Zôna 2 - Yálá laawoo hɛɓɛ (dc)

Ɉonasə nwɔ Yálá hvɛli woo

¹ Yai-Laa ə nɛ̨ɛ̨mą, ə hɔ̨nwɔ̨lee kɛnɛ̨ ta tɔɔ, ə pa ə Ɉonasə kpələ. Hvóló haaɓa, kpįnį haaɓa, ya ɓə Ɉonasə ə gɛ ɉɔ̨nwɔ̨lee tii kwəi.

² Ɉonasə ə lɛɛ ɉɔ̨nwɔ̨lee kwəi, ə nwɔ Yálái hvɛli, yai a Yai-Laa, yɛ mą:

³ Yɛ́ Yai-Laa, ɓɛlɔwai ŋą́ kɛ la ɲɛ̨ikɔw kpɔlu hui, ŋą́ wɔlɔ yɛ́, Ə́ nwóó mu hon; gɛ́ɛ́ haaɓɛlaa taa, ŋą́ ə́ təli, gɛ́ ə́ kpɔnmąą tɛɛ bɔ́ ə́ nwóó mu hon.

⁴ Ə́ bíli gboloyá hu, ŋą́ yɛɛ kpɔ ɲá kpon ɉu, ɲá ə mą́ą́ tinɛ̨n nąą kəlee; ə́ ɲáɠilin da ɲá hvuluun dɛɛ mɛ̨́i.

⁵ Ŋą́ kɛ laa, gɛ́ kɛ gbɔ́wɔ́ ɓa: «Ɲą́ą́ ka ŋɛ̨i kɛa, yáá gbɛ́ ə́ lííla, Kɛlaa, ə mą kɛ tii, gáá pai pənəi ŋą́ lɔ ə́ wɔ pɛlɛ́ mąąhəɠɛɛ mu.»

⁶ Ɲá ə tɛ gwą́ną, gboloyá ə nwún mɛ̨i pu. Ɲái tumɔɠaa di kpįnįn nwún ma

⁷ Ŋą́ yɛɛ kpɔ ŋą́ too ɲá kɔ́w ɓa, ŋąmuątaa pɛlɛ́ laa ə kɛi kɛa kpulu mą́ą́. Kɛlaa, Yai-Laa nwɔ́ Yálá, ə gúlɔ haaɓɛlaa taa, ə gɛ́ a vúlú

⁸ Yai-Laa! Nwɔ Yálá, ɓɛlɔwai nɔ̨ɔ̨ ə kɛi kulɔ la ɲə́i, gíli ə hvilɛn yɛ́, ɛlɛɛ, ə́ hvɛlii ŋą́ mo, nwóó ə həli ə́ wɔ pɛlɛ́ mąąhəɠɛɛi ɓa.

⁹ Nuąi di hvilɛn ŋąąi hali kpɛli-kpɛliɠaa pulu, daa di kpɔwɔ mąą kwɛa ə́ wɔ mɛ̨inɛ̨ɛ̨ ɓa.

¹⁰ Kɛlaa, nwɛ́i, ŋą́ ə́ hɛɠɛɛɓo a wələ woo, ŋą́ haláá kulɔ yɛ́, nwóói ŋą́ gwɛlɛ yɛ́, ŋą́ bɔ mɛ̨ni kɛ. Yai-Laa, yɛ́ ɓə a nu ɓalomun.

¹¹ Nąąlɔwai, Yai-Laa ə mɛ̨ni ɓo ɉɔ̨nwɔ̨lee tii ɓa, ɉɔ̨nwɔ̨lee ə li ə Ɉonasə ɓaɠi gahin ŋą.