Zasua 8 - Yálá laawoo hɛɓɛ (dc)

Ai taa hon mɛ̨nį a kɔ́

¹ Yai-Laa yɛ Ɉosue ɓa: «Hvo ɲɔw, ə́ wɔ kɔ́kulááɠaai həɠə, ə́ li ə́ kɔ́ pɛlɛ Ai taa ɓa. Ə́ kaa gaai, ŋą́ą́ daai tii ɉu tɔɔmun, ɉu nuą da nwɔ lɔiɠaai kəlee tɛɛ ə́ pɔ.

² Bələi ə́ gɛ la a Ɉeriko taa da nwɔ tɔɔmun, bələ ɓə yá gɛ la a Ai taa da nwɔ tɔɔmun. Kɛlaa yaamun, hɛn kpɔ ka ɉɔlɔɓo laa, ə mą kɛ daatɛlɛɛɠaa, ka gəlee həɠə a ka wɔɔ, yɛ kɔ́ pulu hɛn. Ka bələ ɲąątɛ di tɔwɔ ɉįi la di pulu pələ.»

³ Ɉosue da nwɔ kɔ́kulááɠaai di di muhəɠə, diɛ li kɔ́ pɛlɛi Ai taa ɓa. Hinąą nu waa pow haaɓa, yiiɠaai kɛ a kɔ́kuláá walawalaɠaa, diɛ ɓə Ɉosue ə di həɠə, də li a kpinį.

⁴ Ə mo diɛ, yɛ diɛ: «Ka ka wəli tɔɔ; ka káá lii bələ ɲąątɛi ɉįi la, di pulu pələ. Ka hvo ka mąą kwɛa daa ɓa, ka ka mąąlɛɠɛ laa.

⁵ Ɲą́ą́ kwa nwɔ́ nuąi, ku kaa pai lɛɠɛi daa ɓa. Ɓɛlɔwai di kaa pai kulɔi la diɛ pa woloi kuɔ, yɛ bələi tɔlɔɔ di gɛ lai, ku kaa pai tɛɛi a gilɛ;

⁶ Da hvilɛn ku pulu diɛ ku kpɛ, kwa ku mąą kwɛa daa ɓa, kwa diɛni; mąąhɔlɔɓo di kaa pai kɛi diɛ: Daa nwɔ̨nɔ̨ hvilɛn ku pulu diɛ ku kpɛ, yɛ bələi tɔlɔɔ di gɛ la, a kɛ tii, kwa kɛ lɔ ni di tɔwɔ, kuɔ gilɛ həɠə.

⁷ Nąąlɔwai, ka kulɔ ka loo pələi, ka daa hon, Yai-Laa ka wɔ Yálá aa dɛɛ ka pɔ.

⁸ Ka yee a pɛli daa ɓa, ka nwɔ̨n bili daai, ka gɛ kpɔlɔɔ yɛ bələi Yai-Laa ə mo la. Yili ɓə gáá ka tí la.»

⁹ Ɉosue ə di tɔɔ, də li ɓɛi kɛ mąąnɛ̨ɛ̨ di di loo laa. Di hee Betɛlə da Ai di lɔwai, Ai voló tooi pələ. Mąą kpinįi tii, Ɉosue da nwɔ kulaa yiiɠaa tii ɓə yíi kɛɛnąą tɔ̨nɔ̨.

¹⁰ Ɉosue ə humun kpɔ yələwala pɔ, ə nwɔ kɔ́kulááɠaa mɛ̨i kaa, da diɛni di həɠə diɛ li pɛlɛi Ai taa ɓa. Israɛlə kalanɉonŋąą di ɓo gulááɠaa ɲɛ̨i tɔwɔ.

¹¹ Gɔ́kuláá kəlee di di muhəɠə, da diɛni diɛ li, di li, di həli daa tənən ma. Di gɔ́ laɠa pɛlɛ Ai taa ɲələi pələi, ɲá-ɓoloon ə lɛɛ da Ai taa di lɔwai.

¹² Ɉosue ə nu waa lɔɔli ɲɔ̨nwɔ̨mąn ɉəɠə ə di loo Betɛlə da Ai di lɔwai voló tooi pələ.

¹³ Gɔkuláá yiiɠaa tii di di wɔ kɔlaɠai pɛlɛ daa ɲələi pələ. Bələ ɲąątɛ nuą di ɓo di pulu voló tooi bələ daa pulu. Mąą kpinįi tii, Ɉosue ə li nɛ̨ŋɛ̨ lɔi hąąi.

¹⁴ Yii kɛa Ai tɔɔmun ə yili nąą kaa tii, da nwɔ nuąi di kpuluun, diɛ pa pɛlɛi Israɛlə ɓa gɛɛnąą tɔ̨nɔ̨i lɔ hiɛ kɛ, Ɉurdɛn ɲá-ɓoloon dənən ma. Kɛlaa, di wɔ tɔɔmun gili hvo kɛ ɉu, yɛ kɛ bələ ɲąątɛ nuą daa di loo dɔwɔ, daa pulu pələ.

¹⁵ Ɉosue da nwɔ nuą di gɛ yɛ da ɲɔw diɛ, diɛ tɛɛ a gilɛ, diɛ li nɔi pun ɉu pələ.

¹⁶ Di tin doo daai, ə gɛ, Ai nuą kəlee di kulɔ di hvilɛn di pulu. Di hvilɛn Ɉosue pulu, yili ə di ŋąą nɛ̨nɛ̨n, di mąą ə kwɛa daa ɓa.

¹⁷ Ai taa-oo, Betɛlə taa-oo, hulɔnu tɔ̨nɔ̨ kpɛli hvo lɛɛ ɉu, di kəlee di hvilɛn Israɛlə nuą pulu, di daa mąąkpɛ hį́iɠaa kəlee laa lɛɛ a moɔ, diɛ Israɛlə nuą kpɛ.

¹⁸ Yai-La yɛ Ɉosue ɓa: «Tínɛ̨n, gbalai ŋɛ̨i ə́ yəi, ə́ ɲɛ̨i hee Ai taa ɓa, mąąhɔlɔɓo, ŋą́ą́ daa kwɛlɛ yɛ́.» Ɉosue ə tínɛ̨n ə nwɔ kpalai ɲɛ̨i hee Ai taa ɓa.

¹⁹ Yii lɔ ə ɲee haŋą, nuąi kɛ di loo pələi, di kulɔ a mąąhulaa, di gilɛ həɠə di tɛ taai, di daa hon, di nɛ̨ɛ̨ mą di nwɔ̨n nɔ daai.

²⁰ Ai nuą di tínɛ̨n, diɛ di kaa di pulu kaai, di ɲələ kpala kaa, daa kələn nwɔ̨n nulu yɛ tɛ. Ai nuą pui hvo kɛa kɛ mą. Israɛlə nuą ŋɛ̨i di kɛi di kpɛ, yiliɠaai di tínɛ̨n di di ɲɛ̨i hee Ai nuą diɛ.

²¹ Ɉosue da Israɛlə nuą, yii kɛa di gaa, diɛ kɛ di ɓɛlaai kɛ di loo pələi daa Ai taa hon, ə lɛɛ, daa kələn nwɔ̨n nulu yɛ tɛ, di tínɛ̨n di wolo Ai nuą diɛ, diɛ di paa.

²² Israɛlə nuą tii nwɔ̨n nɔ Ai daai, di pənə kɛa diɛ pa Ai nuą laakwiɛn ɉii a kɔ́. Ai nuą di lɛɛ gbulu hveelɛi tii lɔwai. Israɛlə nuą di tínɛ̨n diɛ, di Ai nuą paa kpɔ di hvo dɔ̨nɔ̨ kpɛli lɛɛ a vulú, dɔ̨nɔ̨ kpɛli hvo kulɔ a di yee wolo.

²³ Yii ɓaa Ai tɔɔmun nwɛi, di ɉon a vulú di paa la Ɉosue pɔ.

²⁴ Yii kɛa Ai nuą ŋɛ̨i kɛ ɲɛa kɔ́ɔɠaa hu, di yiliɠaa gəlee paa, di di hu tee tee a ɓɔwa, Israɛlə nuą di pənə di pa Ai daai, nu kpəli woloi lɛɛ, di yiliɠaa kəlee paa.

²⁵ Nuąi haa a volói tii, di kɛ a nu waa pow kɔ́w hveelɛ, gəlee di ɓo a Ai daai nuą.

²⁶ Ɉosue nwɔ kpala yee ŋɛ̨i ə dɛ ɲələi, hvo ɲee yɛɛ, ə lɛɛ la ɉu, di Ai nuą kəlee paa kpɔ tɛ̨ɛ̨ tɛ̨ɛ̨.

²⁷ Yii ɓaa Israɛlə nwɛi, bələi Yai-Laa ə mo la Ɉosue ɓa, bələ ɓə di gɛ la; di daai hɛnŋąą həɠə, da daatɛlɛɛɠaa.

²⁸ Ɉosue ə Ai taa kələn, ə nąą lɛɛ a taa kpoloon, ə nąą kɛ a kɛɛnąą yii nu hva pɛli heei laa, háá ɓa háá nąą kaa tii.

²⁹ Yii ɓaa Ai tɔɔmun nwɛi, di ɉɛlɛn wulu ta ɓa, ə lɛɛ laa hɛlɛn ni, ə lɛɛ la ɉu, yələ ə wulu, ɓɛlɔwai hvóló ə laa la kpɔlɔ ŋą, Ɉosue ə mo, di bowa kulɔ nwulu ɓa, di doo Ai daa mąąkpɛ hį́i gbon na, di kwɛni hį́i tɔɔ mɛ̨i, gaa laa háá ɓa háá.

Ɉaláá kulɔi tɔɔ mɛ̨nį da dɔ́n ɉɛɓɛ́ ɓo mɛ̨nį Ebalə yee nwuɔ̨

³⁰ Ɉosue ə Yai-Laa Israɛlə nwɔ Yálá nwɔ haláá kulɔi tɔɔ Ebalə yee nwuɔ̨.

³¹ Ə dɔɔ yɛ bələi Yai-Laa nwɔ tímun Moisə ə mo la Israɛlə nuą diɛ, bɛ̨ɛ̨i Moisə nwɔ tɔ́n ɉɛɓɛ́i hu, a kwɛni yii kwɛli hɛn və tunwɔ̨n ni mą, yili ɓə da ɉaláá kulɔi tɔɔ la, diɛ haláá kulɔ laa Yai-Laa ɓa a liilaa haláá.

³² Ɉosue ə dɔ́n ɉɛɓɛ́ pɛ̨ɛ̨ kwɛniɠaa diɛ, yɛ bələi Moisə ə bɛ̨ɛ̨ la Israɛlə lonnii ɲɛ̨i ɓa.

³³ Israɛlə huwu hu nuą di wɔ nu pɔlɔ pɔlɔɠaa, da di ɲąąwooɓo nuą, di kɛ tɔɔni mįnɛ̨ kəhi gwɛlɛ nąą kəlee, di ɓo Levi lonnii lííla, diɛi kɛ a Yai-Laa nwɔ mįnɛ̨ kəhi həɠə nuą. Nwɛ̨ąą da goló kɛ nuą di kɛ tɔɔni bələ tɔ̨nɔ̨, Garizimə yee ɓa, bələ tɔ̨nɔ̨ ə ɓo Ebalə yee ɓa; yɛ bələi Yai-Laa nwɔ tímun Moisə ə mo la diɛ, ə gɛ, di lúwɔ́ too tɔlɔɔ Israɛlə nuą diɛ.

³⁴ Ɉosue ə dɔ́n ɉɛɓɛ́ kəlee ɓo, lúwɔ́ woo da nɛ̨ŋɛ̨n nąą woo kɛ ɉɛɓɛ́ hu, yɛ bələi bɛ̨ɛ̨ la dɔ́n ɉɛɓɛ́ hu.

³⁵ Mɛ̨nįɠaa kpɔ Moisə ə bɛ̨ɛ̨ dɔ́n ɉɛɓɛ́ hu, dɔ̨nɔ̨ kpɛli hvo lɛɛ pulu, yii Ɉosue hvo kɛ mo li Israɛlə nu huwu ɓa, nɛ̨ą da ɉinąą, lɛapɛlɛɛ da nwɛ̨ąą mąn, nu kəlee ə mɛ̨n.