Zɛnɛse 40 - Yálá laawoo hɛɓɛ (dc)1 Mɛ̨nįɠaa tii tɛɛ pulu, tɔɔmun nwɔ kóló kɛ nuą hveelɛ di mɛ̨nį ɲɔ̨n gɛ a tɔɔmun. Nu hveelɛi tii tɔ̨nɔ̨ ə kɛ a tɔɔmun nwɔ lɔɔ pɛli nuą nwun nąmu, yaa ɓə kɛi pa a tɔɔmun nwɔ lɔɔi yɛ dɛɛ bɔ. Dɔ̨nɔ̨ yaan, ya ɓə kɛ tɔɔmun gɔ̨nɔ̨n mɛ̨nį nwun na. 2 Tɔɔmun ə niiɲąnwąną nwɔ gbɛtɛkpuwulu hveelɛ ɓa, nɔɔ pɛlimun, da gɔ̨nɔ̨n ɲilimun, 3 ə di too gaho ŋą. Gaho nąmįną mɛ̨i kaamun, ə di lɔ pɛlɛ́ tɔ̨nɔ̨ mu da Ɉosɛfə ni. 4 Gaho pɛlɛ́ nwun nąmu ə di kalihvaɓo Ɉosɛfə ɓa. Nuą tii di lɔwai ta wolo kɛ laa gaho pɛlɛ́ mu. Ɉosɛfə ə hįį woo mukulɔ 5 Nɔɔ pɛli nuą nwun nąmu da yii kɛ tɔɔmun gɔ̨nɔ̨n mɛ̨nį nwun na, di hįį kaa a kpinį tɔ̨nɔ̨ gaho pɛlɛ́ mu; ɉukulaa yɛ ɓo a dee-tee. 6 Yələwala pɔ, Ɉosɛfə ə pa di mɛ̨i kaai, ə di kaa di kɔ́lɔ haa diɛ. 7 Ɉosɛfə ə di mąąnikɛ, yɛ diɛ: «Lə ɓə kɛ yai ka ɲɛ̨nąą yilɛɛi ɲələwalai hu?» 8 Diɛ mą: «Kwaa hįį kaa, nu hvo ku yəi, ə mukulɔ kuɔ.» Ɉosɛfə yɛ diɛ: «Kɛlɛi Yálá ɓə mɛ̨nį kəlee mukulaa kɔ́lɔn! 'Ka ɉukulɔ mą́ą́.» 9 Nɔɔ pɛli nuą nwun nąmu ə nwɛi ɓo, yɛ mą: «Ŋį́ hįį kaa, ŋį́ viɲə ta kaa tɔɔni nííla, 10 gbaɠa yɛ ɓo mą haaɓa, aa kpuɠun, aa powa, aa ɓa, aa kpɔlu. 11 Nąąlɔwai, tɔɔmun nwɔ kpələ kɔ́wɔi yɛ ɓo ɲə́ə́ ŋą, ŋį́ viɲə ɓái tii kulɔ, ŋį́ bu gbələ kɔ́wɔ hu, ŋį́ nowa, ŋį́ nɔɔ kulɔ, ŋį́ dɛɛ tɔɔmun bɔ.» 12 Ɉosɛfə yɛ mą: «Ə́ wɔ hįį tii mukulaa ka: viɲə kpaɠa haaɓai tii, mukulaa ɓaa; aa lɛɛ pulu a hvóló haaɓa, 13 voló haaɓai tii a tɛɛ, tɔɔmun gaa pai pənəi ə giliŋąhiɛ yɛ́ a nɛlɛɛ, ə́ ə́ kulɔ gaho ŋą, ə li a yɛ́, ə́ ə́ kɛ kóló kɛ. Ə́ kaa pai pənəi yɛ́ lɔɔ tɛɛ bɔ, yɛ bələi tɔlɔɔ ə́ kɛi gɛ la. 14 A pa ə́ təlii, 'ə́ kiliŋąhiɛ mą́ą́, ə́ mą́ą́ mɛ̨nį lɛlɛɛ hukulɔ tɔɔmun ma, ɓɛlɔwai ə́ kaa pai kɛi la ə́ nɛ̨ɛ̨ hu, ə gɛ, di gúlɔ gaho ŋą. 15 Di gúlɔ ku pɔ lɔi Hebreu lɔi hu a huwalawala, diɛ pa ɓɛ a ɲą́ą́. Pai nwɔ̨nɔ̨ ŋį́ mo, və́ mɛ̨nį ɲɔ̨n gɛ li, di ɉón diɛ dóó gaho ŋą.» 16 Yii kɛa nui ŋɛ̨i kɛ tɔɔmun gɔ̨nɔ̨n mɛ̨nį nwun na, ə mɛlan nwɔ hįį woo mukulaa lɛlɛɛ mɛ̨n Ɉosɛfə la, yaa kpɛli, ə nwɛi hukulɔ, yɛ mą: «Ɲą́ą́ gbɛli, ŋį́ hįį kaa, kpɔlɔ haaɓa həɛ nwúɔ̨ naahvɛɛ a kɔ̨nɔ̨n. 17 Gbɔlɔ yii ŋɛ̨i kɛ heeni mɛ̨i, tɔɔmun niiɓa kɔ̨nɔ̨nŋąą ɓə kɛ ɉu, nwɛ̨niɠaa di pa di nɛɛ nwúɔ̨, di gəlee kpələ.» 18 Ɉosɛfə yɛ mą: «Ɉįį tii mukulaa ka: gbɔlɔ haaɓai tii, mukulaa ɓaa, aa lɛɛ pulu a hvóló haaɓa. 19 Voló haaɓai tii tɛɛ pulu, tɔɔmun gaa pai giliŋąhiɛi yɛ́, kɛlaa, hvo pai kɛi a nɛlɛɛ, di kaa pai ə́ hɛlɛn ɉii wulu ɓa, nwɛ̨niɠaa di pa diɛ ə́ huwɔ wɛan ɲɛ́.» 20 Hvóló haaɓa tɛɛ pulu, Eziptə tɔɔmun ə kɛi gbɔwɔ kaa kwɛlan mąą kwəinɛ̨ɛ̨ kulɔ, ə kɔ̨nɔ̨n gɛnɛ̨ pɛli nwɔ ɲɛ̨i tɔwɔ nuą diɛ, nuąi tii kəlee ɲɛ̨i ɓa, ə nɔɔ pɛli nuą nwun nąmu kulɔ gaho ŋą, da nui ŋɛ̨i kɛ gɔ̨nɔ̨n mɛ̨nį nwun nai. 21 Ə nɔɔ pɛli nuą nwun nąmu həɠə, ə pənə ə dɔɔ gɛ kóló ɓa. 22 Kɛlaa, ə gɔ̨nɔ̨n bɛli nuą nwun nąmu hon, ə ɉɛlɛn. Bələ ɓə, ɉįi ŋɛ̨i Ɉosɛfə ə ɉukulɔ, naa ə hon na. 23 Kɛlaa, nɔɔ pɛli nuą nwun nąmu hvo kɛa gili lɛɛ Ɉosɛfə mąą mɛ̨nį hu. |