Zôo 13 - Yálá laawoo hɛɓɛ (dc)

Ɉobə kaa bɔ da Yálá di mɛ̨nį ɓo

¹ A tɛ̨ą, ɲɛ̨́i aa tɔɔ mɛ̨nįɠaai ti kəlee hu, nwə́li aa di mɛ̨n, ɛlɛɛ, aa di kpaɠala kaa.

² Yii kpɔ ka gɔlɔn, ɲą́ą́ gbɛli ŋį́ gɔlɔn nɔ, ɉú hvo pu li mą́ą́ hvo tɛɛ kaa.

³ Kɛlaa nwɛ́i, Huwalawala Kəlee Nąmu ɓə, gɛ́ ŋį́ pələ ɓo mą, Yálá ɓə gɛ́ ŋį́ mąąkɔ̨nwɔ̨ ɲəi.

⁴ Ka wɛi, ka káá lɔ a lɛɛ kpɛtɛ nuą, ka káá lɔ a yɔwɔtɔlɔɔ gbɛliɠaa.

⁵ Gbɛɛ ɓə pai ka laa kpului lɔ ɓu? Yili a kili tɛɛ kɛ ka pɔ.

⁶ Ka ka wəli tɔɔ kɛa mą́ą́kɔ̨nwɔ̨ woo ɓa, mą́ą́kɔ̨nwɔ̨ wooɠaai pai kulɔi ná, ka ka wəli tɔɔ diɛ.

⁷ A kɛ ti, nwɔ́ Yálái laa hu ɓə ka káá ɉu pu wooɠaai ŋɛ̨i ɓoi la? Kaa nu ɓowo wooɠaai ŋɛ̨i ɓoi mąą mɛ̨nį ɓa?

⁸ Ya ɓə ka káá tɔɔi bulu? A kɛ ti Yálá ɓə mɔ̨ɔ̨ ka káá hvaai a naa?

⁹ A ka hukɔɔn gɛ, ə li tɛ̨ą kaa? Ka gɔlɔn kaa, di hva Yálá ɓowo, yɛ bələi da nu kan mowo la?

¹⁰ A pɛli kɛ haŋąi kaa a tɛ̨ą, yɛ kaa ka kwəi loo mą́ą́.

¹¹ Yálá nwɔ kɛnɛ̨ laa hva mɔ̨ɔ̨ ka mąą ɲɔw? Nwɔ liiholi hvo pai mɔ̨ɔ̨ tooi kɛa mɛ̨i?

¹² Ka wɔ woo hukulɔ woo kaa lɔ yɛ luwu kpolo ya, ka wɔ nu mąąkɔ̨nwɔ̨ woo ə ɓo lɔ yɛ ləɠi pɔlɔ.

¹³ Ka ka mɛ̨i haa, ka nɛ́ɛ́ laa ŋį́ hvaa! Yii lɔpee a həli mą́ą́, ka wɔ hvo ɉu.

¹⁴ Əma kɛ ɉúwɔ yɛ ə lɔ ɲín nɔwai, əma kɛ nwɔ́ yɛnɛ̨ɛ̨ kəlee aa pu ɲéé ŋą;

¹⁵ Yálá ka kiɛ pai báái, gíli hvo tɔɔ li hɛn da kpɛli ɓa. Ə mą kɛ ti, gáá lɔ pai ɉíɛ pələ hukulɔi ma.

¹⁶ Yálá kaa kiɛ pai kɛi a nwun mąąɓo mɛ̨nį? Mąąhɔlɔɓo, túwɔ́ pələ ɲɔ̨n gulɔ mun da heei hvo bɔɔ li.

¹⁷ Ka ka wəli tɔɔ nwóó ɓa, nwɔ́ pələ ɓo woo ə too ka wəlii.

¹⁸ Ya ka ŋɛ̨i ku kaa lii kiti haɠa ɓa. Ŋą́ gɔlɔn gɛ́ giti kaa pai nɛɛi mą́ą́.

¹⁹ Gbɛɛ ɓə yɛ ə kiti pɛlɛ mą́ą́? Váái ma ŋį́ mɛ̨́i haa, ŋį́ haa.

²⁰ Nwɔ́ Yálá, mɛ̨nį hveelɛ lɔ ɓə gáá vɛlii yɛ́, a kɛ ti, gáá pai kpɛlai nów mɛ̨nį ɓa yɛ́:

²¹ Ə́ wɔ mɔ̨nɔ̨i mąą kwɛa mą́ą́, hvo kɛa mą́ą́ ɲɔw a mɛ̨nį ɲɔ̨n.

²² Yili pulu, də́li, ə lɛɛ ŋį́ ə́ woo pulu pənə, a wala kɛ ti, ŋą́ hvaa, ə́ nwóó mu hon.

²³ Nwɔ́ nɛ̨ŋɛ̨n, da nwɔ́ túwɔ́ pələ ɲɔ̨n gaa yɛli? Gɛ́ ə́ ɉɔ́nŋaai tii lɛ mą́ą́.

²⁴ Yá ə́ ɲɛ̨i loo mą́ą́ lə mɛ̨nį ɓa? Ɛlɛɛ, yɛ́ gáá a ə́ yowo.

²⁵ Ə́ kaa bɔ ə́ laakpala mąą ɲɔw, yai hvaŋą kaa lííla? Yɛ́ mɔ̨ɔ̨ ə́ hvilɛn dɛ̨ɛ̨ kpalaan bulu?

²⁶ Mąąhɔlɔɓo, ə́ kaa mɛ̨nį walawala ɓoi náá mɛ̨i, Yɛ́ nwɔ hulɔnon dúwɔ́ pələ ɲɔ̨nŋaa laa nwúɔ.

²⁷ Yɛ́ gɔ́wɔ́ lɔ kpono hu, Yɛ́ ɉiɛ pələ kəlee mąą hɛn, Yɛ́ gɔ́wɔ́ hvilɛn ɉii tɛitɛi kəlee mąąkpɛɛ.

²⁸ Ya pa, nu kan gaa lɔ yɛ kwɛi luwun, yɛ həɠəi ponin a ɉu tee-tee.

Lean sinn:

Ceanglaichean taic

Sanasan