Zɛnɛse 32 - Yálá laawoo hɛɓɛ (dc)1 Mąą yələ laa ɓoɔ, Laban da nonnii nɛ̨ąą, ɛlɛɛ da mąnįnni di di hvɛli, di ɲələwala kɛ di kee ɓa, ə lúwɔ́ too diɛ, yili pulu, ə pənə yɛ li. Ɉakɔbə da Esau 2 Ɉakɔbə yaa kpɛli, ə tɛɛ yɛ li, da Yálá nwɔ malakaɠaa di kwiɛn. 3 Ɉakɔbə ə di kaa lɔ, ə tómą kpɔ kɛnɛ̨, yɛ diɛ: «Yálá nwɔ kɔ́ ɓuwu la ka» ə gɛɛnąąi tii laa hee a Mahanaimə. 4 Ɉakɔbə ə wɛlɛɛ tɔɔ niɛ Esau pɔɔli, Seirə lɔi hu, Edɔmə ɲɛɛ kɔ́wɔ hu. 5 Yɛ nwɛlɛɛ ɓo nuą diɛ: «Ka li, ka ŋį́ mɛ̨nį nąmu Esau kaa, kaa mą: ‹Ə́ wɔ tímun Ɉakɔbə yɛ: Gaa wɔlɔ Laban pɔɔli, aa lɛɛ ɉu yiihu aa ɉəli. 6 Ɉɛnŋąąi ɲəi, diɛ ɓaa: Nįŋɛ̨ɠaa, hoohvaalənŋąą, ɓɛlaaɠaa, ɓoluɠaa, luwɔ hinąą da nɛ̨ąą. Nwɔ́ mɛ̨nį nąmu, nwɛlɛɛi ŋɛ̨i tɔɔ mɛ̨nį nwun maa, ə́ wɔ tímun Ɉakɔbə a pa, ə́ ə́ yee hee mu a nɛlɛɛ.›» 7 Nwɛlɛɛ ɓo nuąi di pa, diɛ Ɉakɔbə ɓa: «Kwə li ku ə́ liɛ Esau kaa, gaa pai ə́ laakwiɛn ɉii, da hinąą nwun-nąąn.» 8 Ɉakɔbə ə ɲɔw kpɔ kɛnɛ̨, liihɛn ə too mą, ə nɛɛmą ə nwɔ nuą ɲąąkwɛlɛ ɉu hveelɛ, ə mą kɛ mɛlaaɠaa, moluɠaa, nįŋɛ̨ɠaa. 9 Ə kɛi kɛ diɛ: «Esau a pɛlɛ bələ tɔ̨nɔ̨ ɓa a kɔ́, dɔ̨nɔ̨ a pɛli ə pu.» 10 Gɛɛ tii, Ɉakɔbə ə tómą, yɛ mą: «Ee! Ną́n Abrahamə nwɔ Yálá! Ną́n Isaakə nwɔ Yálá! Yɛ́i a Yai-Laa! Yɛ́ ɓə kɛ mą́ą́: ‹Pənə ə́ li ə́ pɔ lɔi, ə́ nąn ɲəi bɛlɛ́n, gáá pai ɲɛ̨́i lɛlɛɛ heei yɛ́.› 11 Mą́ą́ hvo nɛ̨ɛ̨li kɛ a mɛ̨inɛ̨ɛ̨ kɛnɛ̨ɛ̨ ŋɛ̨i nąmu. Hvo gaai, gɛ́ɛ́ Ɉurdɛn teen ɉii, gbɔn nɔ ɓə kɛ ɲə́i. Ya ka ŋɛ̨i Yáá ɲéé laahvɛɛ a mɛ̨inɛ̨ɛ̨ kpɛa-kpɛa hveelɛ, gɛ́ pənə gɛ́ paa la ną́n ɲəi bɛlɛ́n. 12 Nɛ̨ɛ̨i Yɛ́, nwún mąąɓo níɛ Esau yəi, mąąhɔlɔɓo, gáá ɲɔwi mą, hvo pa ku paa, ɲą́ą́, nɛ̨́ą da nɛapɛlɛɛ. 13 Ną́n nwɔ Yálá! Kɛlɛ́i Yɛ́ ɓə kɛ mą́ą́: ‹Gáá pai ɲɛ̨́i lɛlɛɛ heei yɛ́; ŋį́ ə́ huwu tamą yɛ gboloyá kwɛlɛ ɲɛ̨ąkɔw, yai nu hva pɛli nonon ɉii.›» 14 Ɉakɔbə ə yii gɛɛnąąi tii. Daatɛlɛɛɠaai kɛ ɲəi, ə niɛ Esau hąmą a da. 15 Ə Ɓolu haa nwun veelɛ, ɓolu hilɛ pow hveelɛ, ɓɛlaa haa nwun veelɛ, ɓɛlaa hilɛ pow hveelɛ, 16 ɲɔ̨nwɔ̨mɛ̨ɛ̨ haa pow haaɓa, gəlee lon yɛ ɓo bɔ, nįŋɛ̨ haa pow nąąn nįŋɛ̨ hilɛ pow, hoohvaalən ɉaa pow hveelɛ, hoohvaalən ɉilɛ pow. 17 Ə daatɛlɛɛ kpului tii tɛɛ a gulaa gee mu, yɛ nwɔ tínuą diɛ: «Ka tɛɛ dɔ́wɔ, kɛlaa, ka mąą ə kɛ a gwɛa gee ɓa.» 18 Ɉakɔbə yɛ nwɔ tímun dɔlɔɔ ɓa: «Ka níɛ Esau ka kwiɛn, a kɛ yɛ́: ‹Gbɛɛ ŋą nu ɓaa yɛ́? Ə́ kaa lii mį? Gbɛɛ nwɔɔ ɓaa daatɛlɛɛ kpului ŋɛ̨i ə́ tɔ́wɔ́i?› 19 Yá kɛ mą: ‹Ə́ wɔ tímun Ɉakɔbə nwɔɔ li. Ya ɓə dɛɛ a nwɔ mɛ̨nį nąmu Esau hąmą. Kɛlaa, yaa kpinį gaa pulu yɛ pa.›» 20 Bələ lɔ ɓə ə mo la nu veelɛnąą ɓa, da ɉaaɓanąą, ɛlɛɛ, da nuąi kpɔ kɛ daatɛlɛɛɠaa pulu, yɛ diɛ: «Ka li yili ɓə ka mo Esau ɓa, ɓɛlɔwai ka diɛni ka kwiɛn na. 21 Kaa nwɔ̨nɔ̨ mą ə́ wɔ tímun Ɉakɔbə kaa ku pulu yɛ pa.» Ɉakɔbə ə kɛi kɛ diɛ: «Gbəli hu, ŋą́ gɛ tii, gaa pai ɲee heei mú a nɛlɛɛ.» 22 Ə ɉąmą tiɛ̨ɠaai tii tɛɛ tɔwɔ, yaa tii, ə lɛɛ pulu, ə yii laa. Ɉakɔbə da Yálá nwɔ malaka di gɔ́ 23 Mąą kpinįi tii hu, Ɉakɔbə ə nɛ̨ąni hveelɛi həɠə, nwɔ tínɛ̨ąą hveelɛi da nonnii pow kɔ́w tanɔ̨n, ə Yabɔkə teen gwɛni ŋą. 24 Ə mą kɛ da ɲəi hɛnŋąą kəlee. 25 Ɉakɔbə yaa tɔ̨nɔ̨ ə lɛɛ ɲa pulu pələ. Gbinii tii hu, nu ta ə wolo mą da yaa di lɛɛ gɔi, ə lɛɛ ɉu kɛɛ hu yɛ pɔ̨nɔ̨. 26 Yii kɛa ə gaa yɛ ɲee hvo lɔi Ɉakɔbə ɓa, ə Ɉakɔbə kɛlɛ donwənən ma, ə nąą həɠə gee la gbilɛn gɔi lɔwai. 27 Yɛ Ɉakɔbə ɓa: «Tee mą́ą́, ŋį́ li yələ kaa ɓɔi.» Ɉakɔbə yɛ mą: «Ya wala lúwɔ́ too mą́ą́, vá ɓo yɛ́.» 28 Yɛ Ɉakɔbə ɓa: «Ə́ laa ɓaa a gbɛɛ?» Ɉakɔbə yɛ mą: «Náá ɓaa Ɉakɔbə.» 29 Yɛ mą: «Ə́ laa hvaa kɛa a Ɉakɔbə, ə́ laa ɓaa pai kɛi a Israɛlə, mąąhɔlɔɓo, ka Yálá kaa lamu kɔ́, ka nuą kaa lamu kɔ́, ə́ yee aa tɛɛ diɛ.» 30 Ɉakɔbə yɛ mą: «Ə́ laa ɓaa a gbɛɛ?» Yili yɛ mą: «Lə mɛ̨nį ɓa ə́ kaa mą́ą́ninkɛi?» Ə lɛɛ laa, ə lúwɔ́ too Ɉakɔbə ɓa. 31 Ɉakɔbə ə gɛɛnąą tii laa hee a: Penuɛlə. Mukulaa ɓaa a: Yálá ɲɛ̨ilaai. Mąąhɔlɔɓo, «ŋą́ą́ Yálá kaa a ɲɛ̨ikɔw, və́ haa li.» 32 Hvóló kulaa kɛa, Ɉakɔbə ə həɠə Penuɛlə, ə ɲa teen, yɛ too gɔwɔ mɛ̨i. 33 Yili ɓə gɛ, Israɛlə lonnii di hva huwɔ kpai luwu mįi, mąąhɔlɔɓo, Yálá ə ɲee hee Ɉakɔbə tonwənən ma. |