Zôna 1 - Yálá laawoo hɛɓɛ (dc)

Ɉonasə ə pu yɛ həɠə Yálá woo tɔwɔ

¹ Ə kɛ a yələ ta, Yai-Laa ə mo Amitai lon ɉulɔnu Ɉonasə ɓa, yɛ mą:

² «Ɉonasə! Ə́ muhəɠə ə́ li Ninivə daa lee kɛnɛ̨i tii hu. 'Li, ə́ haŋą diɛ, yɛ diɛ: ‹Di kɛ mɛ̨nį ɲɔ̨n gun aa həli mą́ą́.›»

³ Ɉonasə ə pu, ə tɛɛ yɛ li Tarsisə daai pələ, ə gɛ, ə now Yai-Laa ɓa. Ɉonasə ə li Ɉafa daai, ə kələn da kaa laa gɛ pələ pɛliɛ kɛa yɛ li Tarsisə daai pələ. Ɉonasə ə gələn ɉala tɛɛ, ə tɛ diɛ li, ə gɛ ə now Yai-Laa ɓa.

⁴ Yai-Laa ə ɓo hvaŋą kɛnɛ̨ ta ɓa, ə hee gələn ma gboloyá ŋą. Vaŋą tɛɛ pələi tii yɛ kɛ kpɔ ə gələn daɠa-taɠa gee ɓa.

⁵ Gələn ɉiɛ nuą di ɲɔw kpɔ kɛnɛ̨, nu kəlee yɛ nwoo laa həli nwɔ Yálái ɓa. Di nɛ̨ɛ̨mą diɛ diɲɛ taɠaa kulɔ gələn ɉu diɛ bili ɲai, ə gɛ, ə lɛɛ howa-howa. Ɉonasə nwɛi, ə yɛɛ gələn gbon ŋą, ə laa yɛ yii kpɔ a mɔlɔ.

⁶ Gələn ɉiɛ nuą nwun nąmu ə lɛɠɛ Ɉonasə ɓa, ə dəli, yɛ mą: «Lə mɛ̨nį ɓa ə́ kaa yii? Ə́ muhəɠə ə́ ə́ woo laa həli ə́ wɔ Yálái ɓa, ə kpɔnmąą tɛɛ gu pɔ! Gbəli hu, gaa pai gu ɲɛ̨imąąwɛli kaai, ə gu kulɔ ɉu gu hva haa.»

⁷ Gələn ɉiɛ nuą di mo di kee ɓa, diɛ mą: «Ka gu ɲee pulu kaa kɛ, ə gɛ, nui gɛi mɛ̨nįi ŋɛ̨i yɛ həli guɔ, gu kɛ a mąą nu kɔ́lɔn ŋąą.» Di ɲee pulu kaa kɛi, ə too Ɉonasə mɛ̨i.

⁸ Di mo kɛa Ɉonasə ɓa diɛ mą: «Yɛ́ ɓə gɛi mɛ̨nį ɲąąnwąnąą ŋɛ̨i yɛ həli kuɔ, ə́ woo hukulɔ kuɔ! Ə́ həɠə nɔi nɛlɛ hu? Hį́i ləi ɓaa yɛ́? Lə ɓə ə́ kaa gɛi ɓɛ?»

⁹ Ɉonasə ə di woo ŋąąpənə, yɛ diɛ: «Gáá a Hebreu mun, Yálái ŋɛ̨i a Yai-Laa yai yələkɔlɔn da lɔi di pɛli, ə mą kɛ gboloyá, ya ɓə ŋį́ ɲɔw mą.»

¹⁰ Yili pulu, Ɉonasə ə gbɔwɔ mąą mɛ̨nį hukulɔ diɛ. Gələn ɉiɛ nuą di ɲɔw kpɔ kɛnɛ̨, gɛ mɛ̨nį Ɉonasə yɛ gaa pui Yai-Laa nwoo tɔwɔ. Nuą tii diɛ mą: «Lə mɛ̨nį ɓa ə́ gɛ tii?

¹¹ Akɛtii, lə ɓə mąąnɛ̨ɛ̨ ku gɛ a yɛ́, ə gɛ, gboloyá kɔ́lɔ ə haa mą?» Mąąhɔlɔɓo, vaŋą tɛɛ pələ ta lɔ ɓə kɛi laa mɛ̨i, gboloyá yɛ gɛ takpa-takpa.

¹² Ɉonasə ə di woo ŋąąpənə yɛ diɛ: «Ka ɉə́ɠə, ka bíli gboloyá hu, gboloyá kɔ́lɔ kaa pai haai mą. Mąąhɔlɔɓo, ɲą́ą́ ɓə gɛi vaŋą kɛnɛ̨i ŋɛ̨i yɛ dɛɛ.»

¹³ Gələn ɉiɛ nuą di gɛ pələ kwɛli mą, ə gɛ, di gələn mąąlɛɠɛ gahin ma, kɛlaa, di hvo pɛli mą. Mąąhɔlɔɓo, gboloyá nwɔ liiɲąnwąną ta lɔ ɓə kɛi laa mɛ̨i.

¹⁴ Nąąlɔwai di wɔlɔ Yai-Laa ɓa, diɛ mą: «Yai-Laa kuɔ mɛ̨nį nąmu, hvo ku nwun napili ɉulɔnui ŋɛ̨i mąą mɛ̨nį ɓa. Ɉulɔnui ŋɛ̨i, hvo mɛ̨nį ta kɛ li a kuɔ, hvo ɉaa nwulu lɛɛ ku nwuɔ̨. Mąąhɔlɔɓo, Yai-Laa, pələi ə́ kɛ la bɔ, bələ ka ŋɛ̨i ə́ gɛ la.»

¹⁵ Di Ɉonasə hon, di bili ɲai, vaŋą kɔ́lɔ ə haa mą.

¹⁶ Nąąlɔwai, di kəlee di ɲɔw kpɔ kɛnɛ̨, di nɛ̨ɛ̨mą di haláá kulɔ Yai-Laa ɓa, di di woo kwɛlɛ mą a di nwąnąi.