Zɛnɛse 45 - Yálá laawoo hɛɓɛ (dc)

Ɉosɛfə ə gbɔwɔ lɛ niɛni diɛ

¹ Nąąlɔwai, Ɉosɛfə yee hvo kɛa pɛli niiɓa, nuą tii kɛ laa gwɛlɛ, ə mo diɛ, yɛ diɛ: «Ka kulɔ!» Ɉosɛfə da niɛni diɛ tɔ̨nɔ̨ di lɛɛ kɛa bɛlɛ́n, ə gbɔwɔ lɛ diɛ.

² Ɉosɛfə wɔlɔ pələi tii, Eziptə nuąi ŋɛ̨i kɛ bɛlɛ́ kwɛlɛ, di nwoo mɛ̨n, mɛ̨nįi tii bələ ə həli tɔɔmun ma.

³ Ɉosɛfə yɛ niɛni diɛ: «Ɉosɛfə ɓaa a ɲą́ą́! Ną́n gaa nii a vulú?» Niɛni kwəi pili pələi tii diɛ, di hvo kpɛli pɛli nwoo ŋąąpənəi.

⁴ Ɉosɛfə ə tinɛ̨n yɛ diɛ: «Ka lɛɠɛ kpɔ mą́ą́!» Yiliɠaai di di mąą lɛɠɛ mą. Ɉosɛfə ə pənə yɛ diɛ: «Ɲą́ą́, ka ləɠə Ɉosɛfə, ɲą́ą́ ka tii. Ɲą́ą́ ka tii wɔlɔ ka nɔ́wɔ tɔɔ, diɛ pa a ɲą́ą́ ɓɛ Eziptə lɔi hu.

⁵ Ka kwəi hvo pili kaa, ɛlɛɛ, ka líí hvo holi ka kpɔwɔ pɔ́, nɔ́wɔ tɔɔ mɛ̨nį ɓa. Yálá ka tii hvaa mą, ŋį́ pa ɓɛ nɔi, ə gɛ,, ka nwun mąą ə ɓo.

⁶ Bului ŋɛ̨i aa too, aa kɛ a kwɛlan veelɛ, aa lɛɛ nwɔ̨nɔ̨ pulu a kwɛlan nɔɔli, hihɛn da lɔpee hvo pai lɛlɛi, hɛn da hva ɓa a dənən.

⁷ Yálá ə dɛ́ɛ́ ɓɛ nɔi, ə gɛ, ka hvúlú mąą ə lɛɛ yɛnɛ̨ɛ̨, ka nwun mąą ə ɓo.

⁸ Kaa hvəi dɛ́ɛ́ ɓɛ nɔi, Yálá ɓə dɛ́ɛ́ ɓɛ. Ya ɓə ɲąąwooɓo laa tɛɛ bɔ, ə gɛ́ a tɔɔmun, ə ɉee dɔɔkwəlii da Eziptə lɔi kəlee nwun na.

⁹ «Yii hu, ka pənə kpɔlɔɔ tii ɉa, ka li, kaa ną́n mai: ‹Ə́ lon Ɉosɛfə ɓə nwɛlɛɛ ŋɛ̨i tɔɔ, yɛ diɛ: Yálá aa gɛ́ a Eziptə lɔi ɲą́ą́ wóó ɓomun gɛ̨nɛ̨, yɛ́; ə́ ə́ mąą hvulɔ, ə́ pa ɉa.

¹⁰ Ya pa, ə́ kaa pai heei Gosɛn ka ə́ lonnii kəlee, ka ə́ mąnįn, ə mą kɛ, ə́ wɔ ɓɛlaaɠaa, moluɠaa da niɲɛ̨ɠaa, bɛlɛɛ ə́ yəi hɛn gəlee ɓa. Pa ə́ hee gwɛ́lɛ.

¹¹ Ya, pa ŋą kɔ̨nɔ̨n dɛɛ ə́ pɔ, ka ə́ yəi bɛlɛ́n nuą, ə mą kɛ ə́ wɔ taatɛlɛɛɠaai kəlee. Mąąhɔlɔɓo, bulu kwɛlan ŋɛ̨i aa lɛɛ pulu a kwɛlan nɔɔli.›»

¹² Ɉosɛfə yɛ nwɔ̨nɔ̨ diɛ: «Kaa kpinįi kaa gáá a ka ɲɛ̨ikɔw, Bɛnɉamɛn yɛ́ kpinįi yaa gáá a ə́ ɲɛ̨ikɔw, ɲą́ą́ Ɉosɛfə ə́ liɛ, ɲą́ą́ ka tii mɛ̨nį ɓoi yɛ́.

¹³ Ka li, pələi ŋɛ̨i gáá la ɓɛ a nu kɛnɛ̨, tɔɔi yii gaa ɲə́i ɓɛ Eziptə lɔi hu, da yiiɠaai kaa kpinįi kaa gaa, ka ɉukulɔ mą. Ka diɛni ka pənə ka pa ɉa.»

¹⁴ Ɉosɛfə ə pənə ə nəɠə Bɛnɉamɛn nɛ̨nɛ̨ɓo, di wolo di kee ɓa, diɛ wɔlɔ.

¹⁵ Ɉosɛfə da niɛni di kɛi di kee yee tuwɔ ɓo, diɛ wɔlɔ. Nąąlɔwai ɓə kɛa niɛni di kɛi pɛli hvaai la bɔ.

Eziptə tɔɔmun ə Ɉakɔbə təli ə ɉee gwɛlɛ

¹⁶ Ɉosɛfə niɛni pa mɛ̨nį Eziptə lɔi hu, tɔɔmun da ɲəi dɔɔ-kwəlii nuą di bələ mɛ̨n. Mɛn tii tɔɔmun ə mo, gwəi ə nɛ̨ɛ̨ kpɔ kɛnɛ̨, ə mą kɛ da nwɔ ɲɛ̨i tɔwɔ nuąi.

¹⁷ Tɔɔmun ə mo Ɉosɛfə ɓa, yɛ mą: «Mo ə́ liɛni diɛ, di di wɔ hoohvaalənŋąąi hąą yili, di pənə di li Kanaan lɔi hu,

¹⁸ di tɔɔ ka nąn dɔwɔ, da ɲəi bɛlɛ́n nuą kəlee, di pa. Eziptə lɔi ɓɛi hihɛn a lɛlɛ laa, nąą ɓə ŋą di hee laa.

¹⁹ «Ɉosɛfə! Mo ə́ liɛni diɛ, di wotoloɠaa həɠə, di li, di ə́ nąn da ɲəi bɛlɛ́n nuą kəlee kpəŋə, di pa a diɛ.

²⁰ A pa, hvo pai hvɛɠɛi a hɛn nɔpee ta. Mąąhɔlɔɓo, Eziptə lɔi nɛlɛi kɛɛnąą ɓə gaa pai heei laa.»

²¹ Pələi tii di mo la diɛ, Israɛlə lonnii di gɛ tii. Ɉosɛfə ə wotoloɠaa tɛɛ di pɔ yɛ pələi tɔɔmun ə mo la, ə bɛlɛ bələ pɔ kɔ̨nɔ̨n ma, di lii da di pai.

²² Ə həɠə kɛnɛ̨ tɛitɛi tɛɛ gəlee pɔ, kɛlaa, ə Bɛnɉamɛn nwɛi kɛ a həɠə kpɛa kpɛa lɔɔli, ə bɛlɛ wali kwələ nwun ɉaaɓa ɓa.

²³ Yii ɓaa di nąn nwɛi, hoohvaalən bow ɓə ə dɛɛ, ə kɔ̨nɔ̨n nɛlɛɛ hee gəlee pulu, diɛ li la, da hoohvaalən ɉaa pow, ə mɔ̨nun ɉee gəlee pulu, da kɔ̨nɔ̨n dakpɛliɠaa.

²⁴ Ə mo niɛni diɛ, yɛ diɛ: «'Ka hvo hvaa kɛ bələi.» Ə tee diɛ, di li.

²⁵ Di həɠə Eziptə, di li Kanaan, di nąn Ɉakɔbə pɔ,

²⁶ di di woo hukulɔ mą, diɛ mą: «Ɉosɛfə kaa ni yɛnɛ̨ɛ̨, ya ɓə hɔlɔmun gaa Eziptə lɔi hu a nu kɛ̨nɛ̨.» Yili hvo Ɉakɔbə lii kulɔ mą, mąąhɔlɔɓo, hvo kɛ laa li di la.

²⁷ Ɉɛnŋąąi Ɉosɛfə ə dɛɛ, bɛlɛɛ nwoo hukulɔ ɓa, di gəlee kɛ Ɉakɔbə ɓa. Yili ɓə tɛɠa Ɉakɔbə lii muhəɠə.

²⁸ Israɛlə yɛ kɛa diɛ: «Ɉosɛfə kɛ mɛ̨nį a vulú, gaa a kwəi pili mąą; nón Ɉosɛfə kaa kpɔ ni yɛnɛ̨ɛ̨, akɛtii tɛ̨ą li! Gáá lii ŋį́ ɲɛ̨́i tɔɔ mą, gɛ́ tɛɠa haa.»