Zĩi 3 - Yálá laawoo hɛɓɛ (dc)

Káái nuą mąąkwɛlii, 'ká ká nɛn ɉon

¹ Ną́n nonnii, nu kəlee hvo kɛ, gaa kɛi a mąąkwɛli kɛ nuą, bələi di pai ku kiti teei la a nwalawalaa, ká yili gbaɠala kɔlɔn.

² Gu lan bələ huwu tamąąi. Akɛ nu a wala kɛ lan ɉii vaa woo hui, gaa a nui mąą mɛ̨nį pɛliɛ ɉu, ɲee a pɛli ə gbɔwɔ ɓa.

³ Akɛ gwa kɛ kwɛli too hooɠaa la, di lɛɛ mɛ̨nį ɓa gu woo mui, gwa pɛli di lɔi ɓɛi gu kaa bɔ.

⁴ 'Ká yá-ɲą-kələnŋaa kaa tai, bələi mąn tii di kpɛa-kpɛaa la, ɛlɛɛ, bələi mąn dúlɔ́-hvaŋąɠaa tii da hee la di hu, di kpɛa-kpɛaa la, ɲɛ̨i tənən dɔɔ hɛn gaa lɔ a nogolo tiikpə, da pɛli di lii a diɛ, ɓɛi ɉiɛ nuą da kɛ bɔ.

⁵ Bələ kpɔlɔɔ ɓə, nu nɛn golɔɔ, yɛ gbɔwɔ ɲąą kɛnɛ̨ mɛ̨nį kpɛa-kpɛaa gɛɛ hu. Ká ká kiliŋąhiɛ tai, nwɔ̨n gbaalən nogolo ɓa, a pɛli gbalə kɛnɛ̨ gələn ɉii.

⁶ Nu nɛn yaa kpɛlimąn, gaa yɛ nwɔ̨n, a yɛnɛ̨ɛ̨ mɛ̨nį ɲɔ̨n. Nu nɛn gaa nu tɔɔ-tɔɔɠaa lɔwai, a pɛli ə kɔ́lɔ nąą kəlee mąąliɓi, ya lɔ ɓə a yɛnɛ̨ɛ̨ kələn nu kɔ́wɔ mu yɛ ɉahanąmą.

⁷ Nu kan ɲee a pɛli huwɔ lɔpee gəlee ɓa, ə golohoɓo, ə kɛ a nwɛ̨nį, ə mą kɛ, a tala huwɔ, ə kɛ, a yái-huwɔ lɔpee.

⁸ Kɛlaa, nu nɛn nwɛi, nu yee hva pɛli golohoɓoi. Nu nɛn ɲɔ̨nwɔ̨ɔ̨i, hva laa kpɛ-kpɛ, gaa a pilimąąi ɲąą pənə hvo mą.

⁹ Gu nɛn danɔ̨n tii lɔ ɓə, gwa gu Ną́mu da gu Nąn mąąwiɛ la, yaa lɔ ɓə nwɔ̨nɔ̨ gwa nuą nɛ̨ŋɛ̨n naa la, a diɛi di kaa a Yálá mąąnįnįn.

¹⁰ Naaləi tanɔ̨n tii hu lɔ ɓə, lúwɔ́ da nɛ̨ŋɛ̨n naa da kulɔ laa. Nąn nonnii, bələ hvəə mąą nɛ̨ɛ̨i ə kɛ la.

¹¹ Ya ton danɔ̨n a pɛli mɔ̨ɔ̨, yá-laɠi da yá-hulɔ kulɔi?

¹² Ną́n nonnii, towələ a pɛli mɔ̨ɔ̨ ɓái a gaani? Tɔwɔ kpɔlɔ a pɛli mɔ̨ɔ̨ ɓái a kwɛnɛ̨ɛ̨? Yáton, yá-nwąnąą a kulɔ ɉu, hva pɛli ya-nɛ̨ɛ̨ kulɔi.

Yɛnɛ̨ɛ̨ kili da Yálá pɔ pələ kili

¹³ Gbɛɛ ɓə ká lɔwai a kilimąą mun, a nwun gɛ-ɉumun? Mąą nu ə nwɔ kili mɛ̨nį lɛ dúwɔ́ pələ hu, a kpɔɔ mąą yɛɛ laa.

¹⁴ Kɛlaa, tolo a kɛ ká hu, da wɛlikpɛɛmąą laa, ká hvo ká kpɔwɔ ɲąąkɛnɛ̨, ɛlɛɛ, ká hvo lɛɛ pɛlɛ tɛ̨ą ɓa a ká túwɔ́ pələ.

¹⁵ Gili yili hva həɠə yələi pələ, gaa a lɔi mɛ̨i kili, a huwɔ kili, a ɓilihi kili.

¹⁶ Mąąhɔlɔɓo, ɓɛi tolo kaa laa da wɛlikpɛɛmąą laa, nąą ɓə woo taɠa-taɠa kaa laa da mɛ̨nį ɲɔ̨n gəlee.

¹⁷ Kɛlaa, kilii a həɠə yələi pələ, nwɛi, mąąhəɠɛɛi, yili pulu, niilaa, ɉon nɛlɛɛ, yɛ hvaa kpɛɛ, naahvɛɛ a ɲɛ̨imąąwɛli kaa, hva hu yɛɠɛ kɛ, nɛn və na hveelɛ.

¹⁸ Tələnmo laa ɓá a hin liilaa hu, nuąi liilaa kwɛli di yəi.