Zɛnɛse 2 - Yálá laawoo hɛɓɛ (dc)

¹ Bələ ɓə Yálá ə yələkɔlɔn da lɔi di pɛli la, da ɉu hɛnŋaa kəlee.

² Yálá ə gɛ́ kóló kəlee kɛ ə kpɛɛ la, voló mɛ̨ihveelɛ yələ, ə hee, ə vįitɔɔ gɛ kóló kəlee ɓa.

³ Ə lúwɔ́ too voló mɛ̨ihveelɛ yələ ɓa, ə ɉəɠə ɉu a nwɔɔ. Mąąhɔlɔɓo, volói ti ɓə, ə ɲee laa kulɔ la gɛ koló kəlee ɓa.

⁴ Pələ ɓə Yálá ə yələkɔlɔn da lɔi di pɛli la. Ɲələi Yai-Laa ə yələkɔlɔn da lɔi di pɛli la tɔlɔɔ,

Hulɔnu da nɛ̨ɛ̨nu di kɛ Yálá-taa lon ma ɓɛ lɔi mɛ̨i

⁵ Wulu tɔ̨nɔ̨ kpɛli hvo kɛ lɔi mɛ̨i, ə mą kɛ kala ɓɔn dɔ̨nɔ̨ kpɛli, hvo ni kɛ ɓɔn ni lɔi mɛ̨i. Mąąhɔlɔɓo, Yai-Laa hvo ni kɛ tulɔ pu li lɔi mɛ̨i, ɛlɛɛ, nu hvo ni kɛ lɔi mɛ̨i, yii a kóló kɛ lɔi ɓa.

⁶ Lɔi wəleen nɔ ɓə kɛi həɠə, yɛ pənə yɛ pu lɔi mɛ̨i a luwuluwu.

⁷ Nąąlɔwai ɓə Yai-Laa ə nu pɛli la a pɔlɔ, ə yɛnɛ̨ɛ̨ kɛ hvaŋą pu ɉunwɛ̨i, nu ə kɛ a hɛn vulúmąą.

⁸ Yili pulu, Yai-Laa ə yɛa ta pɛli Edɛn, voló həɠəi pələ. Nui ŋɛ̨i ə bɛli, ə vilɛn nąą ɲɛa.

⁹ Wuluɠaai kpɔ ma nɛ̨ɛ̨, gaa ŋąąnɛ̨ɛ̨, ɛlɛɛ, mį́iɛ ɲąąnɛ̨ɛ̨, Yai-Laa ə di hin nąą ɲɛa. Ə yɛnɛ̨ɛ̨ kɛ wulu hin ɲɛa hamąi, ɛlɛɛ, da mɛ̨nį lɛlɛɛ da mɛ̨nį ɲɔ̨nwɔ̨ɔ̨ di kɔ́lɔn nwulu.

¹⁰ Yá lee ta ə kɛi kulɔ Edɛn, yɛ tɛɛ ɲɛai tii hu, ŋąą yɛ kwɛlɛ ɉu nąąn.

¹¹ Dɔlɔɔ laa ɓaa a: Pisɔn, yili ka tii a kɛ Hawila lɔi mąą tinɛ̨n ɉi. Nɔi tii hu ɓə hɛni kaa laa.

¹² Nɔi tii hu hɛni kaa a nɛlɛɛ. Nąą ɓə nwɔ̨nɔ̨ da bdeliumə da onisə kwɛni hɔlɔɓo laa.

¹³ Ɲá veelɛnąą laa ɓaa a: Gihɔn. Yili ka tii a kɛ Kusə lɔi mąą tinɛ̨n ɉi.

¹⁴ Ɲá ɉaaɓanąą laa ɓaa a: Tigrə. Yili ka tii a kɛ tɛɛi Asurə taa voló həɠəi pələ. Ɲa nąąn gɛɛnąą laa ɓaa a: Eufratə.

¹⁵ Yai-Laa ə nu hee Edɛn yɛa, əgɛ, ə ɲɛ̨i kɛ nɔi ɓa, ə kóló kɛ mą.

¹⁶ Yili pulu, Yai-Laa ə nu liɛwoo kɛ, yɛ mą: «Nwuluɠaai kpɔ gaa ɓɛ ɲɛa, yá pɛli ə́ gəlee ta ɓa mį́i.

¹⁷ Kɛlaa, yii ɓaa mɛ̨nį lɛlɛɛ da mɛ̨nį ɲɔ̨nwɔ̨ɔ̨ di kɔ́lɔn nwului ŋɛ̨i nwɛi, hvó má ta mį́i, mąąhɔlɔɓo, hvólói yá má ta mį́i la, yá haa.»

¹⁸ Yai-Laa yɛ nwɔ̨nɔ̨ diɛ: «Mąą hvo nɛ̨ɛ̨li hulɔnu yaa tɔ̨nɔ̨ hvo kɛ yɛnɛ̨ɛ̨. Gáá mąą kpɔnmąąɓomun bɛlii ŋį́ dɛɛ bɔ.»

¹⁹ Ɉuwɔɠaa da nwɛ̨niɠaai Yai-Laa ə di kulɔ, ə pa a gəlee nu lííla, əgɛ ə gaa, bələi nu kaa pai di laa heei la, əgɛ, naai tii ə lɛɛ diɛ.

²⁰ Nu ə, taatɛlɛɛɠaa, lɔwɔ huwɔɠaa da yələi nwɛ̨niɠaa laa hee tɛitɛi. Kɛlaa, yaa kpinįi tii, hvo gulɔmąą kaa di lɔwai, yii a pɛli kpɔnmąą tɛɛi bɔ.

²¹ Nąąlɔwai, Yai-Laa ə yii kɛnɛ̨ tɛ nu ɲɛ̨i, ə yii. Yai-Laa ə nɛɛ mą, ə nu kəŋə gbɛakɔw tɔ̨nɔ̨ kulɔ ɉu, ə nuwu hiɛ nąą.

²² Nu kəŋə gbɛakɔwi tii Yai-Laa ə gulɔ ɉu, ə bɛli a nɛ̨ɛ̨nu, ə paa la, ə dɛɛ hulɔnu pɔ.

²³ Yii lɔ kɛa hulɔnu ə nɛ̨ɛ̨nu kaa, diɛ paa la bɔ, ə tómą kpɔ kɛnɛ̨, yɛ diɛ: «Yii nwɛi, gaa kpɔlɔɔ a dá! Gaa kpɔ a gɔ́w ta, yɛ ɓo a núwu ta! Naa ɓa pai kɛi a: Nɛ̨ɛ̨nu, hulɔnu hiɛ gee pulu, hvó gaai, hulɔnu ɓə ə kulɔ ɉu.»

²⁴ Yili ɓə gaa mą, hulɔnu a həɠə nąn bɔ, ə həɠə nee pɔ, ə yili nɛ̨ą ɓa, da yaa di kɛ a nu tɔ̨nɔ̨.

²⁵ Hulɔnu da nɛ̨ą di kɛ a di kpuwulu, kɛlaa, di hvo kɛ kpaan ni yili hu.