Zɛnɛse 49 - Yálá laawoo hɛɓɛ (dc)Ɉakɔbə ə lúwɔ́ too nonnii pow kɔ́w hveelɛi diɛ 1 Ɉakɔbə ə nonnii kəlee təli, yɛ dɛ: 'Ka kəlee ka lɛɠɛ mą́ą́, mɛ̨nįi tinąą pai kɛi ŋą́ ɉu kulɔ kaa. 2 'Ka lɛɠɛ ka kee ɓa, Ɉakɔbə lonnii, ka ka wəli tɔɔ. 'Ka ka wəli tɔɔ ka nąn Israɛlə woo ɓa. 3 Yɛ́ Rubɛn, ną́ŋąlon maa a yɛ́, Yɛ́ ɓə tɔlɔɔ ŋį́ ə́ hɔlɔɓo, gɛ́ ɓo kpɔnį bílíbílin ma. Ə́ tɛɛi ə́ ləɠəni diɛ, mąąwiɛ da huwalawalaa hu. 4 Ə́ kaa yɛ ya-ɠilin. Kɛlaa, ə mą kɛ tii, nupɔlɔlaa hva lɛɛ ə́ yəi. Mąąhɔlɔɓo, yáá ə́ nąn mɛlɛkpɛɛ mą; ə́ laa mɛ̨nį ɓa a nɛ̨́ą ɲə́i gbin ŋą. 5 Simeɔn ka Levi, ka káá a lee lon dɔ̨nɔ̨, ka kpɔn ka kee ɓa, ka too mɛ̨i kɛ. 6 Kɛlaa, və́ too ka pɔ, ka wɔ lɔgilii laa hu. Vá too di pɔ di wɔ ɲąąkpɔnŋąą hu. Mąąhɔlɔɓo, di lii ə holi, di paa ɓo kɛ. Di nwąnąlɔ kulɔ a nįŋɛ̨ɠaa diɛ di tɔɔ-tɔɔɠaa tee diɛ. 7 Di wɔ liiholi yee ɉaɉaa mą, nɛ̨ŋɛ̨naa ɓə, ə mą kɛ di wɔ liikələn gwəi laa. Gáá di hukwɛlɛi Ɉakɔbə lonnii lɔwai, Ŋą́ di hu taɠa taɠa Israɛlə nąą kəlee. 8 Ɉuda ə́ wɛi, ə́ kaayɔwɔɠaa da ə́ mąątɛ̨nɛ̨ a wələ woo, ə́ yee a wiɛ ə́ yowoɠaa mɛ̨i, ə́ nąn nonnii da kwɛli hvilɛn yɛ́. 9 Nón Ɉuda! Ə́ kaa yɛ yala a laŋą a nįnɛ̨, nón ɉulɔnu, aa həɠə loɉolaa kɛi! Aa pu nwungbəla, aa pɛlɛ yɛ yala, yɛ yala haa; gbɛɛ ɓə a pɛli muhəɠəi? 10 Tɔɔ tunwɔ̨n hva kulɔ Ɉuda yəi, dɔɔhvili hva kulɔ ə́ yəi bɛlɛ́n, ə lɛɛ ɉu, nui Ɉeeɓolaa kaa a nwɔɔ yɛ pa. A yai tii, hį́i kəlee kaa pai lɛɛi nwoo mu. 11 Gaa pai nwɔ hoohvaalən gbulɔn ɉii viɲə ɓá; yɛ nwɔ hoohvaalən non kpulɔn viɲə kpɔmɔ̨ ɓá. A mąą həɠə waa a lɔɔ, yɛ nwɔ gbaawi mąąhəɠəən viɲə ɲąmą hu. 12 Lɔɔ aa ɲɛ̨i kɔ́w kpɔlu. Ɲin yɛ kwələ yɛ nįŋɛ̨ ɠiniya. 13 Zabulɔn kaa pai heei gboloyá kwɛlɛ, ɓɛi kələn gbɛa-kpɛa da tɔɔ laa. Nwɔ lɔi a həli kpɔ Sidɔn. 14 Isakarə kaa yɛ hoohvaalən, dɔ̨nɔ̨ɔ̨ ɉuwɔ ɓa, yɛ ɓo pɛlɛ́ni gala hveelɛ tinɛ̨ŋąą mą. 15 Aa gaa yɛ, ɓɛi gaa laa, nąą lɛlɛɛi, nąą ɲąą nɛ̨ɛ̨i. Aa ɉɛ̨ą lɛan tiɛ̨ həɠə mɛ̨nį ɓa. Mąąnɛ̨ɛ̨i lɔ luwɔ kóló ɓa. 16 Dan kaa pai nwɔ lɔi hɔlɔɓoi, ə ɲąąwooɓo, yɛ bələi Israɛlə nu huwu yiiɠaa tii kaa la. 17 Dan kaa a pələi kaalə, yɛ pələ kwɛlɛ tumo. Yɛ naa pili hoo wɛlɛ pulu, mɛ̨imun ə too, gɔwɔ ə tɛ mɛ̨i. 18 Gílitɔɔi yɛ́ Yai-Laa málomun! 19 Gadə nwɛi, too mɛ̨i kɛ nuą da wolo mą, ə tinɛ̨n ə wolo diɛ, ə hvilɛn di pulu yɛ di kpɛ. 20 Asɛrə nwɔ lɔi kaa pai kɛi a hihɛn nɛlɛ lɔi, ɉu hɛnŋąa ɓa mąąnɛ̨ɛ̨ a tɔɔmun gɔ̨nɔ̨n gɛ hɛnŋąą. 21 Nɛftali kaa yɛ lomą, yii gaa gbɔwɔ ɓa; yɛ lon nɛlɛɛ kaa. 22 Ɉosɛfə kaa yɛ hihɛn nɛlɛɛ mąąpoo; yai tɔɔni ya ton ma. Gbaɠaɠaa diɛ lan ɉįi kpoloon mɛ̨i. 23 Nuą daa hvaa tee mą, daa gwɛli a hvaa, kilɛn bili nuą diɛ kɔ́ pɛlɛ mą. 24 Kɛlaa, a nwɔ kilɛn hon gbɔ pin pin; a Ɉakɔbə nwɔ hu walawalai hɛn da hva tɔɔ na, Israɛlə mɛ̨i kaa kwɛni laa hu. 25 Ə́ nąn nwɔ Yálá, Ə tɔɔ ə́ pulu, Huwalawala Kəlee Nąmu Yálá Ə lúwɔ́ too yɛ́, lúwɔ́ ə həɠə yələi ə yɛɛ ə́ mɛ̨i, lúwɔ́ ə həɠə lɔi kponɉu ə həli yɛ́, ə́ huwuhu nɛ̨ąą kwəi ə nwun ə́ wɔ taatɛlɛɛɠaai di di kaa. 26 Núwɔ́i ə́ nąn ə doo yɛ́, nwun naŋįnŋąąi, tɔwɔ-tɔwɔ yeeɠaa di wɔ lúwɔ́ mɛ̨i, gɛnɛ̨i dɛɛ ɲeeɠaai wɔlɔ nwɛli kaa nuą diɛ mą. Ɉosɛfə, ə́ nąn nwɔ lúwɔ́ ə yɛɛ ə́ mɛ̨i, ə ə́ kɛ a laa mąą mun ə́ kaayɔwɔɠaa lɔwai. 27 Bɛnɉamɛn kaa yɛ kwɛ́li, yələwala pɔ, a huwɔ hon ə mįi. Yələwulii pɔ, kɔ́ mɛ̨į hɛn a ɉəɠə, a ŋąąkwɛlɛ. 28 Nuąi tii ɓə kɛ a Israɛlə nu huwu pow kɔ́w hveelɛi. Ɓɛlɔwai di nąn ə kɛi lúwɔ́ too la diɛ, nwooɠaai tii ɓə ə mo diɛ. Di nąn ə lúwɔ́ too diɛ a gulaa gee mu. Ɉakɔbə haa mɛ̨nį 29 Ɉakɔbə ə niɛwooi ŋɛ̨i kɛ nonnii diɛ, yɛ diɛ: «Ŋą́ pa pɔlɔi, ka náá ną́nni kwɛlɛ, Hɛtə mun Ɛfrɔn yəi ɲɛa, kwɛni wolo ta kaa laa ɉu, ɓɛi wɔlɔ di ną́nni loo laa. 30 Gwɛni woloi tii gaa Makpela, Mamre taa kwɛlɛ Kanaan lɔi hu. Abrahamə ə wɔlɔ díi tii ya Ɛfrɔn yəi, ə gɛ, gwɛni woloi tii ə lɛɛ a Abrahamə nwɔɔ. 31 Gwɛni woloi tii hu ɓə wɔlɔ di Abrahamə loo laa, ə mą kɛ nɛ̨ą Sara. Nąą lɔ ɓə di Isaakə loo laa, ə mą kɛ nɛ̨ą Rebeka. Ɲą́ą́ Ɉakɔbə, nąą ɓə ŋį́ Lea loo laa. 32 Nɔi tii, da gwɛni woloi gaa ɉu, di wɔlɔ ɲa Hɛtə nuą yəi.» 33 Ɉakɔbə ə kpɛɛ lɔ a niɛwooɠaai tii kɛɛ nonnii diɛ, ə tinɛ̨n, ə laa ə kɛ lɔ kɛa a niɛ nąnni pɔ. |