Zɛnɛse 43 - Yálá laawoo hɛɓɛ (dc)

Ɉakɔbə ə hvaa Bɛnɉamɛn li mɛ̨nį ɓa

¹ Bulu ə kɛi lɔ walawala Kanaan nuą mɛ̨i.

² Gɔ̨nɔ̨n tii Ɉakɔbə lonnii di paa la, yii kɛa ə kpɛɛ, yɛ nwɔ̨nɔ̨ nonnii diɛ: «Ka pənə ka li, ka gu kɔ̨nɔ̨n ɲa.»

³ Ɉuda yɛ di nąn ma: «Eziptə lɔi nąmui tii, ə mo kpɔ, a nwąnąi yɛ kuɔ: ‹Hva kɛa kɔ̨nɔ̨n dɛɛ ku pɔ, akɛ ku ləɠə hvo ku pɔ.›»

⁴ Akɛ, ya Bɛnɉamɛn lɛɛ laa kwa diɛni kwəli, kwa pɛli kwəli, ku ə́ kɔ̨nɔ̨n ɲa.

⁵ Kɛlaa, ya wala gɛ, ku hva li. Mąąhɔlɔɓo, ɉulɔnui tii ə kɛ kpɔ kuɔ: «Ka ləɠə a wala kɛ ka pɔ, ka hva hɛn da hɔlɔɓo.»

⁶ Israɛlə yɛ nonnii diɛ: «Lə mɛ̨nį ɓa ka li kɛi ɉulɔnui tii ɓa ku kpəlaa mąą kaa laa? Mɛ̨nį ɲɔ̨nwɔ̨ɔ̨ ka tii kaa gɛ a ɲą́ą́.»

⁷ Nonnii diɛ mą: «Mąąnikɛ tamąą ɓə ɉulɔnui tii ə gɛ, a kuɔ, yɛ hvilɛn na ku kaa pələ ɓa, da ku yəi bɛlɛ́n mɛ̨nįɠaa. Ə kɛ kuɔi, ‹Ka nąn gaa ni yɛnɛ̨ɛ̨? Ka ləɠə takpɛli kaa laa?› Ku nwoo ŋąąpənə, ku kili hvo kɛ ɉu kuɔ kɛ, gaa pai kɛi diɛ ka pa a ka ləɠəi tii.»

⁸ Ɉuda yɛ nwɔ̨nɔ̨ nąn ma: «Ną́n, Bɛnɉamɛn hvə kwa yaa kwəli, akɛ gu kaa bɔ gu húlú mąą ə lɛɛ yɛnɛ̨ɛ̨, gu yəi bɛlɛ́n nuą di hvo haa.

⁹ Ɲą́ą́ ɓə nokoloi ŋɛ̨i wulu kaa nwúɔ̨, dɛɛ bɔ́. Ŋą́ li la, kwa yaa kwa wala pa, ɲą́ą́ ɓə nwulu a lɛɛ nwúɔ̨.

¹⁰ Yii hui ŋɛ̨i, akɛ kɛ ku hvo ku kɔ́n mąą ɲii li, yɛ kwaa kɛ yalii hveelɛ kɛ, kuɔ pa a gu kɔ̨nɔ̨n.»

¹¹ Israɛlə ə di woo ŋąąpənə, yɛ diɛ: «Akɛ yili kaa tii, yii ka káá gɛi, ya ka: Ka ɓɛ nɔi hɛn da həɠə, ka li la Eziptə mun tii pɔ a ɉąmą. Ka ɓálá ta həɠə ka kwɛ́in nwulɔ pu ɉu da wúlú mąląąn gun nɛ̨ɛ̨, mąląąn ɲa da wulu kun nɛ̨ɛ̨, nwului ŋɛ̨i da kɛ mą pistake, má ta, da nwului ŋɛ̨i da kɛ mą amandə, ma.

¹² Nwali hiɛ lɛɛ ka tiɛ̨ hu kaa paa lai, ka pənə ka li la. Gbəli hu nuą di lɛ̨ą di nwali lɛɛ ka tiiɲɛ̨ hu. Yili pulu gɔ̨nɔ̨n ka káá li ɲai, ka yili nwɔ walii həɠə.

¹³ Yii hu, ka ka ləɠə həɠə, ka diɛni ka li ɉulɔnui tii pɔ.

¹⁴ Gɛ́ Huwalawala Kəlee Nąmu Yálá ə hvaa mą, ɉulɔnui tii ə ka ɲɛ̨i mąą wɛli kaa, ə Bɛnɉamɛn lɛɛ laa da Simeɔn ka diɛni ka pa. Yii ɓaa nwɛ́i, gíli kaa ɉu gɛ́ diɛ ŋą́ą́ hvɛɠɛ a nón dɔ̨nɔ̨, veelɛ kɛɛnąą ka ŋɛ̨i laŋąn ɉii mą.»

Ɉosɛfə da gaayɔwɔɠaa di kee kaai veelɛnąą

¹⁵ Ɉakɔbə lonnii kɛi pənəi diɛ li Eziptə, di ɉąmą pilɛɠaai tii kəlee həɠə, nwalii lɛɛ di yəi míi hu, di mɛla pɛlɛ na, da Bɛnɉamɛn ni kəlee di həɠə diɛ li. Də li di həli Ɉosɛfə ɓa.

¹⁶ Ɓɛlɔwai Ɉosɛfə ə gaa la yɛ Bɛnɉamɛn kaa di pɔ, Ɉosɛfə ə mo ɲəi bɛlɛ́n mɛ̨nį ɲɛ̨i kulɔ mun ma, yɛ mą: «Nuąi tii pai, tɔɔ di tɔwɔ ka li ɲə́i bɛlɛ́n, li ə́ taatɛlɛɛ ta paa, ə́ ku kɔ̨nɔ̨n bɛli, ə́ ɉee, kwa diɛni ku kaa pai hvóló ŋą kɔ̨nɔ̨n mį́i gee ɓa.»

¹⁷ Bələi tii Ɉosɛfə ə mo la, ɉulɔnui tii ə gəlee kɛ, ə tɔɔ nuąi tii tɔwɔ, di li Ɉosɛfə yəi bɛlɛ́n.

¹⁸ Ɓɛlɔwai Ɉosɛfə nwɔ nui tii ə kɛ la diɛ: «Ka lɔ bɛlɛn», di ɲɔw kpɔ kɛnɛ̨, diɛ kɛ di kee ɓa: «Nwali hiɛ lɛɛ gu tiɛ̨ɠaa hu, mąą mɛ̨nį ka ŋɛ̨i daa gu lɔ la ɓɛ bɛlɛ́n, əgɛ, di gu hon a luwɔɠaa.»

¹⁹ Ɓɛlɔwai di kɛi lɔ la, di lɛɠɛ ɉulɔni tii ɓa, diɛ mą:

²⁰ «Ku wɔ mɛ̨nį nąmu, kwaa pa lɔ ɓɛ tanɔ̨n kɔ̨nɔ̨n ɲai.

²¹ Ku kɛ pənəi kuɔ li, ɓɛi ŋɛ̨i ku yii laa, ku ku wɔ ɓíiɠaai laa ɓo, nwaliɠaai ŋɛ̨i ku paa la ku gaa ku tiɛ̨ mɛ̨i ɲąą pɛliɛ. Kwaa pənə kwaa pa a nwaliɠaa kpɔ, gaa ɓɛ.

²² Yii nwɔ̨nɔ̨ ku pai ɲai, ku nwɔ wali pɛlɛ mą. Nui nwaliɠaai tii lɔ ku tiɛ̨ hu, ku hvo mąą nu kɔ́lɔn.»

²³ Nui tii yɛ diɛ: «Ka hvo ka liihɛlɛn a mɛ̨nį ta, ka wɔ Yálá, ka nąn nwɔ Yálái ka tii ɉɛn gɔw tii lɔ ka yɛi míi hu. Gɔ̨nɔ̨n tii tɔlɔɔ ka ɲa ɓɛ, ɲą́ą́ ɓə nwali hon ŋį́ doo gəhii.» Nui tii ə nɛɛ mą, ə Simeɔn kulɔ, ə paa la,

²⁴ yili pulu, da mɛlaa di bɛlɛ gee ɓa diɛ lɔ Ɉosɛfə yəi bɛlɛ́n. Di pa a ya di pɔ, ə gɛ, di di kɔ́wɔ mąą waa, di kala tɛɛ di wɔ hoohvalənŋąąi pɔ.

²⁵ Ɉakɔbə lonnii, ɉąmą tiyɛ̨ɠąąi tii di paa la, di gələə pɛli diɛ Ɉosɛfə paa mąąkpɔn. Daa kɛ mo diɛ, diɛ kɛ mą: «Da diɛni di kaa pai hvóló ŋą kɔ̨nɔ̨n mį́i gee ɓa.»

²⁶ Ɓɛlɔwai kpɔlɔ Ɉosɛfə ə paa la, di nɛɛ mą di ɉąmą tiyɛ̨ɠąąi tii kulɔ, di lɛɠɛ mą di pɛlɛ gɔwɔ mu.

²⁷ Ɉosɛfə ə di mąąnikɛ, pələi di ɉiɛ kulɔ la, yɛ diɛ: «Ka nąn ɉulɔ goloi tii yələ ka kɛi mąą mɛ̨nį ɓo mą́ą́, gaa laa kpɛli? Gaa ni yɛnɛ̨ɛ̨?»

²⁸ Diɛ mą: «Ə́ wɔ tí mun, kaa laa kpɛli.» Di pənə di pɛlɛ nɔi ɓa kpɔ a ɉu kwɛa Ɉosɛfə kɔ́wɔ mu.

²⁹ Ɉosɛfə ə ɲɛ̨i hee bulu ləɠə kpɔ-kpɔɔ Bɛnɉamɛn ɓa, yai da yaa di lee kaa tanɔ̨, yɛ diɛ: «Ka ləɠəi hiɛ ka kɛi mąą mɛ̨nį ɓo, ya ɓəi?» Ɉosɛfə yɛ Bɛnɉamɛn ɓa: «Nón, Yálá ə lúwɔ́ too yɛ́.»

³⁰ Ɉosɛfə nəɠə kaai ə mo, gwəi ə nɛ̨ɛ̨ kpɔ ɉu pələ, ɲɛ̨iya ə tinɛ̨n a gɔ̨nwɔ̨n. Ə həɠə di kwɛlɛ kpɔlɔ ɉa, ə li pɛlɛ́ takpɛli mu, ɉeɛ laa yɛ wɔlɔ.

³¹ Yii kɛa ə kpɛɛ a wɔlɔɔ, ə ɲɛ̨i waa, ə pənə ə pa, ə gɛ kpɔ a hulɔnu laa, ə nii kpələ, yɛ diɛ: «Ka gɔ̨nɔ̨nŋąą laa ɉɛnŋąą hu.»

³² Di Ɉosɛfə nwɔ kɔ̨nɔ̨n kulɔ mą di ɉee taɓali takpɛli ɓa, Eziptə nuąi tii di di təli, diɛ kpɛli di heɛ pələ takpɛli, mąąhɔlɔɓo, da Hebreuɠaa di hva pɛli kɛ kɔ̨nɔ̨n mį́i kɛɛnąą tɔ̨nɔ̨, di wɔ kalan bələi mąą mɛ̨nį ɓa.

³³ Ɉosɛfə niɛni di kɛ heeni ɲɛ̨i tɔwɔ pələ. Di hee kpəlin na kɛɛ yɛ pələi di hɔlɔɓo pələ kaa la, ə həɠə nu pɔlɔ ɓa, ə həli nokolo ɓa. Bələi tii di di hee pələ pɛli la, yili ə di kwəi pili diɛ, diɛ di kee ɲɛ̨i kaa.

³⁴ Ɉosɛfə kpinįi ɓə nu kəlee kɔ̨nɔ̨n naa ɲəi ɉɛnɲąŋą hu. Ə nəɠə Bɛnɉamɛn nwɛi ɉuwɔ kɛ mɛ̨i gee mɛ̨i lɔɔli ə dɛɛ niɛni di wɛi ɓa. Da diɛni di lɔɔ kpələ gee ɓa yɛ pələi di kaa la bɔ.