Zasua 6 - Yálá laawoo hɛɓɛ (dc)

Ɉeriko taa hon mɛ̨nį

¹ Ɉeriko taa ə kɛ a taa laa kpulɔɔ, wulu laa bulu Israɛlə lonnii mąą mɛ̨nį ɓa; nu ta hvo kɛi lɔ, nu ta hvo kɛi kulɔ.

² Yai-Laa yɛ Ɉosue ɓa: «Ə́ ɲɛ̨i hee laa, gáá Ɉeriko taa tɛɛi ə́ pɔ, yaa, da nwɔ tɔɔmun, ə mą kɛ, ɉu kulaaɠaa.

³ Kaai ɓaa nwɔ́ kulaaɠaa, ka káá pai kɛi daa mąątinɛn ɉii. Hvóló tɔ̨nɔ̨ yee mu, ka daa mąątinɛn tɔ̨nɔ̨, bələ ɓə ka káá pai kɛi gɛi la hvóló mɛ̨ida yee mu.

⁴ Ɉaláá laa həli nuą mɛ̨ihveelɛ, di kaa pai kɛi mįnɛ̨ kəhi tɔwɔ, ɓɛlaa mįnɛ̨ mɛ̨ihveelɛ ə ɓo di yəi. Voló mɛ̨ihveelɛ yələ, ka daa mąątinɛ̨n gee mɛ̨i mɛ̨ihveelɛ, ɉaláá laa həli nuą da mɛlaa mįnɛ̨ tulu hvɛɛ.

⁵ Ɓɛlɔwai mɛlaa mįnɛ̨ tulu woo a tɔɔ la, ka nwoo mɛ̨n, Israɛlə lonnii kəlee da tomą kpɔ kɛnɛ̨ a kɔ́ mɛ̨i woo, nąąlɔwai, daa mąą kpɛ hįį a pu, ɲąąɓa, nuą kəlee da tɛ daai, nu kəlee ə ɲɛ̨i haɠa dɔwɔ.»

⁶ Nąąlɔwai, Nun lon Ɉosue ə ɉaláá laa həli nuą təli, yɛ diɛ: «Ka taɠaa di Yai-Laa nwɔ mįnɛ̨ kəhi həɠə, nu mɛ̨ihveelɛ di tɛɛ dɔwɔ, ɓɛlaa mįnɛ̨ tulu ə ɓo di yəi.»

⁷ Yɛ nuą diɛ: «Ka tɛɛ ka daa mąą kpəlaan, kɛlaa, ɉaláá laa həli nuą tii mɛlaa mįnɛ̨ tulu kaa di yəi, di tɛɛ Yai-Laa nwɔ kon dɔwɔ.»

⁸ Mɛ̨nį kəlee ə kɛ kpɔlɔɔ yɛ bələi Ɉosue ə mo la nuą diɛ. Ɉaláá laa həli nuą mɛ̨ihveelɛi tii mɛlaa mįnɛ̨ kaa di yəi, di tɛɛ Yai-Laa nwɔ mįnɛ̨ kəhi dɔwɔ, diɛ mɛlaa mįnɛ̨ hvɛɛ, Yai-Laa nwɔ kon ə ɓo di pulu.

⁹ Kɔ́kuláá taɠaa di tɔɔ ɉaláá laa həli nuą ŋɛ̨i kɛi mɛlaa mįnɛ̨ hvɛɛ di tɔwɔ, daɠaa di lɛɛ mįnɛ̨ kəhi pulu, diɛ li, diɛ mɛlaa mįnɛ̨ hvɛɛ.

¹⁰ Ɉosue ə nuą kəlee wəli kpəlaan a nwoo ŋɛ̨i, yɛ diɛ: «Nui lɔpee ta hvo tomą, woo lɔpee ta hvo kulɔ nu ta la; hvo kɛ li volói ŋį́ kɛ la kaa ka tomą a kɔ́ mɛ̨i woo.»

¹¹ Yai-Laa nwɔ mįnɛ̨ kəhi ə daa mąątinɛ̨n a voló dɔlɔɔ, di di pulu pənə, də li di yíi di yəi muwuɠaa mu.

¹² Yələwala pɔ, Ɉosue ə humun, da ɉaláá laa həli nuą ŋɛ̨i Yai-Laa nwɔ mįnɛ̨ kəhi ə kɛ di yəi.

¹³ Ɉaláá laa həli nuąi mɛlaa mįnɛ̨ tulu ə kɛ di yəi, di kəlee; diɛi kɛi hiɛ Yai-Laa nwɔ mįnɛ̨ kəhi tɔwɔ. Di ɉiɛ kɔ́wɔ tɔɔ, diɛ mɛlaa mįnɛ̨ hvɛɛ. Kuláá taɠaa di ɓo hvilɛn ni Yai-Laa nwɔ mįnɛ̨ kəhi tɔwɔ, da bulu pələ, diɛ li, diɛ mɛlaa mįnɛ̨ hvɛɛ.

¹⁴ Voló veelɛ yələi tii, di daa mąątinɛ̨n tanɔ̨n gbən, di pənə də li muwu la. Bələ ɓə di gɛ la hvóló mɛ̨ida yee mu.

¹⁵ Voló mɛ̨ihveelɛ yələ, di humun, di daa mąątinɛn mɛ̨ihveelɛ, bələi lɔ hiɛ di kɛi gɛ la a bɔlɔ, di gɛ tii. Voló tɔ̨nɔ̨i tii, di daa mąątinɛ̨n mɛ̨ihveelɛ.

¹⁶ Mɛihveelɛnąą, ɉaláá laa həli nuą di mɛlaa mįnɛ̨ hvɛɛ, Ɉosue yɛ diɛ: «Ka tomą a kɔ́ mɛ̨i woo, mąąhɔlɔɓo, Yai-Laa aa daa ŋɛ̨i lɔ gu yee ŋą.

¹⁷ 'Ka daa ŋɛ̨i hu hɛnŋąą kəlee kala kpɔ tɛ̨ɛ̨tɛ̨ɛ̨, Yai-Laa mąą mɛ̨nį ɓa; daa ŋɛ̨i da ɉu hɛnŋąą kəlee dɔ̨nɔ̨ kpɛli hvo kulɔ, hvo kɛ li lɔ nwɛlikɛnɛ̨ɛ̨nui ŋɛ̨i da kɛ mą: Rahabə, ka nɛɛ a vúlu, da hɛn kpɔ gaa ɲəi bɛlɛ́n. Mąąhɔlɔɓo, gɔ́ nɛ̨lɛ̨ɛ̨nŋąąi ku di tɔɔ, yaa tii ɓə di mɛ̨i kpulu.

¹⁸ Yii ɓaa ka wɛi, ka ka kpɔɔ mɛ̨i kaa daa ŋɛ̨i hu hɛnŋąą mąą mɛ̨nį ɓa. 'Ka hvo da həɠə, ə gɛ, ka nwun na hvo pa pili, ə lɛɛ, ka hvo pa Israɛlə nwɔ ɓuwui kɛ a hɛn ɲɔ̨nwɔ̨ɔ̨, kaa kpalo ɓɛla mą yili pɔ pələ.

¹⁹ Walii kpɔ gaa ɓɛ, da hɛni, hɛn nɔpee gaa a ɓala kwɛli, da kwɛli kpɔ-kpɔ, gəlee kaa a Yai-Laa nwɔɔ, yili a lɔ Yai-Laa nwɔ hɛn gɔwi hu.»

²⁰ Israɛlə nuą di tomą a kɔ́ mɛ̨i woo, di mɛlaa mįnɛ̨ hvɛɛ. Ɓɛlɔwai di mɛlaa mįnɛ̨ woo mɛ̨n na, di tomą kpɔ a kɔ́ mɛ̨i woo, daa mąą kpɛ hįį ə nɛ̨ɛ̨ mą ə pu. Israɛlə nuą di tɛ daai, nu kəlee ə ɲɛ̨i haɠa dɔwɔ, di daa hon.

²¹ Hɛnŋąą kpɔ kɛ daai, di gəlee hu kala kpɔ tɛ̨ɛ̨tɛ̨ɛ̨?: Ɉinąą mąn, nɛ̨ąą mąn, nu nwunuɠaa, ə mą kɛ, nu pɔlɔ pɔlɔɠaa, Nįŋɛ̨, ɓɛlaa, ɉoohvaalənŋąą, di gəlee paa.

Rahabə nwɔ pɛ́lɛ́i nwun mąąɓo mɛ̨nį

²² Nu hveelɛi ŋɛ̨i di di tɔɔ a gɔ́ nɛ̨lɛ̨ɛ̨n naa kɛ nuą, Ɉosue yɛ diɛ: «'Ka lɔ nwɛlikɛnɛ̨ɛ̨nui tii yəi bɛlɛ́n, hɛn kpɔ gaa a nɛ̨ɛ̨nui tii nwɔɔ, da gbinį lee, ka di kulɔ daai, yɛ bələi ka ka woo kwɛlɛ la mą.»

²³ Gɔ nɛ̨lɛ̨ɛ̨naa kɛ nuąi tii di lɔ Rahabə yəi bɛlɛ́n, di Rahabə, nąn, nee, gaayɔwɔɠaa, da hɛn kpɔ kɛ a nwɔɔ, di gəlee kulɔ, di bɛlɛ ɉuwu hu nuą diɛ, di li a diɛ, di di hee Israɛlə nwɔ ɓuwui kwɛlɛ.

²⁴ Yii ɓaa daa nwɛi, di nwɔ̨n nɔ ɉu, di gəlee kələn, hvo kɛ li: wali, da hɛni, ɛlɛɛ, da ɉɛnŋąąi kɛ a ɓala kwɛli, da kwɛli kpɔ-kpɔɔ, di yiliɠaa pu Yai-Laa nwɔ hɛn gɔw kəhii hu ɲəi bɛlɛ́n.

²⁵ Nwɛlikɛnɛ̨ɛ̨nui ŋɛ̨i a Rahabə, da ɲəi bɛlɛ́n nuą, Ɉosue ə di lɛɛ yɛnɛ̨ɛ̨, ə mą kɛ hɛn kpɔ kɛ a nɛ̨ɛ̨nui tii nwɔɔ. Di Rahabə heei kulɔ Israɛlə lonnii lɔwai. Háá ɓa háá, naa kaa laa. Mąąhɔlɔɓo, Ɉosue nwɔ kɔ́ nɛ̨lɛ̨ɛ̨naa kɛ nuą li Ɉeriko kaai, nɛ̨ɛ̨nui tii ɓə di mɛ̨i kpulu.

²⁶ Volói tii di mɛ̨nį kɛ la, Ɉosue ə nɛ̨ŋɛ̨n naa Ɉeriko taa ɓa, yɛ mą: «Nui lɔpee pai muhəɠəi, yɛ kɛ gaa Ɉeriko taa ŋɛ̨i tɔɔi, mąą nu nɛ̨ŋɛ̨n naai Yai-Laa ɲɛ̨i ɓa; mąą nu a daa ŋɛ̨i wulu hvilɛn a non ɉulɔnu tɔlɔɔ, ə daa mąą kpɛ hįi gbon gɔwɔ hvilɛn a non ɉulɔnu veelɛnąą.»

²⁷ Yai-Laa ə kɛ Ɉosue pɔ, naa ə tɛ, mąą tin ə too nɔi nąą kəlee.