Zasua 5 - Yálá laawoo hɛɓɛ (dc)1 Ɓɛlɔwai Amɔrə tɔɔɓɛlaai Ɉurdɛn pulu, voló tooi pələ, ə lɛɛ Kanaan tɔɔɓɛlaai heeni gboloyá kwɛlɛ di bələ mɛ̨n na, diɛ Yai-Laa ə Ɉurdɛn yá kpala Israɛlə lonnii tɔwɔ ə gɛ di ɲá teen, hvaŋą hvo kɛa lɛɛ di yəi, ɛlɛɛ di lii hvo kɛa kpələ tɔɔi Israɛlə lonnii tɔwɔ. Israɛlə lonnii hee mɛ̨nį kɛ́nɛ̨ ɓa Gilgalə 2 Nąąlɔwai, Yai-Laa yɛ Ɉosue ɓa: «Kwɛniɠaa mąą haɠa, di kɛ yɛ ɓɔwa, Israɛlə lonnii yiiɠaa di kaa a kɛ́nɛ̨ kpoloa, ə́ di hee la kɛ́nɛ̨ ɓa.» 3 Ɉosue ə gwɛni ɓɔwaɠaai tii pɛli, ə Israɛlə lonnii hee la kɛ́nɛ̨ ɓa, gɛ́nɛ̨ hee yee ton na. 4 Mɛ̨nįi gɛ Ɉosue yɛ di hee la kɛ́nɛ̨ ɓa nwun mąą: Nuąi ŋɛ̨i wɔlɔ kulɔ Eziptə lɔi hu, ɉinąą da gɔ́kulááɠaa, gəlee di haa nɔi pun ɉu, ɓɛlɔwai di kulɔ la Eziptə, diɛ ɓo bələ pɔ. 5 Yaan, nuąi kpɔ kulɔ Eziptə lɔi hu, gəlee di kɛ a kɛ́nɛ̨ lonnii. Yili pulu, nu kanŋaai di di hɔlɔɓo bələ pɔ, di kulaa Eziptə, di hvo ni kɛ yiliɠaa hee li kɛ́nɛ̨ ɓa. 6 Kwɛlan bow nąąn mə di gɛ ɉiɛ hu; nuąi kulɔ Eziptə bɛlɛɛ gɔ́kulááɠaa diɛ, gəlee di haa. Mąąhɔlɔɓo di hvo di wəli tɔɔ Yai-Laa woo ɓa, yili ɓə gɛ, Ə gwɛla yɛ diɛ, nɔi Ə naakwɛlanmo di nąnni diɛ, yɛ gaa dɛɛi di pɔ, diɛi tii hvo kɛa pai həlii laa; a nɔi hɛn gəlee a lɛlɛ mą. 7 Diɛi tii haa, di lonnii ɓə kɛa di di hee a di mąąhvalin, diɛ ɓə Ɉosue ə di hee kɛ́nɛ̨ ɓa. Mąąhɔlɔɓo, gəlee di kɛ a kɛ́nɛ̨ kpolɔwa, di hvo kɛ di hee li kɛ́nɛ̨ ɓa bələ pɔ. 8 Yii kɛa di Israɛlə lonnii kəlee hee kɛ́nɛ̨ ɓa, di lɛɛ ɓɛi tii di kɛ laa, ə lɛɛ ɉu, gəlee di kulɔ yai. 9 Yili pulu, Yai-Laa yɛ Ɉosue ɓa: «Háákələi, nwumɛ̨i tii lɛɛ kaa, kaa həɠə la Eziptə, ŋą́ą́ yili mąą kwɛa kaa.» Di gɛɛnąą tii laa hee a: Gilgalə, naai tii ɓə gɛɛnąąi tii ɓa, háá ɓa háá. Pakə hɛli dɔlɔɔ pu mɛ̨nį Kanaan lɔi hu 10 Israɛlə nuą di hee Gilgalə, di pakə hɛli pu laa, a ɲąnin tii di kɛ ɉu nwɔ hvóló pow kɔ́w nąąn ɲələ yələ wulii pɔ Ɉeriko nɛ̨ŋɛ̨ lɔi hu. 11 Mąą yələ laa ɓoɔ, di lɛɠɛ mįi, dɛ hɛn və kɛ ɉu, da kpai yələn ŋąą, yai kɛ a nɔi tii hu hɛnŋąą. 12 Nɔi tii di lɔ ɉu, ɉu hɛn da mįi di mo, yili ɓə gɛ manə yɛ kpəla puɔɔ ɓa. Mąą yələ laa ɓoɔ, manə hvo kɛa pu; nɔi tii hu kɔ̨nɔ̨n mə Israɛlə lonnii di kɛi mįi a gwɛlan tii. Yai-Laa nwɔ kɔlaɠa nwun nąmu 13 Nąąlɔwai, yii kɛa Ɉosue ə kɛ Ɉeriko daa kwɛlɛ, ə nwun mu həɠə lɔ, yɛ gaa ɲɛ̨i kɛi, hulɔnu ta ə ɓo tɔɔni nií la, ɓɔwa kwɛaa ɲąąliɛ ə ɓo ɲəi, Ɉosue ə lɛɠɛ ɉulɔnui tii ɓa, yɛ mą: «Gwa kaani ɓə gu tɔɔ, ɓaa ə́ kaa a ku yówó?» 14 Ɉulɔnui tii yɛ Ɉosue ɓa: «Və́ a ka yówó, gwa kaani gu hvo tɔɔ li. Gáá a Yai-Laa nwɔ kɔlaɠa nwun nąmu, ŋį́ pa lɔ yiihu.» Ɉosue ə pɛlɛ gɔwɔ mu, ə kwɛli hvilɛn mą, yɛ mą: «Nwɔ́ɔ́ mɛ̨nį nąmu, lə mɛ̨nį ɓə yɛ́ ə́ mo ə́ wɔ luwɔi ɓa?» 15 Yai-Laa nwɔ kɔlaɠa nwun nąmu yɛ Ɉosue ɓa: «Gɔlɔ kulɔ, mąąhɔlɔɓo, ɓɛi ŋɛ̨i ə́ kaa laa, nąą mąąhəɠɛɛi.» Ɉosue ə nɛ̨ɛ̨ mą ə gɔlɔ kulɔ. |