Zasua 7 - Yálá laawoo hɛɓɛ (dc)

Akan nwɔ kulɔ nwoo mu laa

¹ Ɉɛnŋąą ŋɛ̨i di tɔ́n dɔɔ mą, Israɛlə lonni di kulɔ nwoo mu laa kɛ mąą mɛ̨nį ɓa. Karmi lon Akan, yai kɛ a Ɉavdi lon, yɛ ɓo a Zera lon, Ɉuda huwu hu mun da, ɉɛn ŋɛ̨i kɛ tɔ́n dɔɔ mą, ə da həɠə, Yai-Laa ə nii ɲąąnwąnąą Israɛlə lonnii diɛ.

² Ɉosue ə lɛɛ Ɉeriko, ə nuą tɔɔ, diɛ li Ai daai, yii kɛ Bɛtə-Awɛn kwɛlɛ, Betɛlə taa voló həɠəi pələ, yɛ diɛ: Ka li ka nɛ̨lɛ̨ɛ̨n naa kɛ nɔi. Nuą tii, də li, di nɛ̨lɛ̨ɛ̨n naa kɛ Ai daai,

³ di pənə di pa Ɉosue pɔ, diɛ mą: «Ə mą kɛ nuą kəlee di hvo li li, nu waa hveelɛ, awala kɛ tii nu waa haaɓa ɲɔ̨nwɔ mąn, də li lɔ di Ai taa huwolo a kɔ́; mąąhɔlɔɓo, nuąi laa di hvo tamą li.»

⁴ Nu waa haaɓa ɲɔ̨nwɔ̨mąn nɔ ɓə həɠə nuą lɔwai, diɛ li gɔ́ tooi; kɛlaa, di yee hvo lɔ, di pu Ai nuą tɔwɔ.

⁵ Ai nuą di nu pow haaɓa kɔ́w mɛ̨ida ɲɔ̨nwɔ̨mąn baa Israɛlə nuą lɔwai. Ai nuą di hvilɛn nu kpəliɠaa pulu diɛ di kpɛ, ə həɠə daa ɉįi la, ə həli Sevarimə; ɲee yɛɛi ɓə di di paa laa. Israɛlə nuą hvii ə kpɛɛ, ya ə laa di kɔ́lɔi.

⁶ Ɉosue ə gwaną həɠə huɓɛla a líiholi, ə pɛlɛ Yai-Laa lííla, ə lɛɛ la ɉu yələ ə wulu; yaa da nɔi kalanɉonŋąą, di muluun gbala pu di nwuɔ̨.

⁷ Ɉosue yɛ Yai-Laa ɓa: «Ee! Ną́mu Yai-Laa! Lə mɛ̨nį ɓa, ə́ hvaa mą ə́ Ɉurdɛn yá teen a nuą ŋɛ̨i? Yɛ́ ku kwɛlɛ Amɔrə nuą ŋɛ̨i diɛ, diɛ ku paa? Akɛ yili ə kɛ tii, kwa kɛ kani kɛ ku lɛɛ Ɉurdɛn yá pulu pələi!

⁸ Nɛ̨ɛ̨ yɛ́, nwɔ́ mɛ̨nį Nąmu! Mɛ̨nį a kɛ ŋɛ̨i, lə ɓə ŋą́ pɛli moi, ɓɛlɔwai kɛa Israɛlə lonnii daa di pulu tɔɔ la di yowoɠaa diɛ?

⁹ Kanaan nuą, da nuąi kpɔ di heɛ kaa nɔi ŋɛ̨i hu, daa mɛ̨nįi ŋɛ̨i bələ mɛ̨n, di kaa pai tínɛ̨n ɉii kuɔ, di ku laa waa lɔi mɛ̨i. Akɛ tii, naa kɛnɛ̨i ŋɛ̨i gaa yɛ́, yá gɛ ləi?»

¹⁰ Yai-Laa yɛ Ɉosue ɓa: «Ə́ muhəɠə! Lə mɛ̨nį ɓa ə́ kaa pɛlɛ ni nɔi ɓa?

¹¹ Israɛlə aa nɛ̨ŋɛ̨n gɛ. Mįnɛ̨i ŋɛ̨i kwa di nąnni ku ɉəɠə, daa mąą kala a tɛ̨ą, yai wɔlɔ ŋį́ mą́ą́ pamą la, diɛ. Hɛn ŋį́ tɔ́n dɔɔ mą, daa da həɠə, yai kɛ a nwɔ́ɔ́, daa da nwuɔ̨, daa now, daa nɔ di yəi hɛnŋąą lɔwai.

¹² Yili ɓa tii, Israɛlə lonnii di hva pɛli tɔɔi di yowoɠaa lííla, di kaa lɔ pai kɛi di pulu hvəi di yowoɠaa diɛ. Ŋą́ą́ di kɛ a hɛn mąąnɛ̨ɛ̨ di ɉukala, və́ kɛa pai lɛɛi ka pɔ, akɛ mɛ̨nį ɲɔ̨n tii ka lɔwai ka wala gulɔ laa.

¹³ Ə́ muhəɠə, ə́ nuą mąąhəɠə, mo diɛ, yɛ diɛ: Nu kəlee ə gbɔwɔ mąąhəɠə tinąą mąą mɛ̨nį ɓa; mąąhɔlɔɓo, Yai-Laa Israɛlə nwɔ Yálá yɛ: Hɛn tɔ́n dɔɔ mą, da kaa Israɛlə nuą lɔwai ɉɛn tii a lɛɛ ka lɔwai, ka hva pɛli tɔɔi ka yowo lííla, akɛ ka hvo ɉɛn tii kulɔ li ka lɔwai.

¹⁴ Tinąą yələ wala, ka pa ka tɔɔ a huwuɠaa laa; huwu yii Yai-Laa a ɲee lɛ mą, di tɔɔ a gwəliɠaa laa, kwəli yii Yai-Laa a ɲee lɛ mą, di tɔɔ a bɛlɛ́ɠaa laa, pɛlɛ yii Yai-Laa aa ɲee lɛ mą, mu nuą di pa tɛi tɛi.

¹⁵ Nui lɔpee mɛ̨nįi tii a lɛɛ nwuɔ̨, da mąą nu kələn, yaa da ɲəi hɛnŋąą kəlee; mąąhɔlɔɓo, aa Yai-Laa woo mąą kala, aa ɓɛlɛkpɛɛ mąą túwɔ́ ɓo a Israɛlə.»

¹⁶ Ɉosue ə humun kpɔ yələwala pɔ ə nuą tɔɔ a ɉuwuɠaa laa, Ɉuda nu huwu ɓə ə too di mɛ̨i.

¹⁷ Di nu kəlee tɔɔ a Ɉuda kwəliɠaa laa, ə too Zera kwəli mɛ̨i, di tɔɔ a bɛlɛ́ɠaa laa, ə too Ɉavdi nwɔ pɛ́lɛ́i mɛ̨i.

¹⁸ Yili pulu bɛlɛ́n nuą diɛ tɛɛ tɛi tɛi; Karmi lon Akan, yai a Zavdi lon, Zera lon yai kɛ a Ɉuda nu huwu ta, ya ɓə ə too mɛ̨i.

¹⁹ Ɉosue yɛ Akan ɓa: «Nón, mąąwiɛ tɛɛ Yai-Laa pɔ, yai gaa a Israɛlə nwɔ Yálá, ə́ kɛnɛ̨ laa tɛɛ bɔ. Bələi kpɔ ə́ mɛ̨nįi ŋɛ̨i kɛ la, ɉukulɔ mą́ą́, hvo da loo.»

²⁰ Akan yɛ Ɉosue ɓa: «A tɛ̨ą leelee, ɲą́ą́ ɓə ŋą́ą́ nɛ̨ŋɛ̨n ɉəɠə Yai-Laa ɓa, yai gaa a Israɛlə nwɔ Yálá, bələi ŋį́ túwɔ́ la, bələ ka.

²¹ Gɔ pulu hɛnŋąąi tii lɔwai, ŋį́ lɔ́həɠə lɛlɛɛ ta kaa laa, yii da həɠə la Sinearə; wali kwələ nwun veelɛ, da hɛni kpuwulu kɛnɛ̨ yii kɛ mu wia kpɔ kɛnɛ̨. Ɲɛ̨́i ə kulɔ bɔ, ŋį́ ɉəɠə, ŋį́ li la, ŋą́ di loo nwɔ́ həɠə pɛ́lɛ́i ɉąąi, nwɔ̨n dinįi; nwali tii kaa laani ɉɛnəŋąą mu nɔi mu.»

²² Ɉosue ə nuą tɔɔ, di gilɛ həgə, di li Akan yəi ɉəɠə pɛlɛ́ mu; pələ kpɔlɔ ɓə di gaa la, nwali laai kɛɛ ɉɛnŋąą mu bɛlɛ́ hąąi, nɔi mu.

²³ Nuą di ɉɛnŋąąi tii həɠə di paa la Ɉosue pɔ Israɛlə lonnii kəlee ɲɛ̨i ɓa, di bu Yai-Laa lííla.

²⁴ Ɉosue ə nɛɛ mą ə Zera lon Akan hon, ə bɛlɛ nwali ɓa, da həɠə ə mą kɛ ɉɛni kpuwulu, ə bɛlɛ Akan lon ɉinąą da non nɛ̨ąą diɛ, da nwɔ nįŋɛ̨ɠaai, nwɔ hoohvaalənŋąą, da ɲəi taatɛlɛɛ pɛlɛɛɠaa kəlee, ə mą kɛ nwɔ həɠə pɛ́lɛ́i da yii kpɔ kɛ a Akan nwɔɔ. Da Israɛlə nuą kəlee di bɛlɛ gee ɓa di li Akɔrə ɓoloon ɉu.

²⁵ Ɉosue ə mo laa yɛ Akan ɓa: «Lə mɛ̨nį ɓa ə́ gbaloi ŋɛ̨i ɓɛla kuɔ? Yai-Laa kaa kpalo ɓɛlai yɛ́ háákəlei.» Israɛlə nuą kəlee di di hɔɔ a kwɛni, di haa, di di kələn; di kwɛni hįį tɔɔ di mɛ̨i.

²⁶ Gwɛni hįį kɛnɛ̨ɛ̨ tii di dɔɔ di mɛ̨i, gaa lɔ nii laa háákələi. Yili ɓə gɛ Yai-Laa nwɔ liiɲąnwąną ɲąą ə yɛɛ. Mɛ̨nįi gɛ di gɛɛnąąi tii laa hee a Akɔrə ɓoloon ɉu yaa li. Háá ɓaa háá, naai tii ɓə mą.