Zɛnɛse 5 - Yálá laawoo hɛɓɛ (dc)

Ə həɠə Adamə ɓa ə həli la Noe ɓa

¹ Adamə huwuhu nuą laa ka: Ɲələi Yálá ə nu kan bɛli la, ə nu pɛli Yálá mąą nįnįn ɉu.

² Ə hulɔnu da nɛ̨ɛ̨nu di pɛli, Ə lúwɔ́ too diɛ, ə di laa hee a Nu. Ə həɠə di pɛli yələi tii ɓa, di laa ɓaa a: Nu.

³ Adamə kaa kwɛlan ə kɛ a kwɛlan nwun dɔ̨nɔ̨ kwɛlan bow haaɓa, ə lon ɉulɔnu hɔlɔɓo, yai kɛ da yaa di kulaa a di kee. Ə naa hee a Sɛtə.

⁴ Sɛtə hɔlɔɓoɔ pulu, Adamə ə kwɛlan nwun mɛ̨ihaaɓa kɛ lɔi mɛ̨i. Ə lon ɉinąą takpɛliɠaa hɔlɔɓo da lon nɛ̨ąą.

⁵ Adamə kaa kwɛlan gəlee pɛlɛɛ gee ɓa, ə kɛ a: kwɛlan nwun mɛ̨inąąn kwɛlan bow haaɓa. Yili pulu, ə haa.

⁶ Sɛtə kaa kwɛlan ə kɛ a: kwɛlan nwun dɔ̨nɔ̨ kwɛlan nɔɔli, ə lon ɉulɔnu hɔlɔɓo, ə naa hee a Enɔsə.

⁷ Enɔsə kaa pulu, Sɛtə ə kwɛlan nwun mɛ̨ihaaɓa kwɛlan mɛ̨ihveelɛ kɛ. Ə lon ɉinąą takpɛliɠaa hɔlɔɓo da lon nɛ̨ąą.

⁸ Sɛtə kaa kwɛlan gəlee pɛlɛɛ gee ɓa ə kɛ a: kwɛlan nwun mɛ̨inąąn kwɛlan bow kɔ́w hveelɛ. Yili pulu, ə haa.

⁹ Enɔsə kaa kwɛlan ə kɛ a kwɛlan bow mɛ̨inąąn, ə lon ɉulɔnu hɔlɔɓo, ə naa hee a Kenan.

¹⁰ Kenan hɔlɔɓoɔ pulu, Enɔsə ə kwɛlan nwun mɛ̨ihaaɓa kwɛlan bow kɔ́w lɔɔli kɛ. Ə lon ɉinąą takpɛliɠaa hɔlɔɓo da lon nɛ̨ąą.

¹¹ Enɔsə kaa kwɛlan gəlee pɛlɛɛ gee ɓa, ə kɛ a kwɛlan nwun mɛ̨inąąn kwɛlan nɔɔli. Yili pulu, ə haa.

¹² Kenan kaa kwɛlan ə kɛ a: kwɛlan bow mɛ̨ihveelɛ, ə lon ɉulɔnu hɔlɔɓo, ə naa hee a Mahalalɛlə.

¹³ Mahalalɛlə hɔlɔɓoɔ pulu, Kenan ə kwɛlan nwun mɛ̨ihaaɓa kwɛlan bow nąąn gɛ. Ə lon ɉinąą takpɛliɠaa hɔlɔɓo da lon nɛ̨ąą.

¹⁴ Kenan kaa kwɛlan gəlee pɛlɛɛ gee ɓa ə kɛ a kwɛlan nwun mɛ̨inąąn kwɛlan bow. Yili pulu, ə haa.

¹⁵ Mahalalɛlə kaa kwɛlan ə kɛ pow mɛ̨ida kɔ́w lɔɔli, ə lon ɉulɔnu hɔlɔɓo, ə naa hee a Yɛrɛdə.

¹⁶ Yɛrɛdə hɔlɔɓoɔ pulu, Mahalalɛlə ə kwɛlan nwun mɛ̨ihaaɓa kwɛlan bow haaɓa kɛ. Ə lon ɉinąą takpɛliɠaa hɔlɔɓo da lon nɛ̨ąą.

¹⁷ Mahalalɛlə kaa kwɛlan gəlee pɛlɛɛ gee ɓa ə kɛ a kwɛlan nwun mɛ̨ihaaɓa kwɛlan bow mɛ̨inąąn kɔ́w lɔɔli. Yili pulu, ə haa.

¹⁸ Yɛrɛdə kaa kwɛlan ə kɛ a kwɛlan nwun dɔ̨nɔ̨ kwɛlan bow mɛ̨ida kɔ́w hveelɛ, ə lon ɉulɔnu hɔlɔɓo, ə naa hee a Henɔkə.

¹⁹ Henɔkə hɔlɔɓoɔ pulu, Yɛrɛdə ə kwɛlan nwun mɛ̨ihaaɓa kɛ. Ə lon ɉinąą takpɛliɠaa hɔlɔɓo da lon nɛ̨ąą.

²⁰ Yɛrɛdə kaa kwɛlan gəlee pɛlɛɛ gee ɓa, ə kɛ a kwɛlan nwun mɛ̨inąąn kwɛlan bow mɛ̨ida kɔ́w hveelɛ. Yili pulu, ə haa.

²¹ Henɔkə kaa kwɛlan ə kɛ a kwɛlan bow mɛ̨ida kɔ́w lɔɔli, ə lon ɉulɔnu hɔlɔɓo, ə naa hee a Metusəla.

²² Metusəla hɔlɔɓoɔ pulu, Henɔkə ə kwɛlan nwun ɉaaɓa kɛ, da Yálá diɛ nɛ̨ɛ̨yɔwɔ laa kɛ a nɛlɛɛ. Ə lon ɉinąą takpɛliɠaa hɔlɔɓo da lon nɛ̨ąą.

²³ Henɔkə kaa kwɛlan gəlee pɛlɛɛ gee ɓa, ə kɛ a kwɛlan nwun ɉaaɓa kwɛlan bow mɛ̨ida kɔ́w lɔɔli.

²⁴ Henɔkə da Yálá di nɛ̨ɛ̨yɔwɔ laa kɛ, yili pulu, nu ta hvo kɛa gaa. Mąąhɔlɔɓo, Yálá ə ɉəɠə ə nɛɠɛ mą.

²⁵ Metusɛla kaa kwɛlan ə kɛ a kwɛlan nwun dɔ̨nɔ̨ kwɛlan bow mɛ̨ihaaɓa kɔ́w mɛ̨ihveelɛ, ə lon ɉulɔnu hɔlɔɓo, ə naa hee a Lamɛkə.

²⁶ Lamɛkə hɔlɔɓoɔ pulu, Metusɛla ə kwɛlan nwun-mɛ̨ihveelɛ kwɛlan bow mɛ̨ihaaɓa kɔ́w hveelɛ kɛ. Ə lon ɉinąą takpɛliɠaa hɔlɔɓo da lon nɛ̨ąą.

²⁷ Metusɛla kaa kwɛlan gəlee pɛlɛɛ gee ɓa, ə kɛ a kwɛlan nwun mɛ̨inąąn kwɛlan bow mɛ̨ida kɔ́w mɛ̨inąąn. Yili pulu, ə haa.

²⁸ Lamɛkə kaa kwɛlan ə kɛ a kwɛlan nwun dɔ̨nɔ̨ kwɛlan bow mɛ̨ihaaɓa kɔ́w hveelɛ, ə lon ɉulɔnu hɔlɔɓo,

²⁹ ə naa hee a Noe. Ə giliŋąhiɛ, yɛ diɛ: «Nui ŋɛ̨i ɓə pai hvįįtɔɔ tɛɛi ku pɔ, ku kɛ kólóɠaa mąą mɛ̨nį ɓa, lɔi nɛ̨ŋɛ̨n naai ŋɛ̨i Yai-Laa ə mo, mąą mɛ̨ni ɓa.»

³⁰ Noe hɔlɔɓoɔ pulu, Lamɛkə ə kwɛlan nwun nɔɔli kwɛlan bow mɛ̨inąąn kɔ́w lɔɔli kɛ. Ə lon ɉinąą takpɛliɠaa hɔlɔɓo da lon nɛ̨ąą.

³¹ Lamɛkə kaa kwɛlan gəlee pɛlɛɛ gee ɓa ə kɛ a kwɛlan nwun mɛ̨ihveelɛ kwɛlan bow mɛ̨ihveelɛ kɔ́w mɛ̨ihveelɛ. Yili pulu, ə haa.

³² Noe kaa kwɛlan ə kɛ a kwɛlan nwun nɔɔli, ə lon ɉinąą haaɓa hɔlɔɓo; dɔ̨nɔ̨ laa ɓaa: Sɛmə, veelɛnąą, diɛ kɛ mą: Kamə, ɉaaɓanąą, diɛ kɛ mą: Ɉafɛtə.