Zôna 4 - Yálá laawoo hɛɓɛ (dc)Ɉonasə ə niiɲąnwąną, Yálá ə nwoo ŋąąpənə 1 Yili kaa tii Ɉonasə ə mo, ə nwąną kpɔ mą kɛnɛ̨, ə nii tee. 2 Ə mo Yai-Laa ɓa, yɛ mą: «Yaai-Laa Kɛlɛi mɛ̨nįi ŋį́ kɛi mo ɓɛlɔwai ŋį́ kɛ la bɔ́ lɔi ya ka ee! Mɛ̨nį ŋį́ ɲɔw mą, ŋį́ laa dɔwɔ, gɛ́ pu, gɛ́ li Tarsisə daai yaa li. Mąąhɔlɔɓo ŋį́ gɔlɔn gɛ́ diɛ: ə́ kaa a Yálá yii a mɛ̨inɛ̨ɛ̨ kɛ, ɲɛ̨imąąwɛli kaa yɛ ɓo ɲəi kɛnɛ̨, hva níiholi ɉa, naahvɛɛi a wɛlikɛmąą hvo bɔ hvo mɛ̨nį nwąnąą laa nu ɓa. 3 Yili ɓa, Yai-Laa ɉə́ɠə, mąąhɔlɔɓo, ɉáá hviɛlaɓoɔi gɛ́ɛ́ yɛnɛ̨ɛ̨ ɓa.» 4 Yai-Laa yɛ Ɉonasə ɓa: «Ə́ líiholii ŋɛ̨i ə́ kaa moi, a kɛ tii mɛ̨nį lɛlɛɛ li?» 5 Ɉonasə ə kulɔ Ninivə daai ə li ə tɔɔ voló həɠəi pələ, ə nɛ̨ɛ̨ mą ə kələ ta tɔɔ laa, ə lɔ ə hee mu, ə gɛ, mɛ̨nįi pai kɛi a Ninivə taa, ə nąą kaa. 6 Yai-Laa nwɔ́ Yálá ə hihɛn da ɓɔn, ə kwɛa, ə tɛɛ Ɉonasə ɓa, ə gɛ, nįnįn ə kɛ nwun mɛ̨i, ə nwɔ lii ɲɔ̨n gwəi laa tii hali kɛ. Yili ə Ɉonasə kwəinɛ̨ɛ̨ kpɔ kɛnɛ̨. 7 Kɛlaa, mąą yələ laa ɓoɔ, Yálá ə kolo ta tɛɛ, ə nwului tii paa, ə kpala. 8 Ɓɛlɔwai hvóló ə kulɔ la, Yálá ə hvaŋą ta tɛɛ yɛ həɠə hvóló kulɔi pələ, a gələn ŋąą. Hvóló ə Ɉonasə nwuɔ̨ kələn gbɔ yɛ kɛ ə hvowa. Ə mo yɛ mą: «Ɉáá hviɛlaɓoɔi gɛ́ɛ́ yɛnɛ̨ɛ̨ ɓa.» 9 Yálá ə Ɉonasə mąąnikɛ, yɛ mą: «Nwului tii haa mɛ̨nį ə nwąną yɛ́ lə mɛ̨nį ɓa?» Ɉonasə ə nwoo ŋąąpənə yɛ mą: «Tɛ̨ą kaa bɔ́ ŋį́ kɛ diɛ ɉáá hviɛlaɓoɔi.» 10 Nąąlɔwai Yai-Laa yɛ mą: «Ɉonasə! 'Ə́ wəli tɔɔ; yɛ́ hvəi nwului tii hin, yɛ́ hvəi dɔɔ laa. Ə ɓɔn kpinį tɔ̨nɔ̨ yee mu, bulu ɓa kpinį, ə haa. Kɛlaa yaamun, mąąwɛli aa ə́ hon. 11 Yɛ́ Ɉonasə, hvo kɛ bɔ və́ Ninivə daa lee kɛnɛ̨i tii hu nuą mąąwɛli kaa? Nu kpului daai tii hu, di tɛɛi nu waa nwundɔ̨nɔ̨ ɲee hveelɛ hu, kɛlaa, di hvo kɛ mɛ̨nį lɛlɛɛ kɛ pələ kɔ́lɔn di kpɔɔ ɓa; ə mą kɛ daatɛlɛɛɠaa.» |