Zôna 3 - Yálá laawoo hɛɓɛ (dc)

Ɉonasə ə Yálá lawoo laa həli Ninivə daai

¹ Naa heei veelɛnąą, Yai-Laa ə mo Ɉonasə ɓa, yɛ mą:

² «Ə́ muhəɠə, ə́ li Ninivə daa lee hu; nwɛlɛɛ ŋɛ̨i ŋį́ mo yɛ́, ə́ naa həli diɛ.»

³ Yili nwɛi, Ɉonasə ə lɛɛ Yai-La nwoo mu. Ə muhəɠə, ə hvilɛn bələ ɓa, yɛ li Ninivə daai. Ninivə ə kɛ a taalee kɛnɛ̨ Yálá ɲɛ̨i ɓa, ə həɠə daa bələ tɔ̨nɔ̨ yɛ li bələ tɔ̨nɔ̨, ə kɛ a hvóló haaɓa hiɛ.

⁴ Ɉonasə ə hvóló tɔ̨nɔ̨ hiɛ kɛ daai, yɛ kɛ diɛ: «Aa lɛɛ pulu a hvóló pow-nąąn, Ninivə taa ŋɛ̨i yɛ wolo.»

⁵ Ninivə daai nuą kəlee di Yálá woo tii kaa a tɛ̨ą, di kəlee diɛ diɛ: «Ka gu hin nɔ.» Ə gɔwɔ tɔɔ hɛn gɔw nąmįną diɛ, ə həli la yeehvowolo nuą diɛ, nu kəlee ə mąąwɛli hee ɓo yɛ da haa too nu ɓa.

⁶ Ɓɛlɔwai Ninivə tɔɔmun ə bələ mɛ̨n na, ə həɠə ɲəi dɔɔ kpəlin ɉu, ə nwɔ tɔɔ həɠəi kulɔ gwaną, di kəlee di mąąwɛli hee ɓo.

⁷ Yili pulu ə mo di noloɓo daa nąą kəlee diɛ kɛ mą: «Tɔɔmun da nwɔ ɲɛ̨itɔwɔ nuą diɛ: Nui lɔpee ta hvo laa mįi hɛn da mįi, di hvo di kpələ, ə mą kɛ, daatɛlɛɛɠaa kpɛli.

⁸ Nuą, ə mą kɛ daatɛlɛɛɠaa gəlee, nu kəlee ə mąąwɛli hee ɓo. Nu kəlee ə nɛ̨ɛ̨mąą hvə Yálá ɓa a nwɔ huwalawala kəlee. Nu kəlee ə bulu tɔɔ gɛ mɛ̨nį ɲɔ̨n ma, da di wɔ nwąnąlɔ túwɔ́ɠaai.

⁹ Gbəli hu gwa gɛ tii, Yálá kaa pai gu ɲɛ̨imąąwɛli kaai, ə nwɔ liiɲąnwąną həɠə gu mɛ̨i, gu hvo pa haa.»

¹⁰ Yálá ə Ninivə nuą túwɔ́ pələi tii kaa, daa di pulu tɔɔ di túwɔ́ pələ ɲɔ̨nŋąą diɛ; Yálá ə di ɲɛ̨imąąwɛli kaa, ə nwɔ liiɲąnwąną həɠə di mɛ̨i hvo gɛ yɛ pələi ə giliŋąhiɛ la.