Zĩi 2 - Yálá laawoo hɛɓɛ (dc)

'Ká hvo nuą huyɛɠɛ

¹ Ną́n nonnii, káái káá laa gu Nąmu Jesus Kristə mąąwiaa la, 'ká hvo nuą huyɛɠɛ.

² Gbəli hu, nu ta a lɔ ká wɔɔ ɲąąkpɔn hu, ɲee ɓa gbono ə ɓo a hɛni, mąąyiliɛ a nɛlɛɛ; nu takpɛli ə lɔ, a yeehowolomun, mąą hvo yili li a lɛlɛɛ;

³ akɛ, ká ká ɲɛ̨i lɛlɛɛ hee lɔ nui tii mąąyiliɛ a nɛlɛɛ mą, káá kɛ mą: «Yɛ́! 'Pá ə́ hee ɓɛ gbəlin nɛlɛɛ hu»; ɛlɛɛ, káá kɛ ɲeehowolomun tii ɓa: «Ə́ wɛi, tɔɔ ɓɛ!» Awala kɛ tii káá mą: «'Hee ɓɛ gɔ́wɔ́ mu, gbəlin gbuɔ mɛ̨i!»

⁴ Akɛ tii, ká kɛɛ nuą lɔwai tɔɔi hvaa a yili? Ɛlɛɛ, káá nuą kiti teei a ɲąnį pələ?

⁵ Ną́n nonnii, nwɛ́likɛmąą nuą, 'ká ká wəli tɔɔ kpɔ tai a nɛlɛɛ, kɛlɛi nuąi yeehowolo laa hu yɛnɛ̨ɛ̨ ɓɛ, diɛ ɓə Yálá ə di həɠə ɉu, ə di kɛ a hɛn gɔw nąmįną, a Yələkɔlɔn ɉu tɔɔlaa hɔlɔɓo nuą, yai ə naakwɛlanmo nwɛlikɛmąą nuą diɛ-e?

⁶ Kɛlaa, ka wɛi, ká yeehowolomun mɛlɛ too. Kɛlɛi ɉɛn gɔw nąmįną ɓə da kɛ ka mɔ̨nɔ̨ɓoi-e? Kɛlɛi, diɛ lɔ ɓə nwɔ̨nɔ̨, da kɛ lii a káá kiti pɛlɛ́ la-e?.

⁷ Kɛlɛi diɛ lɔ ɓə da kɛ, Naa lɛlɛɛ ká kɛ vɛlii, mąą kun ɲɔ̨n vaa ɓoi-e?

⁸ A tɛ̨ą, akɛ ká dɔɔlaa hu tɔ́n bɔ túwɔ́ ɓo, yɛ bələi ɉɛɓɛ́ ə mo la, yɛ kɛ: «Ə́ ɓɛlan gaalon nwɛli la kɛ yɛ ə́ kpɔwɔ kpinįi, ká túwɔ́ tii, akɛtii, káá gɛ a nɛlɛɛ.»

⁹ Kɛlaa akɛ, huyɛɠɛ kili a kɛ káá, a kɛ ti, ká káá nɛ̨ŋɛ̨n ɉəɠəi dɔ́n ma, ɛlɛɛ, a too ka mɛ̨i.

¹⁰ Yaan, nu a dɔ́n ɉu woo kəlee pɔ túwɔ́ ɓo, ə tɔ̨nɔ̨ kala, a kɛ ti aa gəlee kala.

¹¹ Mąąhɔlɔɓo, nui kɛ diɛ: «'Hvó wɛlikɛ!» Yaa lɔ ɓə nwɔ̨ni kɛ diɛ: «'Hvó nu paa!» Akɛ yá wala wɛlikɛ, yá nu paa, a kɛ ti, yáá dɔ́n gəlee kala.

¹² Yii ká mo, 'ká bɔ mɛ̨nį kɛ. Ká kili ə pu ɉu káá, lɛɛ gbɔwɔ ɓa tɔ́n gaa ká tɔwɔ, yɛ pa ká kiti teei.

¹³ A tɛ̨ą, gitii laa, nui a wala nu ɲɛ̨imąąwɛli kaa, hva mąą nu ɲɛ̨imąąwɛli kaa. Ɲɛ̨imąąwɛli yee tɛɛi kiti ɓa.

Laa na laai bɔ túwɔ́ hvo mą ɉaai

¹⁴ Ną́n nonnii, nu a kɛ diɛ: «Laa na laa kaa ɲə́i», a wala kɛ bɔ túwɔ́ ɓoi, yili dɔlɔ ɓaa a lə? Akɛti, naa na laa yili a pɛli nu nwun mąąɓoi?

¹⁵ Akɛ ká nąn non da, ə kɛ a, nɛ̨ɛ̨nu, ə kɛ a, hulɔnu, mąą a kɛ a ɉaɠaai, kɔ̨nɔ̨n və ɲəi,

¹⁶ ɛlɛɛ, ká ta, yɛ kɛ mąą nuąi tii diɛ: «'Ká li, 'ká ká mąą yili a nɛlɛɛ, 'ká pilɛ», akɛ yii mąą kpaan kaa diɛ, di ɲɛnɛ̨ɛ̨ kɛ la hvo di yəi, ká hvo dɛɛ li di pɔ, yili nwun mąą a lə?

¹⁷ Bələ lɔ ɓə gaa la, laa na laai bɔ túwɔ́ hvo mą, a haa dɔ̨nɔ̨ kon ɉu.

¹⁸ Kɛlaa, nu ta a kɛ yɛ: «Laa na laa kaa ɲəi. Ɛlɛɛ, ɲą́ą́, bɔ túwɔ́ ə ɓo ɲə́i. Ŋą́ kɛ mą: Ə́ wɔɔ laa na laai bɔ túwɔ́ hvo mą, nɛ mą́ą́, ɛlɛɛ, ɲą́ą́ gbɛlimąn, ŋą́ nwɔ́ɔ́ laa na laa lɛ a bɔ túwɔ́.»

¹⁹ Ə́ laai na yɛ́ kɛ, Yálá kaa taanɔ̨n? Yáá gɛ a lɛlɛɛ. Ɲįnɛ̨nŋaa diɛ kpɛlimąn di laai lɔ ti na, ɛlɛɛ, yɛ di mąą kpɛlin.

²⁰ Hupumun, hvo mɔ̨ɔ̨ gbaɠala kɔlɔn yɛ́ kɛ, laa na laai bɔ túwɔ́ hvo mą, gaa a kpɛli-kpɛli?

²¹ Kɛlɛi, gu nąn Abrahamə, ə kɛ a tələnmomun, dúwɔ́ pələ hu-e, a ɓɛlɔwai ə non Isaakə laa la ɉaláá kulɔi-e?

²² Yáá gaa tii, nwɔ laa na laa ə too pono ŋą bɔ túwɔ́ hu. Dúwɔ́ pələɠaa tii ɓə nwɔ laa na laa laa kulɔ,

²³ ɛlɛɛ, mɛ̨nįi ɉɛɓɛ́ ə mo, bɔ mɛ̨nį ə kɛ, yai ə kɛ mą: «Abrahamə, ə laa Yálá la, yili ɓə gɛ a tələnmomun»; ɛlɛɛ, di naa hee a Yálá mɛlan.

²⁴ Káá gaa tii kɛa, nu túwɔ́ pələ ɓə a gɛ a tələnmomun, hva lɛɛ lɔ a laa na laa yaa tanɔ̨n.

²⁵ Bələ lɔ ɓə Rahabə, yai a nwɛlikɛ nɛ̨ɛ̨nui nwɛ̨i ə kɛ la, kɛlɛi dúwɔ́ pələ ɓə ə tələnmolaa hɔlɔɓo ɉu, a ɲee heei ə mo nwɛlɛɛ ɓo nuą mu, ɛlɛɛ, ə di tɛɛ a pələ takpɛli diɛ li-e?

²⁶ Yaan bələ kpɔlɔɔ ɓə gaa la, kɔlɔi nɔ̨ɔ̨ hvə ɉu, ɉaai; laa na laai bɔ túwɔ́ hvo mą, yaa kpɛlimąn, ɉaai.