Zasua 9 - Yálá laawoo hɛɓɛ (dc)

Mįnɛ̨ həɠə mɛ̨nį da Gabaɔn nuą di lɔwai

¹ Nąąlɔwai, tɔɔɓɛlaa kpɔ kɛ Ɉurdɛn yá pulu pələ ɲee lɔi hu, da nɛ̨ŋɛ̨ lɔi hu, di mɛ̨nįɠaa tii bələ mɛ̨n, gəlee ə mą kɛ, nuąi kpɔ kɛ gboloyá kwɛlɛ, Liban lɔi lííla, diɛ ɓaa: Hɛtə nuą, Amɔrə nuą, Kanaan nuą, Perizi nuą, Hivi nuą, da Ɉebusə nuą,

² di di ɲąąkpɔn kɔ́ pɛlɛ mɛ̨nį ɓa, Ɉosue ɓa da Israɛlə lonnii.

³ Mɛ̨nįi Ɉosue ə naa Ɉeriko taa da Ai taa diɛ, Gabaɔn nuą di bələ mɛ̨n.

⁴ Diɛ kpɛli, di gɛ a gbąnąlaa, di həɠə haɠaɠaa kɛ diɛ, di ɓíi haɠaɠaa yili di wɔ hohvaalənŋaa diɛ, di lɔɔ pɔlɔɠaa pu huwɔ kɔ́lɔ ɓíi haɠaɠaa hu, yai kɛ aa ɓɛla, daa pənə daa ɉɔlɔɔn.

⁵ Di wɔ kɔ́lɔ haɠaɠaai aa kala daa pənə daa ɉɔlɔɔn, di nɔ di kɔ́wɔ ŋą, da həɠə haɠaɠaa, nɛɠɛɠaai kɛ di yəi a di kɔ̨nɔ̨n, ə ɓo a gbala pɔlɔ pɔlɔɠaa vunwɔ̨ yɛ pu.

⁶ Di li di Ɉosue kaa di wɔ kɔ́ ɓuwui la Gilgalə, diɛ Israɛlə lonnii diɛ: «Ku həɠə kpɔ kwɛa la, yiihu kɛa, ku pa ə gɛ, ka gu mįnɛ̨ həɠə.»

⁷ Israɛlə lonnii diɛ diɛ: «Ka káá kiɛ ɓɛ lɔ ku kwɛlɛ; gwa kaa ni gwa pɛli mįnɛ̨ həɠə pələ kɛi ləi?»

⁸ Kɛlaa, yiliɠaai diɛ Ɉosue ɓa: «Ku kɛ a ə́ wɔ luwɔɠaa.» Yili pulu, Ɉosue yɛ diɛ: «Gbɛɛ nuą ɓaa kaa, yili pulu ka həɠə mį?»

⁹ Di nwoo ɲąąpənə diɛ mą: «Ə́ wɔ luwɔɠaa di həɠə kwɛa la lɔi hu, Yai-Laa ə́ wɔ Yálái mąą mɛ̨nį ɓa, mɛ̨nįi kpɔ ə gɛ Eziptə, ku bələ mɛ̨n;

¹⁰ Ɛlɛɛ mɛ̨nįi ə naa Amɔrə tɔɔɓɛlaa diɛ Ɉurdɛn pulu, ku bələ mɛ̨n; diɛ ɓaa: Hɛsbɔn tɔɔmun Sihɔn, da Basan tɔɔmun Ogə, yai kɛ Astarotə daai.

¹¹ Ku wɔ nu kpɛa-kpɛa da ku wɔ lɔi hu nuą ɓə ku tɔɔ; diɛ kuɔ, ku ku kɔ̨nɔ̨n ɉəɠə yii kwa pɛli mįi bələ pɔ, ku pa ku ka laakwiɛn, kuɔ ka, kwaa kɛ a ka wɔ tínuą. Yili ɓa tii, ka hvaa mą, gwa kaani gu mįnɛ̨ həɠə.

¹² Kaa ku wɔ lopɛ̨iɠaai kaa, ɲələi ku kɛi həɠə la ku wɔ lɔi hu, nopɛ̨iɠaa ŋɛ̨i di kɛ a vulaa kuɔ di həɠə ku yəi bɛlɛnŋąą, kuɔ pa ka laakwiɛn ɉii. Kɛlaa, ka káá di kaai, daa kpala, di hunwɔ̨ yɛ pu.

¹³ Ɉuwɔ kɔ́lɔɠaa ŋɛ̨i ku nɔɔ pu ɉu, di ɓo a ninɛ̨, diɛ ka kɛa daa haɠa, ə mą kɛ ku mąąhəɠəɠaa kəlee daa haɠa, bɛlɛɛ ku kɔ́wɔ ŋą kɔ́lɔɠaa diɛ bələ kwɛa pələ ɓa.»

¹⁴ Israɛlə lonnii di di wɔ kɔnɔ̨nŋaai hon, kɛlaa di hvo Yai-Laa mąąni kɛ.

¹⁵ Da Ɉosue ni di liilaa mįnɛ̨ həɠə, yaai a di lɛɛ yɛnɛ̨ɛ̨. Nɔi lonnii ɲɛ̨itɔwɔ nuą di di kwɛla diɛ.

¹⁶ Yaan, da diɛni di wɔ mįnɛ̨ həɠɛɛ tɛɛ pulu, hvóló haaɓa kulaa ɉu, Israɛlə nuą di gbaɠala kaa, diɛ kɛ nuą tii kaa kɛ lɔ laa, di kwɛlɛ nɔi.

¹⁷ Israɛlə lonnii dəli hvóló haaɓa kulaa ɉu, di lɔ di wɔ taa kpɛa kpɛaɠaai hu, diɛ kɛ a Gabaɔn, Kefira, Beerotə da Kiriatə-Yearimə.

¹⁸ Israɛlə lonnii di hvo di paa, mąąhɔlɔɓo nu kpulu ɲɛ̨itɔwɔ nuą daa gbɛa kɛ di kwɛla a Yai-Laa, Israɛlə nwɔ Yálái laa. Kɛlaa, nuą kəlee di kɛi di ɲɛ̨itɔwɔ nuą laa ɓo.

¹⁹ Ɲɛ̨itɔwɔ nuą diɛ nu kpɔn gəlee ɓa: «Ku ku kwɛla diɛ a Yai-Laa, Israɛlə nwɔ Yálá laa; gu hva kɛa pɛli mɛ̨nį ɲɔ̨nwɔ̨ɔ̨ kɛi a diɛ.

²⁰ Yii gwa pɛli gɛi, ya ɓaa gu di lɛɛ yɛnɛ̨ɛ̨, Yálá nwɔ liiholi hvo pa nee hee guɔ, gu wooi tii gu gwɛlɛ mąą mɛ̨nį ɓa.»

²¹ Galanɉonŋąą diɛ nuą diɛ: Di lɛɛ yɛnɛ̨ɛ̨, kɛlaa di kɛ a nɔi lonnii kəlee di wɔ kwɛi kwɛli nuą da di wɔ yá haɠa nuą; galanɉonŋąą di mo tii.

²² Ɉosue ə Gabaɔn kalanɉonŋąą təli, yɛ diɛ: «Lə mɛ̨nį ɓa yai ka ku ɓowo, kaa kɛ kuɔ, ka həɠə kpɔ kwɛala ya pa ka káá lɔ ɓɛ ku kwɛlɛ?

²³ Ə həɠə háákələi ɓa, ka nɛ̨ŋɛ̨n naai ɓə, ka ta hva kɛa kulɔ lɛɛ ɲeemu laa hu; ka lɛɛ lɔ kɛa a nwɔ́ Yálái nwɔ pɛ́lɛ́i mu kwɛi kwɛli nuą, da nwɔ yá haɠa nuą.»

²⁴ Di Ɉosue woo ŋaapələ diɛ mą: «Mɛ̨nįi Yai-Laa ə́ wɔ Yálái ə mo nwɔ tímun Moisə ɓa, daa kɛ lamun ɉukulɔi ə́ wɔ nuąi diɛ, a nɔi ŋɛ̨i tɛɛ mɛ̨nį ka pɔ, da ɉu nuą kəlee paa mɛ̨nį, kaa pɛli heei laa. Ku ɲɔw kaa kɛnɛ̨, mɛ̨nįi ku dúwɔ́i tii ɓo la, nwun ni.

²⁵ Ə həli kɛa yɛ́, ku kaa ə́ yee kɔ́nma, ku hon yɛ bələi a nɛ̨ɛ̨ la yɛ́, yá gaa yɛ́ ɉaŋąąi.»

²⁶ Ɉosue ə di nwun mąąɓo Israɛlə lonnii yəi, yiliɠaai di hvo di paa.

²⁷ Volói tii, Ɉosue ə di kɛ a nu kpɔ́n gəlee nwɔ kwɛi kwɛli nuą da nwɔ ya haɠa nuą, Yai-Laa nwɔ haláá kulɔ mɛ̨nį ɓa. Ɓɛi lɔpee Yálá kaa pai ɲee kpuɔ lɛi laa, gaa lɔ tii, ə mą kɛ háákələi.