Zôo 14 - Yálá laawoo hɛɓɛ (dc)Haa mɛ̨nį hva ɉəɠə mą 1 Lon lɔpee nɛ̨ɛ̨nu a gaa, Nwɔ yɛnɛ̨ɛ̨ kaa lɔ a gbuɔ, kɛlaa naahvɛɛ a mɔ̨nɔ̨. 2 Gaa lɔ yɛ wulu powai a kulɔ, yɛ yohva; gaa lɔ yɛ nįnįn, a kulɔ, ɛlɛɛ hva lamun. 3 Yaan, gaa lɔ ti, yɛ́ ə́ ɲɛ̨i pili mɛ̨i. Yaa ɓə yɛ́ gwa yɛ́ gu kiti kɛ? 4 Gbɛɛ kpɔ ɓə laa yɛ pɛli mɛ̨nį ɲɔ̨nwɔ̨ɔ̨, da nɛlɛɛ gulɔ ɉu kɛi yɛ bələi ə́ kaa la? Mąą nu hvo mą! 5 Mąąhɔlɔɓo, nu nwɔ yɛnɛ̨ɛ̨ ɲɛn, naai, nwɔ yɛnɛ̨ɛ̨ ɲąnin gəlee nonon ŋąąi, ə lɛɛ nwɔ yɛnɛ̨ɛ̨ gbəlai ə ɓo mą. 6 Ə́ ɲɛ̨i hee pələ takpɛli, ə́ nɛɛ gbɔ́ɔ́ ɓa, Nwɔ yɛnɛ̨ɛ̨ kaa pai kpɛɛi yɛ hvóló tɔ̨nɔ̨ koló. 7 Kɛlaa, wulu nwɛi, gilitɔɔi kaa mą, da dee lɔ, mąą ə pənə ə poo. Ɛlɛɛ, maapoo yɛ lamun. 8 Ə mą kɛ, ɉamu aa lamun lɔi mu, ə mą kɛ nwungbə mɛ̨i aa kpala, 9 Ya lɔ ɓaa ya a pu mą, mąą a ma poo, maapoo yɛ tɛ yɛ wulu ɓɔn nįnɛ̨. 10 Kɛlaa, nu kan nwɛi a haa, a lɛɛ lɔ ti, nu a haa, di hva gɛi kaa. 11 Gboloyá a pɛli kpalai, ya kpɛa kpɛa diɛ kpala, muluun yɛ too, 12 bələ lɔ ɓə nu a haa la, hva pənə hvo nwun. Ə lɛɛ ɉu yələkɔlɔn ə tɛɛ la, di hvo pai di muhəɠəi. Di hvo pai pənəi di hvo nwun. 13 Akɛ yá pɛli kɛ nówii lɔi mu, Yá pɛli kɛ mą́ą́kilɛi, ə lɛɛ ɉu ə́ wɔ liiholii ə tɛɛ, akɛ yá pɛli kɛ kuu tɔɔi mą́ą́, ɓɛlɔwai gíli a too la ə́ ŋą. 14 Kɛlaa, nu kan a haa, a pənə ə nwun? Nwɔ́ mɔ̨nɔ̨i hu, ŋą́ pɛli kɛ nąą mąąkpɔn ɉii, ə lɛɛ ɉu mą́ą́hvalin ɲələ ə həli. 15 Yá pɛli kɛ də́lii, gɛ́ ə́ woo mu hon. Yá pɛli kɛ ə́ ə́ yee kɛ kolóɠaa kaa. 16 Kɛlaa, ya ka yiihu, ya kɛ ɉíɛ pələ tɛitɛi kəlee lonoi. Mąą hvo kɛ nɛ̨ɛ̨li, hvo nwɔ́ túwɔ́ pələ ɲɔ̨n ɉee ə́ kwəi. 17 Yá pɛli kɛ nwɔ́ túwɔ́ pələ ɲɔ̨n nooii, ɓíi laa kpulɔɔ hu, Yá pɛli kɛ ə́ nwɔ́ túwɔ́ pələ ɲɔ̨n mɛ̨i kpulu. 18 Yeeɠaa da ɓuwɔ, diɛ taɠa, kwɛni kpuwulu yɛ kulɔ naai. 19 Ya a pɛli kwɛniɠaa ɓuwɔi, yɛ gbaalə laa lɔi hu. Bələ ɓə yáá nwɔ́ kilitɔɔmąą laa hu kala la, 20 Yáá gɔ́ kala mą, aa li. Yáá ɲɛ̨i paa, yɛ́ gbɛ. 21 Mąąwiɛ ə mą kɛa kɛ nonnii diɛ, hvo gbaɠala kɔ́lɔn, yagalan a hvə diɛ, gbaɠala hvo mą. 22 A lɛɛ lɔ mɔ̨nɔ̨ mįi ɉuwɔ mu yaa tɔ́nɔ̨, yɛ liikələn gwəi həɠə. |