Zôo 12 - Yálá laawoo hɛɓɛ (dc)

Ɉobə woo nąąn naa

¹ Nąąlɔwai, Ɉobə ə nwoo ŋąąpənə, yɛ diɛ:

² Kaa ɓə kɛa a nɔi nuą laaləi-yo! Ə lɛɛ, ka kili kɛ ɲəi ni ɓə pai haai a gee-o!

³ Ɲą́ą́ gbɛli, ŋį́ tɛ̨ą kɔ́lɔn nɔ yɛ kaa. Gwə́i hvo pili li hvo tɛɛ kaa. Mɛ̨nįɠaai ti ka mo, gbɛɛ kpɔ ɓə hvo gɔlɔn.

⁴ Ŋą́ą́ kɛ a mɛlaa di wɔ yɛlɛ mąą hɛn. Ɲą́ą́i kɛi Yálá təli ə gɛ ə nwóó pulu pənə. Tələnmomun yii hɔn və mą, aa kɛ a yɛnɛ̨ɛ̨ nuą di wɔ yɛlɛ kulɔ ɉu hɛn.

⁵ Nuąi di yii hvóló ɲąąnɛ̨ɛ̨, da kɛ diɛ: «Mąąwɛli mun mąąnɛ̨ɛ̨ lɔ, mɛlɛ ə kɛ a gbɛɛ ma.»

⁶ Nu paa nuą di wɔ pɛ́lɛ́i kaa liilaa hu. Nuąi da Yálá lii kələn gwəi, di ɓo liilaa hu. Diɛi di wɔ Yálá lɔ ɓaa di hvaŋą.

⁷ Kɛlaa, huwɔɠaa da nwɛ̨nįɠaa di mąąnikɛ, di kaa pai kili tɛɛi ə́ pɔ, di ə́ mąą kwɛli mɛ̨nį tamąą ɓa.

⁸ Ka lɔi ka lono kɛ, gaa pai ə́ kiliŋą pɔ̨nɔ̨i. Gboloyá hu hɔwɔleeɠaa, di kaa pai mɛ̨nį tamąą ɓoi yɛ́.

⁹ Mąąhɔlɔɓo, ɉɛnŋąąi ti, nɛlɛ ɓə hvo gɔlɔn, yɛ kɛ Yai-Laa ɓə mɛ̨nįɠaai ti kəlee kɛ.

¹⁰ Ya ɓə hɛn gəlee nɔ̨ɔ̨ kaa ɲəi, ə mą kɛ nu kanŋaa nɔw ɓə.

¹¹ Da mo diɛ kɛ diɛ: wəli a mɛ̨nį mɛ̨n, ə ɉu kpɛ, yɛ bələi nu nɛ̨n a hɛn nɛ̨ɛ̨ kɔ́lɔn na.

¹² Kili mɛ̨nį kaa a nu kpɛa kpɛa di wɔɔ, mɛ̨nį kɔ́lɔn gili ə ɓo a di wɔɔ.

¹³ Kɛlaa, kili mɛ̨nį da mɛ̨nį kɔ́lɔn ŋąą di kaa a Yálá nwɔɔ. Liɛwoo da kili kɛ ɲəi di ɓo a nwɔɔ.

¹⁴ Hɛn Yálá a gala, hva kɛa pənə hvo tɔɔ. Nui a gbulɔn, hva kɛa lɛɛ gbɔwɔ ɓa laa hɔlɔɓo.

¹⁵ A ɲee kɛ tulɔ ɓa, hvóló laa teɛ li a ɲee ɓo mą, a lɔi kulɔ.

¹⁶ Hvaŋą da nwun na nɛ̨ɛ̨, di kaa bɔɔ ŋą. Nui daa ɉəɠə pələ mɛ̨i, da nui ɉəɠə bələ mɛ̨i, di kəlee di kaa Yálá yəi.

¹⁷ A mɛ̨nį kɔ́lɔn nuą kpɛa kpɛa kili həɠə di yəi, Yɛ kiti tee nuą kɛ a ɓowo nuą.

¹⁸ A tɔɔɓɛlaa hąą yili kɔ́lɔ tee di hąą, yɛ yilimaa həɠə yili diɛ.

¹⁹ Yɛ haláá laa həli nuą hvilɛn di kɔ́wɔ kpala ɓa, huwalawalaɠaai di heɛ, yɛ di laa pɛlɛ lɔ tɔ̨nɔ̨.

²⁰ Nuąi di wəlɛɛ pələ ɓo, yɛ di woo tee mɛ̨i, yɛ hulɔgoloɠaa di wɔ mɛ̨nį ŋąą kaa kulɔ di yəi.

²¹ Yɛ nwumɛ̨ tɛ a kalanɉonŋąą, yɛ kulaaɠaa di wɔ kulaa laa kulɔ di yəi.

²² Yɛ ɲąmuątaa nwɔ kpinįi kulɔ ɲəi, yii nooɔ kɛ, yɛ gulɔ pɔ̨nɔ̨ŋa.

²³ A lɔi ɲąąnɛ̨ɛ̨, ə pənə ə nɛɛ a gboloon, a lɔi nuą tamąą, yili ə di kɛ a luwɔɠaa.

²⁴ A lɔi nwun nąmįną kili kpɛɛ di yəi, yɛ di too di nwun ma lɔi pun ɉu, ɓɛi pələ hvo laa.

²⁵ Diɛ di yee pɛlɛ ɓɛ-ɓɛ kpinį hu, ɓɛi kɛɛ pɔ̨nɔ̨ hvo laa, yɛ di tɔɔ takpa-takpa yɛ lɔɔ honŋąą.