɛ̨ɛ̨ ɓə mąąkpɔn ɉii.

²⁴ Ɓɛlɛkpɛɛ mąą da liikələn gwəi ɓə pai mąą ɲɔwi, yɛ tɔɔmun a kɛi nu too gaho ŋa.»

²⁵ Mąąhɔlɔɓo, aa ɲee muhəɠə Yálá ɓa. Yɛ tɔɔ Huwalawala Kəlee Nąmu la.

²⁶ Ə nwun vilɛn, yɛ li woloi ma, Nwɔ kɔ́ kɔ́ hə́məi hu wiɛ pələ ɓa.

²⁷ Mąąhɔlɔɓo, ɲɛ̨i wulɔ kɛnɛ̨i kɛ mą, ə lɛɛ gbili kɔ́lɔn ɲaliɛ.

²⁸ Aa kɛ hee taa kpoloon ɉu, bɛlɛ́ɠaa di ɓo a vowolo, diɛ kɛ di pu.

²⁹ Kɛlaa, nui ti hva pɛli kɛi a hɛn gɔw nąmu, gwɛlin va tɔɔ. Naa hva kɛa tɛ nwɔ lɔi hu.

³⁰ Hvo pai kulɔi haa nwɔ kpinį hu, nwɔ̨n nən a gbuwunŋąą paa, Ɛlɛɛ, Yálá nwɔ hvaŋą kaa pai lííla kwɛa la.

³¹ Hvo gilitɔɔ kpɛli kpɛli ɓa, a kɛ ti, a gbɔwɔ ɓowo. Mąąhɔlɔɓo, vɛla kaa lɔ pai kɛi a ɓowo ɓo.

³² Mɛ̨nįi ti kaa pai laai ma, gɛɛ nwɔ yɛnɛ̨ɛ̨ ŋąą hvo kpɛliɛ. A kɛ yɛ wulu yii gbuwun va kɛa tɔɔ mą,

³³ yɛ viɲə yii ma a lɛɛ a bɛlɛɛ ə pu, yɛ olivə wulu, yii bowa a kulɔ ɲəi.

³⁴ A tɛ̨ą, nu ɲɔ̨nwɔ̨ɔ̨ɠaa di wɔ pɛ́lɛ́i a lɛɛ a gboloon, nui a gbɔwɔ tolaa hee, nwɔ̨n a nwɔ pɛlɛ́ɠaai kələn.

³⁵ Nui a mɛ̨nį ɲɔ̨n ɉee gwəi, a naayɛɛ a mɛ̨nį ɲɔ̨n. Gílíí kɛ mą lon mə a too gwəi.